
遍知贝玛嘎波大师教言集PK14འགྲོ་བའི་མགོན་པོ་གཙང་པ་རྒྱ་རས་པའི་རྣམ་པར་ཐར་པ་ངོ་མཚར་དད་པའི་རླབས་ཕྲེང་ཞེས་བྱ་བ།
3-1
༄༅། །འགྲོ་བའི་མགོན་པོ་གཙང་པ་རྒྱ་རས་པའི་རྣམ་པར་ཐར་པ་ངོ་མཚར་དད་པའི་རླབས་ཕྲེང་ཞེས་བྱ་བ།
༄༅། །འགྲོ་བའི་མགོན་པོ་གཙང་པ་རྒྱ་རས་པའི་རྣམ་པར་ཐར་པ་ངོ་མཚར་དད་པའི་རླབས་ཕྲེང་ཞེས་བྱ་བ་བཞུགས་སོ།། ༄༅། །ན་མོ་བྷཊྚཱ་ར་ཀ་སངྒུ་རུ་ཙ་ར་ཎཱ་ཡ། རྒྱ་ཆེན་ཚོགས་གཉིས་རྒྱ་མཚོའི་དབུས་ན་རབ་བརྗིད་ཆོས་ཕུང་བྱེ་བའི་ཀླུང་ཆེན་མངོན་འབབ་རྒྱལ་བའི་གསུང་སྐྱེས་ཟབ་མོ་ཐེག་པ་ཡི། །རིན་ཆེན་མཆོག་ལ་ཡོངས་སུ་སྤྱོད་མཁས་མིག་ཐོས་དབང་པོས་ལེགས་བསྐོར་བསླབ་པ་གསུམ་གྱི་བ་གམ་གྱིས་སྤྲས་མཁྱེན་གཉིས་ཏོག་གིས་མཛེས། །གྱེན་འཕྱུར་སྐྱེ་བོའི་མགོན་གཅིག་ལུང་རྟོགས་ནོར་བུའི་འོད་ཀྱིས་སྲིད་གསུམ་རྨོངས་པ་དྲུངས་ནས་འབྱིན་ཞིང་དྲེགས་ལྡན་ཟླ་ཉིའི་ཁེངས་པ་འཕྲོག །དད་ལྡན་རྒྱལ་བའི་ལྗོན་པ་སྐྱེད་བྱེད་ས་དགུའི་འགྲོ་ལ་མཆོག་གི་བདེ་སྟེར་དཔལ་ལྡན་བླ་མ་མཁར་སྙོག་དབང་པོ་དེ་ལ་འདུད། །སྲིད་པའི་དགྲ་སྡེ་ཐམས་ཅད་བཅོམ་མཛད་ནས། །དཔལ་སྟུག་ས་ལ་རྒྱལ་ཐབས་ལེགས་སྤྱོད་ཅིང་། །དམ་ཆོས་མཛོད་ཀྱི་ཟབ་མོའི་རིན་ཆེན་ཚོགས། །དབུལ་བ་ཀུན་ལ་ཐུགས་རྗེས་སྩོལ་ལ་འདུད། །གང་ཞིག་ལུང་དང་རིགས་པའི་ཆུ་ཡིས་རབ་ལྕི་འཆད་རྩོད་དབྱར་སྐྱེས་རྔ་ཡིས་ལོག་འདྲེན་སྤྱི་བོ་འགེམས་པར་མཛད། །གྲངས་མེད་ཆོས་ཚུལ་རྩོམ་པའི་གློག་འཁྱུག་དོན་བཟང་དབང་པོའི་དྲྭ་བས་མཛེས་ཤིང་ལེགས་བཤད་ཆར་རྒྱུན་རྟག་ཕབ་པས། །ཉེས་གསུམ་གདུང་བའི་ཚོགས་རྣམས་ཉེར་ཞི་འཁྲུལ་པའི་དྲི་མ་ཀུན་འཁྲུད་སྐལ་ལྡན་དྭངས་པའི་ཆུ་གཏེར་འཕེལ་བར་བྱེད། །
3-2
ལེགས་གསུང་བསྟན་པའི་འདབ་བརྒྱ་དཀར་པོ་ཕྱོགས་བཅུར་རྒྱས་མཛད་མཉམ་མེད་འབྲུག་པ་ཞེས་གྲགས་འཇིག་རྟེན་མགོན་དེས་སྐྱོངས། །གང་གི་མཚན་ཙམ་རྣ་བར་ལྷུང་བས་ཀྱང་། །སྲིད་པའི་རྒུད་པ་རིང་དུ་སྤངས་གྱུར་ནས། །མཐོ་རིས་དཔལ་ཡོན་དུ་མས་ཕྱུག་བྱེད་པའི། །དཔག་ཡས་ཐུགས་རྗེའི་གཏེར་དེས་དགེ་ལེགས་སྩོལ། །དེ་ཡི་རླབས་ཆེན་མཛད་བཟང་མཆོད་སྦྱིན་བརྒྱ་པ་དང་། །རིན་ཆེན་འབྱུང་གནས་དཔག་བསམ་དབང་དང་འཆི་མེད་རྒྱུན། །ཕུན་ཚོགས་དགེ་ལེགས་ཀུན་སྩོལ་ཕན་བདེའི་གཞིར་གྱུར་དེ། །ཅུང་ཟད་ཙམ་ཞིག་འདིར་ནི་ཁོ་བོས་འགོད་པར་བྱ། ། རྒྱ་ཆེན་པོའི་སྤྱོད་པ་དམ་པའི་ཕ་རོལ་ཏུ་སོན་པས་བདུད་སྡེ་རྩ་ལག་དང་བཅས་པའི་དཔུང་གི་ཚོགས་ལས་རྣམ་པར་རྒྱལ་བ། ཞི་བ་མཆོག་གི་བདུད་རྩི་བརྙེས་ཏེ། ཆོས་ཀྱི་འཁོར་ལོ་མ་ལུས་པ་རབ་ཏུ་བསྐོར་བར་མཛད་པ། ཞབས་སེན་གྱི་པདྨོར་ཁམས་གསུམ་གྱིས་མངོན་པར་གཏུགས་ཤིང་། ཡེ་ཤེས་རྡོ་རྗེ་ཞེས་སྙན་གྲགས་ཀྱི་གདུགས་དཀར་པོས་ཕྱོགས་བཅུའི་ཞིང་ཀུན་ཏུ་ཁྱབ་པའི་སྐྱེས་བུ་ཁྱུ་མཆོག་འདི་ཉིད། སེམས་ཅན་ཇི་སྙེད་པའི་བསོད་ནམས་དང་འཚམས་པར་སྣང་བའི་གཟུགས་ཀྱི་སྐུས་སྐྱེ་དགུ་མ་ལུས་པ་མྱ་ངན་ལས་འདས་པའི་ལམ་ལ་བཀྲི་བར་མཛད་པ་ལས། འདིར་བདག་ཅག་དང་སྐལ་པ་མཉམ་པ་དག་གི་འདྲེན་པར། དེ་དང་མཐུན་པར་སྔོན་ནས་བྱང་ཆུབ་སེམས་དཔའི་ཚུལ་བཟུང་སྟེ་རྣམ་པར་རོལ་པ་སྟོན་པར་མཛད་པའི་ཚུལ་ལས་འདི་སྐད་ཅེས་ཐོས་ཏེ། 
3-3
སྔོན་བྱུང་བ་འདས་པའི་དུས། བསྐལ་པ་བགྲང་བ་ལས་འདས་པའི་སྔོན་རོལ་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། སྐྱེས་བུ་གདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་བཀོད་པའི་རྒྱལ་པོ་ཞེས་བྱ་བ་འཇིག་རྟེན་ཏུ་བྱུང་བར་གྱུར་ཏོ། །དེའི་ཚེ་སྐྱེས་བུ་ཆེན་པོ་འདི་སློང་བས་འཚོ་བ་ཞིག་ཏུ་གྱུར་ཏོ། །དེ་སངས་རྒྱས་ལ་དང་བ་མི་ཕྱེད་པ་ཐོབ་སྟེ། བདག་ཉིད་ཀྱི་ལུས་བཙོངས་པའི་རིན་ཐང་གིས་བཤོས་བསོད་པ་སྦྱར་ནས་བླ་ན་མེད་པའི་བྱང་ཆུབ་ཏུ་ཐུགས་བསྐྱེད་པར་མཛད་དོ། །གཞན་ཡང་བསྐལ་པ་མཛེས་པར་སྣང་བ་ལ། འཇིག་རྟེན་གྱི་ཁམས་རྣམ་པར་བརྒྱན་པ་ཞེས་བྱ་བར་འདྲེན་པ་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་བྱོན་ཏོ། །དེའི་ཚེ་ཕོ་བྲང་རྣམ་པར་དག་པ་ཅན་དུ། གླིང་བཞི་ལ་དབང་བ་འཁོར་ལོས་སྒྱུར་བའི་རྒྱལ་པོ་ཡུལ་འཁོར་སྲུང་གི་སྲས་སྟོང་གི་ཐ་ཆུང་བློ་མཐའ་ཡས་གྲགས་ཞེས་བྱ་བར་གྱུར་ཏེ། སངས་རྒྱས་དང་དགེ་སློང་གི་དགེ་འདུན་ཉིད་ལ་ལོ་བྱེ་བ་ཉིད་དུ་མཆོད་པའི་མཆོག་གིས་མཆོད་དེ་ཆོས་བསྟན་པ་ཉན་ནས། ཡབ་རྒྱལ་པོས་གཞོན་ནུ་རྣམས་གང་ཐོག་མར་འཚང་རྒྱ་བརྟག་པར་བྱའོ་སྙམ་སྟེ་མིང་བྲིས་པ་རིན་པོ་ཆེ་སྣ་བདུན་གྱི་བུམ་པར་བཅུག །
3-4
དགུང་བདུན་དུ་མཆོད་དེ། བཙུན་མོ་དང་སྲས་བློན་པོ་ལ་སོགས་པའི་འཁོར་གྱི་ནང་དུ་མིང་རྣམས་བུམ་པ་ནས་ཕྱུང་བར་གྱུར་ཏོ། །དེ་ལས་ཕྱི་མ་ཉིད་དུ་སྐྱེས་བུ་འདིའི་མིང་བྱུང་བ་དང་། སྣག་གི་གཉེན་མཚམས་དང་སྤུན་རྣམས་ན་རེ། བདག་ཅག་གིས་སེམས་ཅན་ཐམས་ཅད་སྨིན་པར་བྱས། སངས་རྒྱས་ཀྱི་མཛད་པ་བྱས་པའི་འོག་ཏུ་ཁྱོད་ཀྱིས་ཅི་བྱར་ཡོད་ཅེས་སྤྱོས་པ་དང་། དེས་སྨྲས་པ། སངས་རྒྱས་ཆོས་རྣམས་འདི་དག་ནམ་མཁའ་མཚུངས་ཤིང་འདྲ། །བདག་གི་ཡིད་ལ་སེམས་ཅན་ཟད་པ་མེད་སྙམ་བགྱིད། །ཚུལ་ཁྲིམས་ཀྱིས་ནི་བདག་གི་སྨོན་ལམ་འདི་དག་འགྱུར། །བདག་གིས་སྨོན་ལམ་ཅི་འདྲར་ཐམས་ཅད་འདིར་གསོན་ཅིག །ཁྱོད་ཀྱི་ཚེ་ཚད་ཅི་ཙམ་པ་དག་བསྡོམས་པ་དང་། །ཚོགས་ཀྱི་རྒྱལ་པོ་ཇི་སྙེད་དེ་དག་ཀུན་བསྡོམས་པ། །ཐམས་ཅད་བསྡོམས་པ་དེ་སྙེད་བདག་གི་ཚེར་འགྱུར་ཏེ། །བདག་གི་དགེ་སློང་ཚོགས་ཀྱང་དེ་ཀུན་མ་ལུས་སྙེད། །ཅེས་སོགས་སྨྲས་ཏེ། བསྐལ་བཟང་འདིའི་རྒྱལ་བ་མོས་པར་ལུང་བསྟན་ཏོ། ། དེ་ལྟར་རིམ་གྱིས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་ཞུགས་ཏེ་རྟག་ཏུ་སྤྱོད་པར་མཛད། རྒྱལ་བ་ལ་ལྷག་པར་བྱ་བ་བྱས། དགེ་བའི་རྩ་བ་རྣམས་བསྐྱེད། སངས་རྒྱས་གངྒཱའི་ཀླུང་གི་བྱེ་མ་སྙེད་ལ་བསྙེན་བཀུར་ཞིང་དགྱེས་པར་བྱས་ཏེ། མངོན་པར་དབང་བསྐུར་བ་ཆེན་པོ་ཐོབ་ནས། 
3-5
ད་ལྟར་གྱི་འཇིག་རྟེན་གྱི་འདྲེན་པ་ཐམས་ཅད་དང་མཉམ་མེད་ཟས་གཙང་སྲས་ཀྱི་སྤྱན་སྔར་འཕགས་པ་འཇིག་རྟེན་དབང་ཕྱུག་ཕྱག་ན་པདྨ་ཞེས་བྱ་བར་གྱུར། ཉན་ཐོས་ཀྱིས་འདུལ་བར་བྱ་བ་ལ་འདུས་པའི་འཁོར་དགྲ་བཅོམ་པ་བསོད་ནམས་སྙིང་པོ་ཞེས་བྱ་བར་སྤྲུལ་ལོ། །དེ་ནས་རིང་བ་ཞིག་ན་གྲོང་བྱེ་བ་ཕྲག་དགུ་བཅུ་རྩ་དྲུག་གིས་བརྒྱན་ཅིང་། ཚངས་པའི་གྲོང་བྱེ་བ་ཕྲག་ཕྱེད་དང་བཅས་པའི་གཞིའི་དབུས་ཀྱི་ཕོ་བྲང་ཀ་ལཱ་པར་རིགས་ལྡན་གྱི་གཙོ་བོ་འཇམ་དབྱངས་གྲགས་པ་དང་། ལྷ་མོ་སྒྲོལ་མའི་སྲས་པདྨ་དཀར་པོ་ཞེས་བྱ་བར་གྱུར་ཏེ། བསྡུས་པའི་རྒྱུད་ཀྱི་རྒྱས་འགྲེལ་སྟོང་ཕྲག་བཅུ་གཉིས་པ་མཛད་དོ། །དེ་ནས་ཡང་གངས་རིའི་ལྗོངས་འདིར་ཆོས་ཀྱི་རྒྱལ་པོ་ཆེན་པོ་ཁྲི་ལྡེ་སྲོང་བཙན་ནམ་སྲོང་བཙན་སྒམ་པོ་ཞེས་བྱ་བར་སྤྲུལ་ཏེ། བོད་མུན་པའི་སྨག་རུམ་གཏིབས་པ་བསྟན་པའི་སྒྲོན་མེ་ཆེན་པོས་སྣང་བར་བྱས་སོ། །གཞན་ཡང་། འཕགས་པའི་ཡུལ་གྱི་ལྷག་མཐོང་དང་རྗེས་སུ་མཐུན་པའི་གནས་མལ་གྱི་མཆོག་ཏུ་ལུང་བསྟན་པའི་ཡུལ་གྲུ་ཆེན་པོ་ཁ་ཆེར་བྲམ་ཟེའི་རིགས་སུ་འཁྲུངས་ཤིང་། རང་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ་དང་། བདེ་བར་གཤེགས་པའི་གསུང་རབ་སྡེ་སྣོད་གསུམ་གྱི་བདུད་རྩིའི་ཉིང་ཁུས་བློ་གྲོས་ཀྱི་དབང་པོ་རྒྱས་པ། སྲིད་པའི་གདུང་བ་སྐྱེངས་པར་བྱེད་པའི་དཀའ་བ་ཆེན་པོ་བཅུ་གཉིས་སྤྱད་པའི་མཐར། 
3-6
སངས་རྒྱས་དངོས་ཀྱིས་རྗེས་སུ་བཟུང་བ་གྲུབ་པའི་སློབ་དཔོན་ཏིལླི་པའི་བྱིན་རླབས་བརྙེས་པས་མཆོག་དང་ཐུན་མོང་གི་དངོས་གྲུབ་ཐོབ་སྟེ་ཕ་རོལ་གྱི་རྒོལ་བ་འཇོམས་པར་མཛད་པ། རང་གཞན་གྱི་སྡེ་པ་གང་གི་མཁས་པ་དང་གྲུབ་པས་ཀྱང་འགྲན་པར་མི་བཟོད་པས། དཔལ་འཇིགས་མེད་གྲགས་པའམ་ནཱ་རོ་ཏ་པ་ཞེས་སྐྱེ་དགུ་ཀུན་གྱིས་བསྒྲགས་པ། དེ་བཞིན་གཤེགས་པའི་གསུང་སྒྲུབ་ཅིང་། བསྟན་པ་ལ་ཕན་གདགས་པ་ཆེར་བགྱིས་པ་ཉིད་དུ་གྱུར་ཏོ། །དེ་ནས་མཁས་ཤིང་གྲུབ་པ་བརྙེས་པའི་སློབ་དཔོན་དུས་ཞབས་ཆུང་བ་དང་། ཐམས་ཅད་གཟིགས་ཤིང་ཁམས་གསུམ་གྱི་མིག་གཅིག་པུ་རྗེ་ཟླ་འོད་གཞོན་ནུ་ལ་སོགས་པར་གྱུར་ཏེ། སེམས་ཅན་གྱི་དོན་རྒྱ་ཆེན་པོ་མཛད་ཅིང་། བསྟན་པ་ལ་བྱ་བ་ཆེར་བྱས་ལ། དེ་ནས་སླར་ཡང་མི་མཇེད་ཀྱི་ཞིང་དམ་པ། གླིང་བཞིའི་བྱེ་བྲག་འཛམ་བུའི་གླིང་དབུས་མ། བོད་དང་བོད་ཆེན་པོར་གྲགས་པ། དཔག་ཚད་བརྒྱ་ཕྲག་ཉི་ཤུ་རྩ་བཞི་ལྷག་པའི་བཅུ་དྲུག་དང་། རྒྱང་གྲགས་ཟུང་དང་། གཞུ་འདོམ་སྟོང་དང་སོ་གསུམ་ལྷག་པའི་ནོར་འཛིན་གྱི་ཁྱོན་ཡངས་པར་སྤྱོད་པའི་སྐྱེ་བོ་རྣམས་གདུལ་བར་བྱ་བའི་ཕྱིར་དང་། རྒྱལ་བའི་བསྟན་པ་ཆེས་ཆེར་སྤེལ་བའི་ཆེད་དུ། བོད་ཆུང་ངུའི་བྱེ་བྲག་དབུས་གཙང་གཉིས་ཀྱི་ས་ཀུན་གྱི་ཅོད་པན་དུ་གྱུར་པ། གནོད་སྦྱིན་གྱི་རྒྱལ་པོ་གང་བ་བཟང་པོས་རྗེས་སུ་སྐྱོང་བ། 
3-7
ཉང་སྟོད་ཀྱི་ཕུ་ས་ཡིད་དུ་འོང་ཞིང་ལྟ་ན་སྡུག་པ། ལྷའི་མེ་ཏོག་སིལ་མ་བཀྲམ་པ་ལྟ་བུས་གང་ཞིང་། ཀེ་ཀེ་རུ་དང་། མརྒཏ་དང་། པདྨ་རཱ་ག་དང་། ཨིནྡྲ་ནཱི་ལ་ལྟ་བུའི་མདོག་དང་ལྡན་ཞིང་འོད་ཆགས་པའི་རི་བོས་ཁོར་ཡུག་ཏུ་བསྐོར་བ། བཻཌཱུརྻའི་གཞི་རིན་པོ་ཆེ་སྣ་ཚོགས་པའི་རེ་ཁས་མཛེས་པར་བྱས་པ་ལྟར་རྣམ་པར་བཀྲ་བ། གང་དུ་སྐྱེ་འགྲོ་མ་ལུས་པ་གླུ་གར་གྱིས་རྩེ་ཞིང་། ཟད་མི་ཤེས་པའི་ལོངས་སྤྱོད་ཀྱིས་འཚོ་བ། གཞོན་ནུ་རྣམས་ཀྱང་སྐབས་གསུམ་པའི་ཁེངས་པ་འཕྲོག་ཅིང་སྙན་པའི་གདངས་ཀྱིས་འགྲོ་བའི་ཡིད་ཡོངས་སུ་བསླུ་བར་བགྱིད་དོ། །དེ་ལས་དཔའ་རྩལ་གྱི་སྟོབས་ལྡན་པ་རྒྱ་ནག་པོའི་གྱད་ཀྱི་རིགས་སྒྱུ་རྩལ་གྱི་གནས་མ་ལུས་པ་ཁོང་དུ་ཆུད་ཅིང་། རྣམ་ཐོས་ཀྱི་བུའི་ནོར་ལ་འགྲན་པར་བཟོད་པའི་བང་མཛོད་ལ་དབང་བྱེད་པའི་ཁྱིམ་བདག་ཟུར་པོ་ཚབ་པེ་ཞེས་སྐྱེ་བོ་རྣམས་ཀྱིས་བསྔགས་པར་བྱེད་པའི་ཡུལ་དུ་གྱུར་ཏོ། །བུད་མེད་ཀྱི་ཡོན་ཏན་ཀུན་དང་ལྡན་ཞིང་ཉེས་པའི་ཚོགས་ཀྱིས་ནམ་ཡང་མ་གོས་པ། རྟག་ཏུ་དལ་བའི་སྤྱོད་ལམ་གྱིས་ཀུན་གྱི་སེམས་འཕྲོག་པ། དགེ་བའི་ལས་ལ་ཀུན་ཏུ་སྤྱོད་པའི་ཁྱིམ་བདག་མོ་མར་བཟའ་དར་སྐྱིད་ཅེས་པའི་སྲས་སུ། ལྕགས་འབྲུག་སྟོན་འབྲིང་ཐ་སྐར་གྱི་ཉ་བ་དང་ཉེ་བར་གྱུར་པ། 
3-8
ཡར་གྱི་ངོའི་སྟོང་པ་གསུམ་པའི་ནམ་གྱི་དགུང་ཐུན་ལ། ལྷའི་བླ་མས་དབང་བྱེད་ཅིང་། ཁྲུམས་སྟོད་བདུད་རྩིའི་འོད་དང་ལྷན་ཅིག་པར་ངེས་པའི་སྦྱོར་བ་དང་ལྡན་པའི་དུས་སུ་ལྷུམས་སུ་ཞུགས་པར་གྱུར། དེ་མ་ཐག་ལྷ་རྣམས་ཀྱིས་མཆོད་ཅིང་། གནོད་སྦྱིན་གྱི་ཚོགས་སྲུང་བར་བྱེད་དོ། །སྐྱེད་བྱེད་མའི་གཡར་ལམ་དུ། ཤེལ་གྱི་ཁྱེའུ་རབ་ཏུ་མཛེས་ཤིང་མཚན་དཔེའི་འོད་ཟེར་འཕྲོ་བ། དུ་ཀཱུ་ལའི་རས་ཀྱིས་སྟོད་གཡོགས་དང་ཤམ་ཐབས་བགོས་པ། རི་དྭགས་ཀྱི་པགས་པ་ཕྲག་པར་འཕྱང་ཞིང་། གཡས་པའི་ཕྱག་མཐིལ་ལས་ཚ་གདུང་འཇོམས་པའི་བསིལ་བའི་རྒྱུན་འབབ་པ། གཡོན་པས་པདྨ་དཀར་པོ་འདབ་མ་སྟོང་དང་ལྡན་པ་ཐོགས་པ་ཞིག་དཀུ་གཡས་པའི་རུམ་དུ་ཞུགས་པ་རྨིས་པས། སྣམ་ལོགས་སུ་གནས་པ་དག་ལ་སྒྲོག་གོ། །དེ་དག་ཀྱང་དགའ་བ་དང་མགུ་བ་ཆེན་པོས་གང་བར་གྱུར་ནས་བསྔགས་པར་བྱེད། བྱང་ཆུབ་སེམས་དཔའ་ནི། མའི་མངལ་དུ་ངལ་བ་མེད་པར་དམ་པའི་ཆོས་ཀྱི་སྒྲ་འབྱིན་ཞིང་། ཆུ་ནང་གི་པདྨ་ལྟ་བུར་རབ་ཏུ་མཛེས་པ། དེ་ལྷུམས་སུ་ཞུགས་ནས་ཡུམ་སྔོན་ཆད་མཐོང་བ་དང་མྱོང་བར་མ་གྱུར་པའི་གྱ་ནོམ་པའི་བདེ་བ་ལ་གནས་པར་གྱུར། དེ་ནས་བཙའ་བའི་དུས་དང་ཉེ་བར་གྱུར་ཏེ། མཆུ་ཟླའི་ཤོལ་དང་བཅས་པས་ལུས་རྫོགས་པ་ན། འདྲེན་པ་ཤཱཀྱའི་དབང་པོ་འདས་པ་ཆེན་པོའི་ཚུལ་བསྟན་ནས་ལོ་ཉིས་སྟོང་ཉིས་བརྒྱ་བཅོ་བརྒྱད་འདས་པ། 
3-9
དཔལ་བདེ་འབྱུང་གི་གྲོང་ཁྱེར་ཆེན་པོའི་དབུས་ཀྱི་སེང་གེའི་ཁྲི་ཆེན་པོར། ཁེངས་བྱེད་ཀྱི་སྤྲུལ་པ་རིགས་ལྡན་མཐའ་ཡས་ཆོས་སྟོན་པ་ལ་ཕེབས་ནས་ལོ་བུག་མེ་སོང་བ། ཁྱུ་མཆོག་ཅེས་པ་ལྕགས་མོ་སྦྲུལ་གྱི་ལོ་དབྱར་ར་སྣོན་གྱིས་ཉ་བའི་སྔ་དྲོ། པ་སངས་དང་རྒྱུ་སྐར་སྣུབས་འཛོམ་པ། ཚངས་པའི་སྦྱོར་བ་ལ་རྗིལ་བུ་ཐང་ར་ཞེས་པའི་སླས་སུ། བཀྲ་ཤིས་པའི་ལྟས་དང་བཅས་ཏེ་འགྲོ་བའི་བླ་མ་བལྟམས་པར་གྱུར་ཏོ། །དེ་ཡང་། དབང་པོའི་དྲྭ་བ་ལྟ་བུའི་མདངས་ཅན་གྱི་གོས་ཀྱིས་བར་མཚམས་མེད་པར་དཀྲིས་པའི་གོང་བུ་ཞིག་བྱུང་ངོ་། །དེ་མཐོང་མ་ཐག་ཏུ་ལུས་སྲིང་མ་སྐྲག་སྟེ་ཡོངས་སུ་དོར་ཏོ། །གཅེན་དྲུག་ཡོད་པའི་ཐ་ཆུང་དུའང་གྱུར། དེའི་ཚེ་སྐྱེད་བྱེད་མ་ཤུལ་ལམ་རིང་དུ་སོན་པ་ན། གཅེན་ལྷ་གཉན་དང་མཇལ། ཇི་ལྟར་བྱུང་བའི་ལོ་རྒྱུས་བསྙད་པ་དང་། དེ་ཉིད་མངོན་པར་དང་བ་དང་བཅས་ཏེ་བ་སྤུ་ཆེར་གཡོས། དེ་ནས་དེས་རིངས་པའི་སྟབས་ཀྱིས་བྱོན་པ་དང་། སྦྲ་ཤུལ་ན་བྱ་རྒོད་ཅིག་ལྡིང་ཞིང་འདུག་གོ། །ཅི་འདབ་ཆགས་ཀྱིས་ཟོས་པར་མ་གྱུར་གྲང་། འོན་ཀྱང་ཤེས་པར་དཀའོ་སྙམ་པའི་ཡིད་གཉིས་དང་བཅས་ཏེ་གན་དུ་ཕྱིན། དེར་གོང་བུ་དེ་རྡོལ་བ་ལས་ཁྱེའུ་གཟུགས་མཛེས་ཤིང་བཟང་བ། མཚན་དཔེ་དུ་མས་སྤྲས་པ། ཡིད་དུ་འོང་ཞིང་ལྟ་ན་སྡུག་པ་ཞིག་བྱ་རྒོད་ཀྱི་གཤོག་པའི་རུམ་ན་འཚོ་ཞིང་གནས་པ་མཐོང་ངོ་། །
3-10
དེ་ལ་ལྷག་པར་དགའ་བ་དང་གུས་པ་ཆེན་པོ་ཐོབ་བོ། །དེ་ནས་ཐོགས་ཏེ་དཔག་ཏུ་མེད་པའི་གཅེས་སྤྲས་ཀྱི་སྒོ་ནས་གཞོན་ནུའི་སྐྱེད་སྲིང་བའི་ཐབས་ལ་གཅིག་ཏུ་བརྩོན་པར་བྱས་སོ། །བོན་ཞིག་ལ་རེ་ཞིག་བསྲུང་བའི་ཆེད་དུ་གཏད་དེ། མཚན་གཡུང་དྲུང་དཔལ་ཞེས་བྱ་བར་ཡང་བཏགས་ཤིང་། དེ་ཡང་ཉེས་པའི་དྲི་མས་དབེན་ཞིང་ལུས་སྐྱེད་དྲག་ལ་གཞོན་ནུའི་ངང་ཚུལ་ལ་མཁས་ཤིང་། འགྲོ་བ་ཀུན་གྱི་ཡིད་འཕྲོག་གོ། །ནེའུ་ལྡང་རྣམས་དང་ལྷན་ཅིག་སྔོན་དང་ཕྱི་མའི་མཐའ་ཡི་མཛད་པའི་ཚུལ་ཆེན་པོས་རྩེ་བར་མཛད་པ་ལས། སྐབས་ཤིག་ཏུ་རྒྱལ་གྲོང་ཞེས་བྱ་བའི་གྲོང་ཁྱེར་དང་ཉེ་བའི་རྡོ་ལེབ་གྲུ་བཞི་པ་ཞིག་ལ་རྩེད་མོ་བྱེད་པའི་ཚེ། དེའི་ཉེ་ལོགས་ཀྱི་རྡོ་བ་ཞིག་ལ་ཞབས་ཟུང་གི་པདྨོ་རྣམ་པར་བཀོད་དེ། ལྷ་དང་མི་རྣམས་ཀྱི་མཆོད་པའི་རྟེན་དུ་བཞག་གོ། །དེ་ནས་དགུང་ལོ་བཞིར་སོན་པ་དང་། གཙུག་ལག་ཀུན་གྱི་མ་མོར་གྱུར་པ་ཡི་གེའི་ཕྱི་མོ་སུམ་ཅུ་བཀླག་པ་དང་འབྲི་བ་སོགས་རིག་པའི་གནས་དུ་མ། ཀུན་གྱི་བཤེས་གཉེན་ལྟ་བུའི་སློབ་དཔོན་མཁར་ལུང་པའི་གྲྭར་བྱོན་ཏེ་བསླབ་པའི་ཚུལ་བསྟན། དགུང་ལོ་བརྒྱད་ལོན་པ་ན། གང་སྐྱེད་པར་བྱེད་པའི་མ་མ་གཤེགས་པར་གྱུར་ཏོ། ། དགུང་ལོ་བཅུ་གཉིས་གཞེས་པའི་ཚེ། གཅེན་སྐལ་ལྡན་བྱ་བ་འཕགས་པའི་ནོར་གྱིས་ཕྱུག་པ་དེ་དང་སྟབས་གཅིག་ཏུ་དགེ་བའི་བཤེས་གཉེན་རྟ་ཐང་པ་བསྟེན། 
3-11
གཙུག་ཕུད་བྲེགས། ཡོངས་སུ་རྫོགས་པའི་དགེ་བསྙེན་གྱི་སྡོམ་པ་ནོས། ཤེས་རབ་བདུད་རྩིའི་འཁོར་ལོར་མཚན་གསོལ། ཟངས་དཀར་ལོ་ཙཱ་བའི་ལུགས་ཀྱི་དཔལ་འཁོར་ལོ་སྡོམ་པའི་དབང་བཞི་གསན་ཞིང་། ལོ་གསུམ་དུ་བྱང་ཆུབ་སེམས་དཔའ་རྣམས་ཀྱི་བསླབ་པར་བྱ་བ་ཐུན་མོང་མ་ཡིན་པའི་བསྟན་བཅོས་ཐེག་བསྡུས། རིགས་ཅན་གསུམ་གྱི་བསླབ་པར་བྱ་བ་ས་སྡེ་ལྔ། ཉན་ཐོས་ཀྱི་ཐུན་མོང་མ་ཡིན་པའི་བསླབ་པ་མངོན་པ་མཛོད་དེ། ལྷག་པ་ཤེས་རབ་ཀྱི་བསླབ་པ་སྟོན་པའི་ཆོས་མངོན་པ་ལ་མཁས་པར་སྦྱངས།ཡོ་གའི་གཞུང་ལག་ལེན་དང་ཞི་བྱེད་སོགས་ཀྱང་གསན་ཏོ། །དགུང་ལོ་བཅོ་ལྔ་པའི་ཚེ། སླར་རིག་པའི་དབང་ཕྱུག་མཁར་ལུང་པར། གཞུང་ལུགས་ཀུན་ལ་བལྟ་བའི་མིག་གཅིག་པུ་ཚད་མའི་མདོ་ཀུན་ལས་བཏུས། དེའི་ཚིག་དོན་གསལ་བར་སྟོན་པའི་རབ་ཏུ་བྱེད་པ་རྣམ་པར་ངེས་པ་གཙོ་བོར་བསླབས་ཤིང་། རྣམ་འགྲེལ་སོགས་སྡེ་དྲུག་ཀྱང་ཐོས་པར་བྱས་པ་ལས། ཚད་མ་རིག་པའི་གནས་ཀུན་ཁོང་དུ་ཆུད་ཅིང་། ངོ་བོ་ཉིད་མེད་པར་སྨྲ་བ་དབུ་མ་པའི་སྲོལ་ཆེན་པོ་རྟོགས་ཏེ། སྨྲ་བའི་དབང་ཕྱུག་ཆེན་པོར་གྱུར། དེ་ལས་རིགས་པས་དཔྱད་པར་མི་བཟོད་པའི་གྲུབ་པའི་མཐའ་འཇོམས་པར་བྱེད་པའི་དཔའ་བོ་གཅིག་པུར་ལྷ་དང་བཅས་པའི་འགྲོ་བ་རྣམས་ཀྱིས་སྒྲོག་པར་བྱེད་དོ། །བཤེས་གཉེན་དེ་ལས། སྒྱུ་འཕྲུལ་གསང་བ་སྙིང་པོ་རྫོགས་པ་ཆེན་པོ་རྒྱས་པ་སྤྱི་མདོའི་སྐོར་ཡང་གསན། 
3-12
དེར་སྙུན་ཅུང་ཟད་ཙམ་ཞིག་ཡོད་པའང་དཔྱད་མ་དགོས་པར་དྭངས་པར་གྱུར་ཏོ། །ཆོས་སྒོ་གྲངས་མེད་པ་དབྱེ་བའི་རྟེན་འབྲེལ་དུ། གཙང་རོང་གི་གཡུང་དུ་མཐོ་བརྩིགས་ཏེ་བཤད་པའི་ཚུལ་བགྱིས། སློབ་དཔོན་འཁོར་རེ་བར། ཤེས་རབ་ཀྱི་ཕ་རོལ་ཏུ་ཕྱིན་པའི་དངོས་བསྟན་སྟོང་ཉིད་ཀྱི་རིམ་པ་གཏན་ལ་འབེབས་པར་བྱེད་པ་དབུ་མ་རིག་པའི་ཚོགས་དྲུག་མཁས་པར་བསླབས་ཤིང་། རྫོགས་པ་ཆེན་པོ་སེམས་ཕྱོགས་གསན། དེ་ཚེ་ཤངས་སུ་ཆོས་འཁོར་ཆེན་པོ་ཞིག་བྱུང་བའི་དུས་སུ། བྱང་ཆུབ་སེམས་དཔའ་ཆེན་པོ་གཞོན་ནུ་འདིས་ལེགས་པར་བཤད་པ་བསྟན་པ་ན། དགེ་བའི་བཤེས་གཉེན་འདུས་པ་དང་། བྱིས་པ་དང་། དར་མ་དང་། རྒན་པོར་གྱུར་པའི་སྐྱེས་པ་དང་། བུད་མེད་ཀུན་རྩེ་གཅིག་ཏུ་མཉན་པར་བྱེད་ཅིང་། མངོན་པར་དགའ་བས་བསྟོད་པར་བྱེད་དོ། །དགེ་བཤེས་གཙང་ཚར་སྒྱུ་འཕྲུལ་དང་ཐུགས་རྗེ་ཆེན་པོ་གཏེར་མ་གསན། ལྷན་གྱི་སོ་དར་མ་སེང་གེ་ལ་བྱང་ཆུབ་ཏུ་སེམས་བསྐྱེད་པའི་སྡོམ་པ་ནོས། ཤེས་རབ་ཀྱི་ཕ་རོལ་ཏུ་ཕྱིན་པ་ཚིག་ལེའུར་བྱས་པ་སྡུད་པ་རྩ་འགྲེལ་དང་། བྱང་ཆུབ་སེམས་དཔའི་སྤྱོད་པ་ལ་འཇུག་པ་མཁས་པར་བསླབས། ཁུ་ལུང་གི་ལྷ་རྗེ་ཀུན་དགའ་རྒྱལ་མཚན་ལ་བི་མ་ལ་མི་ཏྲའི་ལུགས་ཀྱི་མཚན་བརྗོད་སྦྱངས། འོམ་ཐང་གི་སློབ་དཔོན་འདུལ་འཛིན་ལ་ཐུགས་རྗེ་ཆེན་པོ་ཇོ་བོ་ལུགས་གསན། 
3-13
དེ་ལྟར་ལོ་བཅུ་གཅིག་ཏུ་བླ་མ་གུས་པར་བསྟེན་ནས་རིག་པའི་གནས་མཐའ་དག་ཐོས་པར་བགྱིས་སོ། ། དགུང་ལོ་ཉེར་གཉིས་གཞེས་པའི་ཚེ། ཡབ་ཀྱིས་ཆོས་ཀྱི་འཁོར་ལོ་བསྐོར་བའི་སྦྱིན་པའི་བདག་པོ་བྱས་ཏེ། སློབ་དཔོན་མཁར་ལུང་པ་སྤྱན་དྲངས། ཤཱཀྱའི་སྲས་པོ་ངུར་སྨྲིག་འཛིན་པ་དཔག་ཏུ་མེད་པ་ཚོགས་ཤིང་། ཁོར་མོ་ཡུག་ཏུ་སྐྱེ་བོ་བགྲང་བ་ལས་འདས་པས་བསྐོར་བ། དཀར་པོའི་ཕྱོགས་རབ་ཏུ་སྐྱོང་བར་བྱེད་པའི་གནོད་སྦྱིན་གྱི་དབང་པོ་དང་། ལྷ་དང་ལྷ་མིན་དང་། སྡེ་བརྒྱད་ལ་སོགས་པའང་འདུས་པར་གྱུར་ཅིང་སྲུང་བར་བགྱིད་དོ། །དེ་ལྟར་འཁོར་གྱི་ཁྱམས་ག་ལ་བར་སེང་གེའི་ཁྲི་ཆེན་པོ་བཤམས་པ། བཀོད་པ་ཕུན་སུམ་ཚོགས་པས་མཛེས་པར་བྱས་པ་དེར་རྒྱལ་བའི་སྲས་འདི་གནས་ཏེ། ཚད་མ་དང་། མངོན་པ་དང་། བྱང་ཆུབ་སེམས་དཔའི་སྤྱོད་འཇུག་དང་། ཕར་ཕྱིན་དང་། དབུ་མ་ལ་སོགས་པ་ཤེས་པར་བྱ་བའི་གནས་ཕལ་མོ་ཆེ་གདུགས་མང་པོར་སྦྲེལ་ཏེ་བཤད་པར་བྱས་སོ། །དེ་ལ་སྨྲ་བ་ཚར་གཅོད་པར་ནུས་པ་དག་གིས་ལུང་དང་རིགས་པས་དཔྱད་པས་ཕུན་སུམ་ཚོགས་པར་རིག་སྟེ་མངོན་པར་བསྟོད་ཅིང་རྗེས་སུ་ཡི་རང་བ་འབུལ་བར་བྱེད་དོ། །སྐྱེ་བོ་རྣམས་རབ་ཏུ་ངོ་མཚར་བར་གྱུར་ཏེ་ལོངས་སྤྱོད་དུ་མས་བཀུར་སྟི་བགྱིས། འདོད་གཟུགས་ཀྱི་ལྷ་དཀར་པོའི་ཕྱོགས་ཀྱང་ལྷའི་མེ་ཏོག་འཐོར་ཞིང་། 
3-14
རོལ་མོ་དང་གླུ་དབྱངས་སྙན་པ་སྒྲོག་ཅིང་མཆོད་པ་རྣམ་པ་རབ་ཏུ་མང་པོས་མཆོད། བསྟོད་པའི་དམ་པས་ཀྱང་བསྟོད་པར་བྱེད། དེའི་ཚེ་ས་ཆེན་པོ་འདི་ཡང་རྣམ་པ་དྲུག་ཏུ་གཡོས་ཤིང་། འདོད་པའི་དབང་ཕྱུག་འཁོར་དང་བཅས་པ་ཡིད་བློང་བློང་པོར་གྱུར་ཏོ། །ཕྱོགས་བཅུའི་ཞིང་རབ་འབྱམས་ན་བཞུགས་པའི་རྒྱལ་བའི་དབང་པོ་སློབ་མའི་ཚོགས་དང་བཅས་པ་དགྱེས་པའི་འོད་ཟེར་གྱིས་སེམས་ཅན་རྣམས་ལ་བདེ་བ་དམ་པ་སྟེར་བར་མཛད་ལ། དེ་ལྟར་ཀློག་པ་ཐོས་བསམ་ལ་ཡུན་རིང་དུ་འབད་པས་སྦྱངས་སྟོབས་ཀྱི་ཤེས་རབ་ཕུན་སུམ་ཚོགས་པར་གྱུར་མོད། ད་ནི་སྤོང་བ་བསམ་གཏན་ལ་ནན་ཏན་དུ་བྱའོ་སྙམ་དུ་དགོངས་ནས། འཁྲུངས་པའི་ཡུལ་གང་གི་དབེན་པའི་རི་ཕུག །ར་བཟུང་ཞེས་པར་སེམས་ཅན་ཀུན་ལ་ཕན་པ་སྒྲུབ་པ་སྒོམ་པ་ལ་བརྩོན་པས་གནས་པའི་ཚེ། དཔལ་རྣལ་འབྱོར་གྱི་དབང་ཕྱུག་གླིང་རས་པདྨ་རྡོ་རྗེ་ཞེས་ཉི་ཟླ་ལྟར་གྲགས་པ་དེ་ཉིད་ཉེ་ལོགས་སུ་ཕེབས་པ་གསན་ནས་མཇལ་བར་བྱོན། དམ་པའི་ཆོས་ཟབ་ཅིང་རྒྱ་ཆེ་བའི་འབེལ་མཆིད་མཛད་པས། ལས་སད་ཅིང་དགྱེས་པ་ཉིད་དུ་གྱུར། དེ་ནས་གཙང་གཞུང་རྒྱ་མ་ཁ་ལ་སོགས་པར་རྣལ་འབྱོར་གྱི་སྤྱོད་པ་བསྐྱང་ཞིང་ཟླ་ཤས་རེ་བཞུགས་སོ། ། དགུང་ལོ་ཉེར་གསུམ་ལོན་པའི་ཚེ། སེམས་ལ་དབང་ཐོབ་པའི་གདམས་པ་དང་། 
3-15
དེ་སྟོན་པའི་དགེ་བའི་བཤེས་གཉེན་ཞིག་བཙལ་བར་བྱའོ་སྙམ་དུ་དགོངས་ཏེ། ཐོག་མར་ཉིད་དབུས་ཕྱོགས་ལ་ཐེགས་པར་བཞེད་པ་ན། རྩ་ལག་དག་གིས་བཟློག་ཀྱང་མ་ཉན་པས། ཅིའི་ཕྱིར་འབྱོན་མཁས་པར་གྱུར་ཟིན་ན་ཞེས་སྨྲ་བ་དག་ལ། སྔར་ཤེས་པའི་ཆོས་ཀྱང་ངོ་མཚར་ཆེ་བར་བྱུང་མོད། ད་དུང་སྒྲོ་འདོགས་ཀུན་གཅོད་དུ་འགྲོ་ཞེས་པའི་ལན་བཏབ་བོ། །འོ་ན་གང་དུ་གཤེགས་ཞུས་པས། བལྟ་ཞིང་བྱེད་གསུངས་ནས་དོན་མཐུན་གྱི་གྲོགས་འགའ་ཞིག་དང་ཐབས་གཅིག་པར་གཤེགས་ཏེ། ར་ས་འཕྲུལ་སྣང་གི་གཙུག་ལག་ཁང་ཆེན་པོར་ཕེབས་པར་གྱུར་ཏོ། །དེར་འཇིག་རྟེན་ཀུན་གྱི་སྐྱབས་གཅིག་པུ་སྟོན་པའི་རྒྱལ་ཚབ་དམ་པ། ཕན་བདེ་མ་ལུས་པ་སྩོལ་བའི་མགོན་པོ། རྣམ་མང་སྲིད་པའི་ཡོན་གནས་ཆེན་པོར་གྱུར་པ། ཇོ་བོ་ཤཱཀྱ་མུ་ནེ་དང་བཅུ་གཅིག་ཞལ་མཇལ་ཞིང་། རང་གཞན་གྱི་དོན་རྒྱ་ཆེན་པོ་འགྲུབ་པའི་སྨོན་ལམ་ཡང་བགྱིས་ཏེ། དཔལ་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་ཆེན་པོར་བྱོན། དེའི་གནས་ཀྱི་སློབ་དཔོན་དེ་གྲུབ་ཐོབ་ཆེན་པོའི་སློབ་མར་འདུག་པས། རྗེའི་རྣམ་པར་ཐར་པ་ངོ་མཚར་བའི་ལོ་རྒྱུས་དེས་བསྙད་པ་དང་། དད་པའི་སྤུ་ལོང་ཆེས་ཆེར་གཡོས། ཡིད་གདུང་བའི་མཆི་མ་འཁྲུག་ཅིང་། མཇལ་འདོད་པ་མ་བུ་གཅིག་ལ་བརྩེ་བ་ལྟར་གྱུར་ཏོ། །དེ་ནས་རྗེ་བཙུན་དམ་པའི་སྣང་བ་འབའ་ཞིག་གིས་དུས་འདས་ཏེ། 
3-16
ཐུགས་ལའང་སེམས་པར་མཛད། དེའི་ཚེ་རྗེ་གྲུབ་ཐོབ་ཆེན་པོ་ག་ན་བཞུགས་ཞེས་དྲིས་པས། སྣ་ཕུ་ན་བཞུགས་སོ་ཞེས་ཐོས། དེ་ཐོས་པ་དང་བསམ་གཏན་ལ་གནས་པ་ལྟར་དགའ་བ་དང་བདེ་བས་ལུས་སེམས་ཀུན་གཏམས། དེ་ནས་སྣ་ཕུ་ཆོས་ལུང་དུ་འབྱོན་པར་ཆས་པ་དང་། བདུད་སྡིག་ཏོ་ཅན་འདི་སྙམ་དུ་སེམས་ཏེ། སྐྱེས་བུ་དེ་དགེ་བའི་བཤེས་གཉེན་དེ་ལ་བརྟེན་ན་བདག་གི་ཡུལ་སྟོངས་པར་བྱེད་ཀྱི། དེ་ལས་ཐོག་མར་བར་དུ་གཅད་དོ་སྙམ་ནས་ཤུལ་ལམ་དུ་སྔར་གྱི་གནས་ཀྱི་སློབ་དཔོན་གྱི་ཆ་བྱད་དུ་བྱས་ཏེ་འདུག་གོ། །ཕྱོགས་དེར་ཕེབས་པའི་ཚེ། དེ་ན་རེ། སྔར་སྨྲས་པ་ནི་བརྫུན་ཡིན་གྱི། དེ་མི་དགེ་བའི་བཤེས་གཉེན་ཡིན་པས་འགྲོ་བར་མ་བྱེད་ཅིག་ཅེས་སྨྲས་པ་གསན། དེ་འདོད་པའི་དབང་ཕྱུག་ཏུ་རིག་ནས་བདུད་འཇོམས་པའི་གཏམ་གྱིས་ཚར་བཅད་པས་དེ་ཉིད་དུ་མི་སྣང་བར་གྱུར་ཏོ། ། དེ་ནས་རྗེ་དང་མཇལ་བས་མི་བསྐྱུད་པའི་དད་པ་ལྷག་པར་རྙེད་དེ། དགེ་བའི་བཤེས་གཉེན་ཆེན་པོ་མཐོང་བ་འདི་ནི། བདག་གིས་རྙེད་པའི་མཆོག་ལེགས་པར་རྙེད་དོ་སྙམ་མཆོག་ཏུ་དགའ་བ་ཐོབ་ཅིང་། དབུ་མ་ལུགས་ཀྱི་སེམས་བསྐྱེད་ཀྱི་སྡོམ་པའང་བླངས། ཡེ་ཤེས་རྡོ་རྗེར་མཚན་གསོལ། དེ་ནས་སློབ་དཔོན་ནག་པོ་པའི་ལུགས་བདེ་མཆོག་ལྷ་དྲུག་ཅུ་རྩ་གཉིས་དང་། མངའ་བདག་རྒྱལ་བ་མཻ་ཏྲི་པའི་ལུགས་འཁོར་ལོ་སྡོམ་པ་ལྷ་བཅུ་གསུམ་མའི་དབང་བཞི་ཡོངས་སུ་རྫོགས་པར་གསན། 
3-17
སྟ་གོན་གྱི་ནུབ་རྨི་ལམ་ན། མི་མང་པོས་ཀ་པཱ་ལ་འཆི་མེད་ཀྱིས་བཀང་ནས། བྲག་འཕྲང་ཞིག་ལ་འགྲོ་བར་རྩོམ་པ་ལ། ཐམས་ཅད་ཀྱི་མ་ཐར་བར་ཐོགས་ཏེ་འདུག་གོ། །ཁོ་བོས་ཁྱེར་གྱི་བྱས་གསེར་ཞུན་མ་གཞོང་པ་གང་གི་སྟེང་དུ་བཞག་པ་བསྣམས་ཏེ་བྱོན་པས། བགྲོད་དུ་ཉེ་བ་དང་མནལ་སད་དོ། །དེ་རྗེ་ལ་ཞུས་པས། རྨི་ལམ་བཟང་གཏོར་མ་ཞིག་ཁྱེར་ཡོང་དགོས་པར་འདུག་གསུང་། མཆོད་གཡོག་པ་བྲེལ་ནས་དེ་འབུལ་བ་བརྗེད་པས། སྐུ་ཚེའི་རྟེན་འབྲེལ་ཅུང་ཟད་འཆུགས་གསུང་ངོ་། །དེ་ནས་དཔལ་ནཱ་རོ་པ་ཆེན་པོའི་ཞབས་ཀྱི་གསུང་ངག །རྒྱུད་སྡེ་ཐམས་ཅད་ཀྱི་སྙིང་པོ་མཐར་ཐུག་པ། གདུལ་བྱ་དབང་རྣོན་ངེས་པ་དང་བྲལ་བ་རྣམས་འཁོར་བ་ལས་བསྒྲལ་ཏེ། ཡེ་ཤེས་ཀྱི་སར་ཚེ་འདི་ཉིད་ལ་འཇོག་པའི་མན་ངག་བསྲེ་འཕོའི་ཁྲིད་ཞུས་ཏེ། རྩོལ་བ་ཆེན་པོས་ཞག་བདུན་ན་རས་ཐུབ་པ་བྱུང་ཞིང་། མྱུར་དུ་ཏིང་ངེ་འཛིན་དཔག་ཏུ་མེད་པ་སྐྱེས་པར་གྱུར་པས། རྗེ་ཡང་ཤིན་ཏུ་དགྱེས་པར་གྱུར་ཏོ། །དེ་དུས་རྗེ་གྲུབ་ཐོབ་ཆེན་པོ་འཕྲང་པོ་ཞོ་རར་དགེ་བཤེས་ཇོ་དར་གྱིས་སྤྱན་དྲངས། ཆོས་ཀྱི་འཁོར་ལོ་བསྐོར་བའི་སྐབས་སུ། དམ་པ་རྡོ་རྗེ་ཚེར་མའི་སྙུན་དྲག་པོས་ཟིན་ནས་བཞུགས་པ་ན། དཔལ་ལྡན་བླ་མ་དམ་པར་སྟོན་པ་རྡོ་རྗེ་རྒྱལ་མཚན་གྱིས། 
3-18
རྒྱ་སྟོན་གྱི་འབྲུམ་ནག་འདི་གྲོགས་གཞན་ལ་འགོས་དོགས་པས། ཟངས་རྡོ་ཕུག་ཏུ་སྐྱེལ་དགོས་ཞེས་གསོལ་ཏོ། །དེར་རྗེ་བཙུན་ཆེན་པོས་ཁྱེད་རྣམས་ཀྱིས་ཆོས་ཤོད། ངེད་མི་གཙང་བ་རྣམས་སྣ་ཕུར་འགྲོ། རྒྱ་སྟོན་གྱི་ནད་གཡོག་ཁོ་བོ་རང་གིས་བྱེད་གསུངས། ཐུགས་བརྩེ་བ་ཆེན་པོས་སྐྱོང་བར་མཛད། ཉིད་ནི་དབྱུག་བཅོས་ཉམས་སུ་ལེན་པ་ཡིན་པས་བསྐྱལ་ཡང་མི་དགའ་བ་མེད་དོ་སྙམ་དུ་དགོངས་སོ། །ལས་ཀྱི་རྣམ་པར་སྨིན་པ་བྱང་བས་འབྲུམ་ནག་གི་སྙུན་དྭངས་པར་མངོན་དུ་ཕྱོགས་པའི་ཚེ། རྗེས་ཁྱོད་སྣ་ཕུར་སོང་། སྒོམ་པ་རིན་རྡོར་གྱིས་གཡོག་བྱེད་པར་ཡོད་ཅེས་གསུངས་ནས། རྟ་ཞིག་ལ་ཆིབས་ཏེ་བྱོན་ནས་བསྟི་གནས་སུ་སོན་པ་ན། དེས་བཀའ་ཚུལ་བཞིན་དུ་མ་བསྒྲུབས་པས། ངལ་བའི་རྣམ་པར་གྱུར་མོད། དེ་ལྟ་ནའང་ཁོང་ཁྲོ་བ་རིང་ནས་སྤངས་པ་ཞིག་ཡིན་པས། དེ་ལ་འདྲེན་པས་དྲག་པོས་སྤྱོས་པའང་བཟློག་པར་མཛད་དོ། ། དེ་ནས་སྙུན་གཞི་མེད་དུ་གྱུར་ནས་གདམས་པའི་ལྷག་མ་གསན་ཞིང་འདག་སྦྱར་མཛད་དེ་བསྐྱེད་རྫོགས་ཀྱི་ཏིང་ངེ་འཛིན་བསྒོམས་པས། ཡ་མ་ཟུང་གི་རྫུ་འཕྲུལ་འཕུར་བ་དང་། ས་ལ་འཛུལ་བ་དང་། ཉི་མའི་འོད་ཟེར་ལ་རས་གོས་འགེལ་བ་དང་། རླུང་ཕྱི་ནང་དུ་བསྲེ་བ། རྩིག་པ་དང་རི་བོ་ལ་ཐོགས་པ་མེད་པར་རྒྱུ་བ་དང་། ཆུ་ལ་མི་བྱིང་བ་དང་། 
3-19
ཉོན་མོངས་པའི་གཡུལ་ལས་རྒྱལ་བ་སོགས་ཡོན་ཏན་མཐའ་ཡས་པ་བྱུང་སྟེ། རྗེ་བཙུན་ལ་ཞུས་པས། བཤད་ཚོད་དང་མཐུན་པའི་ཡོན་ཏན་ཀུན་བྱུང་འདུག །རྗེ་བཙུན་མི་ལ་ལ་ཡང་བྱུང་བ་ཡིན། ངོ་མཚར་ཆེ་གསུང་། དེ་ནས་བསྒོམས་པས། སེམས་དང་ནམ་མཁའ་འདྲེས་ཏེ་དབྱེར་མི་ཕྱེད་པའི་ཏིང་ངེ་འཛིན་བྱུང་བ་དྲུང་དུ་ཞུས་པས། དེ་ཀུན་ཡང་ཡིན་ཏེ། ད་གཟོད་རྟོགས་པ་གཤའ་མ་ཞིག་འོང་གི་གསུང་། དེ་ནས་ཀྱང་སྒོམ་པ་ལ་ཆེར་འབད་པས། སྔར་གྱི་ཡོན་ཏན་དེ་ཀུན་ཤུན་པ་བཞིན་སོང་ནས། དེ་ཁོ་ན་ཉིད་མངོན་དུ་གྱུར་པའི་རྟོགས་པ་སྐྱེས་ཏེ། རྗེའི་སྤྱན་སྔར་གསོལ་བས། སེམས་རྟོགས་པ་བྱ་བ་དེ་ཡིན། ད་དུང་བརྩོན་འགྲུས་ཀྱིས་སྐྱོངས་ཤིག་ཅེས་ཡི་དམ་དུ་བྱས་ཏེ། ཉིན་དང་མཚན་ཀུན་ཏུ་བསམ་གཏན་ལ་གནས་པར་བྱས་སོ། །དེའི་སྐབས་ཤིག་ཏུ། གཙང་དུ་བྱོན་ཏེ་ལོངས་སྤྱོད་དུ་མ་བསྣམས་ནས་སྣ་ཕུར་ཕེབས། ཚོགས་པ་ལ་དགའ་སྟོན་རྒྱ་ཆེན་པོ་བགྱིས་ཤིང་། རྗེ་ལ་མགྱོགས་འགྲོ་ལུས་ལྡན་མ་གཅིག་གིས་གཙོས་པའི་འབུལ་བ་བྱས། ནག་པོ་པའི་ཆོས་དྲུག །མཻ་ཏྲི་པའི་སྒྲུབ་དཀྱིལ་རབ་གནས་སྦྱིན་སྲེག་གི་གཞུང་འགྲེལ། དགྱེས་རྡོར་གྱི་དབང་སྒྲུབ་ཐབས། རྭ་ལོ་ཙཱ་བ་ནས་བརྒྱུད་པའི་རྡོ་རྗེ་འཇིགས་བྱེད་ཀྱི་ཆོས་སྐོར། སློབ་དཔོན་ཆེན་པོ་ལས་ཀྱི་རྡོ་རྗེའི་ལུགས་ཀྱི་ཕྱག་ན་རྡོ་རྗེ་ལྷ་ཉེར་ལྔ་མ་དང་། 
3-20
བཅུ་གསུམ་མའི་དབང་བཞི་རྫོགས། གསང་བ་བསྟན་པའི་རྒྱུད་ཀྱི་བཤད་པ། སྒྲུབ་དཀྱིལ་རབ་གནས་སྦྱིན་སྲེག་ལ་སོགས་པ། ཞི་རྒྱས་དབང་དྲག་གི་ལས་སྒྲུབ་པའི་ཐབས་རྣམས་དང་། ཤ་བ་རིའི་ལུགས་ཀྱི་ཕག་མོ་ལྷན་ཅིག་སྐྱེས་མ་ཞལ་གཉིས་མའི་བྱིན་རླབས་དང་། སྒྲུབ་པའི་ཐབས་གྲུབ་པ་སྡེ་བདུན། སྙིང་པོ་སྐོར་དྲུག །ཡིད་ལ་མི་བྱེད་པའི་ཆོས་སྐོར་ཉེར་ལྔ་རྣམས་དང་། རྟོགས་བརྗོད་གསེར་གྱི་ཕྲེང་བ། དམངས་དོ་ཧ་དང་། དེའི་ཊཱི་ཀ་རྗེ་ཉིད་ཀྱིས་མཛད་པ། བསམ་གཏན་ཐུན་འཇོག །བསམ་མི་ཁྱབ་ཐོགས་བབས་ལ་སོགས་པ་ཕྱག་རྒྱ་ཆེན་པོའི་ཆོས་སྐོར་ཀུན་གསན་ཏོ། །དེ་ནས་དཔལ་འཁོར་ལོ་སྡོམ་པ་རྩ་བའི་རྒྱུད་ཉུང་ངུ་དང་། བརྟག་གཉིས། མཚན་ཡང་དག་པར་བརྗོད་པ་རྣམས་ཀྱི་འགྲེལ་བཤད། གྲུབ་པའི་དབང་ཕྱུག་ཉིད་ཀྱིས་མཛད་པ་རྣམས་གསན་ཞིང་སྦྱངས་སོ། ། གཞན་ཡང་རྗེ་བཙུན་རས་ཆུང་པའི་ཕྱོགས་ནས་བརྒྱུད་པ་དང་། ཕྱག་རྒྱ་ཆེན་པོ་ལ་སོགས་པ་རྗེ་དྭགས་པོ་ནས་བརྒྱུད་པ་དང་། མགོན་པོ་མངོན་བྱུང་གི་རྒྱུད་ཀྱི་བཤད་པ་སོགས་དང་སྤྱོད་འཇུག་ཀྱང་གསན་ཏོ། །མདོར་ན་གསང་སྔགས་ཀྱི་རྒྱུད་བཤད་བསྐྱེད་རྫོགས་ཀྱི་མན་ངག་མ་ལུས་པ་གསན། དེའི་ཚེ་ཀློག་སྟོན་དང་། དར་རྡོར་ལ་སོགས་པའི་གྲོགས་མཆེད་ཤེས་རབ་ཅན་དུ་གྲགས་པ་རྣམས་དང་། གཞན་ཡང་རིག་གནས་ལ་མཁས་ཤིང་དྲེགས་པའི་སྟོན་པ་འགའ་རྩོད་པས་ཕམ་པར་བྱས་པའི་ཚེ། 
3-21
ཕྱོགས་ཀུན་ཏུ་བློ་གྲོས་ཀྱི་ནོར་གྱིས་ཕྱུག་པའི་གྲགས་པས་ཁྱབ་བོ། །དེའི་ཚེ་ཚོགས་གྲལ་ཞིག་ཏུ། རྗེ་གྲུབ་ཐོབ་ཆེན་པོ་རྒྱལ་བའི་ཡུམ་ཡེ་ཤེས་ཀྱི་མཁའ་འགྲོའི་བྱིན་གྱིས་བརླབས་པ་ཐོབ་སྟེ། བཀའ་འགྱུར་རོ་ཅོག་ཐུགས་སུ་ཆུད་ཅིང་། ཞལ་འདོན་དུ་མཛད་པས་དབྱིག་གི་རྩ་ལག་གཉིས་པ་ལྟ་བུ། བཤད་པའི་གྲྭ་ཆེན་པོ་དག་གི་སྨྲ་བའི་སེངྒེ་རྣམས། ཉིད་ཀྱི་དགོངས་འགྲེལ་གྱི་བསྟན་བཅོས་མཛད་པ་ལ་སྨྲེ་བ་གསན་པས། དེའི་འདུན་སར་བྱོན་ཏེ། ལུང་རིགས་ཀྱི་རྩོད་པས་དེ་དག་ཕམ་པར་བྱས་པས། མངོན་པར་ང་རྒྱལ་བ་སྐྱེས་ཏེ། གླེགས་བམ་གྱི་ཆ་བྱད་དུ་བྱས། དགེ་འདུན་གྱི་མདུན་ལོགས་ལོ་ཧི་ཏའི་ཆུ་བོ་ཆེན་པོའི་འགྲམ་གྱི་སྟེང་གི་ནམ་མཁར་མངོན་པར་འཕགས་ནས། རྒྱལ་བའི་ཚིག་རྡོ་རྗེའི་གླུར་བགྱིས་པ་ན། ཡང་དག་པར་རྫོགས་པའི་སངས་རྒྱས་ཉིད་བྱོན་ནས། ཁྱོད་ང་རྒྱལ་བར་མ་བྱེད། འདི་ལས་ནི་ཉེས་པ་ཀུན་འཕེལ་བར་འགྱུར་རོ། །ང་ལྟ་བུའི་ཡོན་ཏན་རྒྱ་མཚོའི་དབང་ཕྱུག་དག་ཀྱང་མཐར་མྱ་ངན་ལས་འདས་པའི་ཆོས་ཅན་ལས་མ་འདས་སོ་ཞེས་གསུང་ཞིང་། དེའི་ཚུལ་སྟོན་པ་གཟིགས་མ་ཐག་ཏུ་རྫུ་འཕྲུལ་ཡང་བརྟུལ། ཉོན་མོངས་པ་དེ་གཉེན་པོས་འཇོམས་པར་མཛད་པ། མཆོག་དང་ཐུན་མོང་གི་དངོས་གྲུབ་མ་ལུས་པ་བརྙེས་པ་དེའི་ཞལ་སྔ་ནས། ངས་དམ་བཅའ་ཞིག་བྱ་ཡི། 
3-22
ཁྱོད་ཀྱིས་བགྲོ་གླེང་ཞིག་ཐོང་གསུངས་པས། དེ་མི་མཆི་བླ་མ་ལ་ཐལ་འགྱུར་ཕོག་ན་མི་རུང་ཞུས་པས། གནང་བ་སྦྱིན་པ་ཡིན་མོད་གསུང་། འོ་ན་ཆོས་སྐུའི་མཚན་ཉིད་ཅིག་འཇོག་པ་ཞུ་ཞུས་པས། སྐྱེ་འགག་གནས་གསུམ་དང་བྲལ་བ་ཡིན་གསུང་། ནམ་མཁའ་ཡང་ཆོས་སྐུར་ཐལ་ལོ་ཞུས་པས། ལན་གནང་བའི་ས་མེད་ནས་མཉེས་པ་དེས་གྲགས་པའང་ཆེས་ཆེ་བར་གྱུར་པས། ལུང་རིགས་སྨྲ་བ་ཕལ་གྱིས་རྒོལ་མི་ནུས་པར་གྱུར་ཏོ། །དེ་ནས་སྐབས་ཤིག་ཏུ། སེམས་ལ་ཤར་བའི་དབྱངས་ཤིག་ལོང་དང་གསུངས་པས། མགུར་ལ་སྔ་བ་ཞེ་བཅད་དགུ་མ་འདི་བཞེངས་སོ། །ན་མོ་རིན་པོ་ཆེ། བདག་མཆིས་ཀྱི་རྣལ་འབྱོར་རྒྱ་རས་འདི། །རྒྱལ་ཁམས་ཕྱོགས་མེད་བསྐོར་ལགས་པས། །གཞན་སྐྱོན་མཐོང་བས་རང་སྐྱོན་ཚོར། །རང་སྐྱོན་སྒོ་རུ་མི་འདོན་རི། །ཞེས་པ་ལ་སོགས་པ་ཕུལ་བས། དགྱེས་ཏེ་ཁྱོད་འགྲོ་དོན་རྒྱ་ཆེན་པོ་འགྲུབ་པ་ཞིག་འོང་གསུང་བ་དང་། སྐབས་ཤིག་ཏུ་ཐམས་ཅད་གཟིགས་པ་དེས། ཁྱེད་རྣམས་ཀྱིས་རྒྱ་སྟོན་ལ་མ་འགྲན། འདི་བསྐལ་བཟང་གི་སངས་རྒྱས་མོས་པ་ཡིན་པས། ཞེས་པས་མཛད་པ་མཐར་འདོན་གྱི་རྒྱལ་བར་འགྱུར་བའི་ལུང་བསྟན་ཐོབ། དེར་མཆོད་ཁང་བརྩིགས་པའི་ཚེ། གྲྭ་པ་ཕྱོགས་སུ་འགྲོ་བ་དང་། མཚམས་སྤྱོད་པ་ལ་གསེར་ཞོ་རེའི་ཆད་པ་འདུག་པ་ཕུལ་ནས་ཡིག་མཚམས་བྱེད་པར་ཞུས་པས། 
3-23
ཁྱེད་རང་སླེའུ་ཆུང་དུ་སོང་ལ་གྱིས་གསུངས། དེར་ཐུགས་བསམ་ལ། བླ་མ་མ་མཉེས་ན་གདམས་ངག་གིས་ཅི་བྱེད། ང་འདྲ་འོང་བ་བྱས། བླ་མའི་སྤྱན་སྔར་བུ་རམ་སྡེར་མ་གང་ཁྱེར་ནས་བཤགས་པ་ཕུལ་བས། ཆོས་གོ་བ་བྱ་བ་དེ་ཙུག་འོང་བ་ཡིན་གསུངས་ནས་མཉེས། དེ་ནས་ཟླ་བ་ལྔར་ལས་བྱས་པས་ཐུགས་དམ་ལ་བོགས་ཐོན། མཆོད་ཁང་ཚར་བ་དང་། གདམས་ངག་རྫོགས་པར་ཞུས། རྗེའི་བསྟན་བཅོས་ཚང་མ་ཡི་གེར་བཀོད་ནས། གཞུང་སྤྲེའུ་ཞིང་དུ་བྱོན། མཆོག་གི་དོན་གཟིགས་ཤིང་། རྒྱུད་སྡེ་རྒྱ་མཚོའི་ཕ་རོལ་སོན་པའི་རྡོ་རྗེ་འཛིན་པ་ཆེན་པོ་རྔོག་རིན་པོ་ཆེ་ཀུན་དགའ་དང་རྡོ་རྗེ་སེངྒེ་གཉིས་ལས། དགྱེས་པའི་རྡོ་རྗེ། བདག་མེད་མ། མ་ཧཱ་མཱ་ཡཱ། རྡོ་རྗེ་གདན་བཞི། འཇམ་དཔལ་གསང་ལྡན་ལ་སོགས་པའི་དབང་གསན་ཞིང་། རྩ་བཤད་ཆ་མཐུན་གྱི་རྒྱུད་བརྟག་པ་གཉིས་པ་དང་། བཤད་པའི་རྒྱུད་ཐུན་མོང་མ་ཡིན་པ་གུར་དང་། བཤད་རྒྱུད་ཐུན་མོང་བ་སམྦུ་ཊི། མ་ཧཱ་མཱ་ཡཱའི་རྒྱུད། རྡོ་རྗེ་གདན་བཞི། སློབ་དཔོན་སྒེག་པའི་རྡོ་རྗེའི་ལུགས་ཀྱི་མཚན་བརྗོད་ཀྱི་བཤད་པ་གསན་པས། ལན་གཅིག་གིས་ཐུགས་སུ་ཆུད། དཀའ་བའི་གནས་རྣམས་ཟུར་གྱིས་རྟོགས་པས་ནཱ་རོ་པཎ་ཆེན་གྱི་སྤྲུལ་པའོ་ཞེས་གྲགས་སོ། །དཀྱིལ་འཁོར་བདུན་གྱི་སྒྲུབ་དཀྱིལ། རྣམ་བཤད། རབ་གནས། སྦྱིན་སྲེག །ལས་ཚོགས་ཕྲན་བུ་དང་བཅས་པ། 
3-24
དགྱེས་རྡོར་གྱི་རྫོགས་རིམ་བསྲེ་འཕོ། མ་ཧཱ་མཱ་ཡཱའི་རྫོགས་རིམ་དབྱིབས་རྣལ་འབྱོར་གསུམ་ལ་སོགས་པ་ཟབ་ཆོས་ཀྱི་སྐོར། གུར་ལེའུ་བཅོ་ལྔ་པ་ནས་བཤད་པའི་མགོན་པོ་ཕྱག་གཉིས་པ་དང་། དཔལ་ལྷ་མོའི་རྒྱུད། ནཱ་རོ་པའི་རྒྱ་གཞུང་ལས་བཞིའི་སྒྲབ་ཐབས་སྐོར་རྣམས་གསན་ཞིང་། བསྐྱེད་རྫོགས་ཀྱི་ཕྱག་ལེན་འཁྲུལ་པ་མེད་པར་ལོབས། ངེས་པ་མ་ལུས་པ་ཁོང་དུ་ཆུད་པར་གྱུར་ཏེ། སླར་སྣ་ཕུར་བྱོན། རྗེའི་ཚོགས་པ་སྐྱོང་བའི་གྲོགས་མཛད་ཅིང་རེ་ཞིག་བཞུགས་སོ། ། དེ་ལྟར་རྗེ་བཙུན་གྱི་དྲུང་དང་གཞུང་སྦྲགས་པར་ལོ་ངོ་དྲུག །རིལ་པོ་ལྔ་ལྷག་པ་ཞིག་བཞུགས་ནས། ས་ཕོ་སྤྲེའུའི་ལོ། དགུང་ལོ་ཉི་ཤུ་རྩ་བརྒྱད་སོན་པའི་དུས་སུ་སྒོམ་དུ་འགྲོ་བར་ཞུས་པས། མ་འགྲོ། ང་ཡི་སྣ་ཕུ་ཟུང་གསུང་པ་དང་། འབྲུག་དང་ར་ལུང་འཛིན་པའི་ལུང་བསྟན་སྩལ། དེ་ནས་ནན་གྱིས་ལྷོ་བྲག་མཁར་ཆུར་འགྲོ་བ་ཞུས་པས། རྗེའི་ཞལ་ནས། ཇོ་བོ་ནཱ་རོ་པས་སྡེ་སྣོད་ཐམས་ཅད་ཀྱི་སྦས་པའི་དོན་གཟིགས་ནས། གཞན་ལ་འདོམས་པ་རོ་སྙོམས་སྐོར་དྲུག་གི་མན་ངག །པཎྜི་ཏ་གཱ་ཡ་དྷ་རའི་སྲས་གནས་ལྔ་མཁྱེན་ཅིང་གྲུབ་པ་བརྙེས་པ། ཏི་ཕུ་གསང་སྔགས་སྡོང་པོ་ལ། རྗེ་རས་ཆུང་པས་རྫོགས་པར་གསན་པའི་མཐར། ཏི་ཕུའི་གསུང་ནས། སྤྱིར་རྒྱུད་སྡེ་འོ་མའི་རྒྱ་མཚོ་དང་འདྲ་བའི་ནང་ནས། 
3-25
གདམས་ངག་མར་གྱི་ཉིང་ཁུ་ལྟ་བུ་འདི་གབ་ནས་ཡོད། པཎྜི་ཏ་རྣམས་ཀྱི་ལོང་གཏམ་གྱི་ཚུལ་དུ་བཤད། གྲུབ་ཐོབ་རྣམས་ཀྱི་ཁོང་སྙིང་ལྟ་བུ། དུར་ཁྲོད་འགྲིམ་པའི་རྣལ་འབྱོར་པ་དག་གི་གོ་ཆ། ཀུ་ས་ལི་པའི་སྨན་སྦྱོར། རྗེ་ནཱ་རོ་པ་མིན་པའི་པཎྜི་ཏ་དང་རྣལ་འབྱོར་གྱི་དབང་ཕྱུག་ཀུ་ས་ལི་པ་གཞན་རྣམས་ལ་མེད་པས། ཁྱོད་ལས་འཕྲོ་དང་སྐལ་པར་ལྡན་པའི་སྣོད་ལྡན་གྱི་གང་ཟག་ཡིན་པས་བསྟན་པ་ཡིན། ཁྱོད་ཀྱི་ད་ལྟ་བསྟན་པའི་དུས་མིན་པས། བོད་ཡུལ་གྱི་བྲག་འཇིགས་སུ་རུང་བ་ཁྲོ་བོའི་ཆ་བྱད་འདྲ་བ། མཁའ་འགྲོ་འདུ་བའི་གནས་ཤིག་ཏུ་མཁའ་འགྲོ་དང་ལྷ་འདྲེ་ཐམས་ཅད་ལ་གཏད་གཉེར་གྱིས་ལ། མི་རབས་གསུམ་གྱི་འོག་ཏུ་སྣོད་དང་ལྡན་པའི་གང་ཟག་ལེན་དུ་འོང་བས། དེའི་ལག་ཏུ་གཏོད་ཅིག་གྱིས་ལ། སྨོན་ལམ་རྒྱ་ཆེན་པོ་ཐོབ་ལ་གཏེར་དུ་སྦོས་ཞེས་བཀའ་རྒྱས་བཏབ་བོ། །རྗེ་རས་ཆུང་པས། བླ་མའི་གསུང་རྒྱལ་པོའི་བཀའ་ལྟ་བུ་བཅག་ཐབས་མེད་པས། འཛམ་གླིང་བསྐོར་ཀྱང་མི་རྙེད་པའི་གདམས་ངག་ཤིན་ཏུ་ཕངས་ཏེ་གསུང་བཞིན་དུ་བགྱིའོ། །ཞེས་ཞལ་གྱིས་བཞེས་ཏེ། ལྷོ་བྲག་མཁར་ཆུ་དེ་ཝི་ཀོ་ཊིར་ཡང་སྨྲ་བར་གཏེར་དུ་སྦས་ཏེ། མི་རབས་གསུམ་གྱི་འོག་རོལ་ཏུ། །སྐལ་ལྡན་ནམ་མཁའི་གོས་ཅན་དང་། །སྙིང་རྗེའི་མེ་ཏོག་ཐོད་ཅན་ལ། །
3-26
གདམས་ངག་མར་གྱི་ཡང་སྙིང་སྦྱིན། །དེ་ཡི་ཆོས་སྐྱོང་སྲུང་མ་གྱིས། །འཁོར་དང་ལོངས་སྤྱོད་མང་པོར་སྤེལ། །ཞེས་གསུངས་པའི་མི་རབས་གསུམ་ཡང་ཐེམས་པས་ཁྱོད་ཀྱིས་ཐོན་གསུངས་ཏེ། དེའི་ཁ་བྱང་། དཀོན་མཆོག་གསུམ་ལ་ཕྱག་འཚལ་ལོ། །བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་མཆི། བརྒྱུད་པའི་བླ་མ་རྣམས་ཀྱིས་བྱིན་གྱིས་རློབས། ནཱ་རོ་པཎ་ཆེན་གྱི་ཐུགས་ལ་ཤར་བ། རྟོག་པ་ལམ་ཁྱེར་ཞེས་བྱ་བའི་ནད་འདོན་ངོ་མཚར་ཅན་ཞིག་དང་། ངན་སྔགས་སྲོག་གི་སྤུ་གྲི་གཉིས། མོན་བོད་གཉིས་ཀྱི་སོ་མཚམས། ལྷོ་བྲག་མཁར་ཆུ་ཞེས་གྲགས་པ། གྲུབ་ཐོབ་ནམ་མཁའི་སྙིང་པོའི་ཞབས་རྗེས་ཀྱི་བྱང་ཤར་མཚམས། བྲག་རྒན་མོ་འཛུམ་ཤོར་བ་འདྲ་བའི་ནང་ན་སྦས་ནས་ཡོད་པས། སློབ་མ་སྙིང་དང་འདྲ་བ་ལ་འདི་རིམ་པས་གཏོད་ལ། མི་རབས་གསུམ་ཚུན་ཆད་ངའི་བླ་མའི་བཀའ་རྒྱ་ཡོད་པས་མ་འདོན་ཅིག །བཏོན་ན་དམ་ཚིག་ཉམས་སོ། ། དེ་ནས་བླ་མའི་བྱིན་རླབས་ཀྱིས་ལས་ཅན་ཞིག་དང་ནམ་ཡང་འཕྲད། ཕན་ཐོགས་ཤིན་ཏུ་ཆེ་བར་འོང་གི་ཞེས་པ། རྗེ་བཙུན་གྱི་ཕྱག་བྲིས་མ། དེ་ཉིད་ཀྱིས་སུམ་པ་ལ་གཏད། སུམ་པས་ཉིད་ལ་གནང་བའང་སྩལ་ཞིང་། ཏི་ཕུས་མཛད་པ་ལ་སོགས་པའི་རོ་སྙོམས་ཀྱི་གཞུང་ཐོར་བུ་དང་། ཞལ་གདམས་ཕྲན་བུའང་གནང་ངོ་། །དེར་བླ་མ་ལ་ཕྱག་བགྱིས་ཏེ་བྱོན། 
3-27
བླ་མ་རྔོག་པ་རྡོ་རྗེ་སེང་གེ་ཆོས་འཁོར་མཛད་པའི་འཁོར་དུ་རེ་ཞིག་བསྡད་ནས། དེ་ཐོན་པ་དང་མཁར་ཆུར་འབྱོན་པར་ཆས་ཏེ། དོལ་གྱི་གསེར་སྟེངས་སུ་རྩམ་པའི་བསོད་སྙོམས་མཛད་པའི་ཚེ། རྗེ་བཙུན་གླིང་གཤེགས་པས། ཐུགས་མྱ་ངན་གྱི་འདམ་དུ་བྱིང་། འགྲོ་བ་འདྲེན་པའི་ཉི་མ་མཆོག་དེ་ཡོངས་སུ་ནུབ། ཅི་བདག་ཅག་མཐའ་ཡས་པའི་མགོན་དང་དཔུང་གཉེན་མེད་པར་གྱུར་ཏོ་ཞེས་སྨྲེ་སྔགས་འདོན་ཞིང་། སེམས་སྐྱོ་ཤས་དྲག་པོའི་སྒོ་ནས་སྣ་ཕུར་བྱོན། དགོངས་པ་རྫོགས་ཐབས་བསྒྲུབས། གདུང་རྟེན་བཞེངས། རྗེའི་གདུང་ཁང་མ་དང་རབ་གནས་ཀྱི་མགུར་གསུངས། རྗེའི་ཆོས་འཕྲོ་རྣམས་ཚར་བར་མཛད། ལོ་གྲོ་བ་ཡེ་མགོན་ལ་སོགས་པ་བཞི་ཁྲིད། གཙང་ར་ལུང་དུ་བྱོན། རྟ་ཞིག་གིས་གཙོས་པའི་མཁོ་དགུའི་ཡོ་བྱད་ཇི་སྙེད་པ་བསྣམས་ནས་སྣ་ཕུར་བྱོན། ཨ་མ་ཇོ་མོ་ལ་ཕུལ་ཏེ། དགུན་དུ་སོང་ནས་བྱར་སྒོམ་དང་ཤེར་ཡེས་ལ་སོགས་པའི་ཞབས་འབྲིང་བ་དྲུག་དང་ལྷན་ཅིག་མཁར་ཆུར་བྱོན་ཏོ། །དེར་འཚོ་བས་ཕོངས། ལྷགས་པས་མནར་བས་ལུས་ཀྱི་མདངས་ཀྱང་ཤོར། ཡུལ་མི་རྣམས་ཀྱི་འདྲེ་མོ་སྤུན་བདུན་ཞེས་པའི་མིང་གིས་འབོད། དེར་འཁོར་རྣམས་ན་རེ། དགེ་སྦྱོར་གང་སྐྱིད་དུ་བྱས་པས་ཆོག །འདིར་འོ་བརྒྱལ་བ་ལས་ཅི་བྱེད་ཟེར་བ་ལ། ཁྱེད་རང་ཚོ་སྐྱིད་སར་ལོག །ང་འདིར་སྡོད་པ་ཡིན་ཅེས་བརྩོན་འགྲུས་བསྐྱེད་ནས་ལོ་གསུམ་འདག་སྦྱར་བྱས་ནས་བསྒོམས། 
3-28
ཇོ་བོ་ཀུན་དགའ་སྒྲ་ཞེས་པ་ཞིག་གིས་འཚོ་བའི་སྦྱིན་བདག་བྱས། ཕྱེ་བྲེ་གསུམ་གྱིས་ཟླ་རེའི་འཚོ་བ་མཛད་ཅིང་བཞུགས། འཁོར་རྣམས་ཀྱིས་མ་ནུས་པར་ལོག་གོ། །རྗེ་ལའང་རེ་ཞིག་ནས་སྙུན་དྲག་པོ་ཞིག་གིས་ཟིན། ཆེས་ཆེར་མཉེལ་བར་གྱུར་ཅིང་། དེའི་སྐབས་སུ་ཕྱི་ནང་གི་བར་ཆད་ཐམས་ཅད་འཛོམ། ཇི་ལྟར་བྱས་ཀྱང་བདེ་བ་ནི་མ་བྱུང་། གཞན་དག་གིས་བལྟས་པ་ན་སྐྱིད་སྐྱིད་འདྲ་མོར་བྱེད། ཆོ་འཕྲུལ་ནི་ལྷག་པར་ཆེ། འཆི་ལྟས་ལ་སོགས་པའི་ལྟས་ངན་པ་ཀུན་ནི་ཤར། ཁྱོད་ཇི་ཙུག་འདུག་ཟེར་དྲི་མཁན་ནི་མེད། ང་མ་བདེ་ཟེར་བཤད་ས་ནི་བྲལ། ཤིན་ཏུ་སྡུག་པའི་ཁུར་གྱིས་ལྕི་བར་གྱུར་པའི་ཚེ། འཕྲོག་བྱེད་ཀྱི་ཡན་ལག་བཞིའི་དཔུང་། གནོད་སྦྱིན། གྲུལ་བུམ་དང་ལྟོ་འཕྱེ་ཆེན་པོ། ཤ་ཟ་དང་། ཡི་དྭགས་དང་། སྲིན་པོ་དང་། གཤིན་རྗེ་དང་། ཀླུ་དང་། ལྷ་མ་ཡིན་དང་། དྲི་ཟ་དང་། མིའམ་ཅི་སྟེ་འཇིགས་པར་བྱེད་པ་དྲག་པོའི་གཟུགས།མཐོང་ན་སྐྱི་ཟིང་བྱེད་པ་དཔག་ཏུ་མེད་པ་རབ་ཏུ་འདུས་ཏེ་འཇིགས་པའི་སྒྲ་ཆེར་སྒྲོག །རྣོ་བའི་མཚོན་ཆའི་ཚོགས་ཡོངས་སུ་འཕེན་ནས་རིའི་དབང་པོའང་ཕང་དུ་བཏེག་ནས་བརྡེག་གོ། ། ཉི་མ་དང་ཟླ་བ་ལག་ཏུ་ཐོགས་ནས་བརྡབ་ཅིང་སྐར་མའི་འདུས་པའང་མངོན་པར་དཀྲུགས། ཁ་ནས་ཚ་བའི་མེ་དཔུང་གིས་རྒྱ་མཚོ་ཡང་སྐེམས་པར་སྟོན། 
3-29
དབང་པོའི་སྒོ་ཀུན་ནས་ཆུ་བོའི་རྒྱུན་ཕབ་པས་ས་འཛིན་རྒྱལ་པོའང་འགོང་བར་བྱས། སྣ་ཚོགས་པའི་ལུས་ལ་སྣ་ཚོགས་པའི་མགོ་ཅན་གྱིས་རྐན་སྒྲ་བརྡབས་པས་ལུས་ཅན་ཀུན་སྐྲག་པར་བྱེད་པ། ཉི་ཟླ་ཟ་བ། ཆུ་གཏེར་འཐུང་བ། གཅིག་གིས་གཅིག་ཟ། ཁ་གདངས་ཤིང་མཆེ་བ་གཙིགས་པ། མིག་ནས་གློག་འཁྱུག་པ། འཕྲུལ་གྱི་སྒྱོགས་ཀྱང་གཞལ་དུ་མེད་པར་བསྣུན་ཏོ། །དཔལ་ནག་པོ་ཆེན་པོ་དང་ལས་ཀྱི་མགོན་པོའང་དེ་དག་གི་དཔུང་གྲོགས་ལྟ་བུར་གཟིགས། དེ་དག་གི་གཙོ་བོ་ཐམས་ཅད་དུ་རྒྱུ་བ། ལག་པ་སྟོང་དང་ལྡན་པ་དེས། དྲག་པོའི་གདངས་ཀྱིས་འདི་སྐད་འཛེར་ཏོ། །རབ་འཇིགས་འཇིག་རྟེན་ཀུན་གྱི་བྱེད་པོ་ཡང་། །འདིར་ནི་དཔུང་གི་ཁོལ་པོར་གྱུར་ལ་ལྟོས། །སྲིད་པའི་དབང་བསྒྱུར་དག་ནི་མ་ལུས་པ། །མངོན་འདུས་གཟི་བྱིན་ཁྱོད་ཀྱིས་འགོངས་གྱུར་ཏམ། །རྟག་ཞིའི་ཚོགས་ཀྱང་རབ་ཏུ་འདར་བྱེད་ན། །ཁྱོད་ཀྱི་སྙིང་སྟོབས་ཕྱེ་མར་བརླག་བྱས་ཏེ། །དབང་པོའི་ཚོགས་ཀྱང་དུས་མཐའི་སྤྲིན་ཕུང་བཞིན། །ས་འདིར་གནས་པའི་གོ་སྐབས་མི་སྟེར་རོ། །ཞེས་སྨྲས་པ་གསན་པ་དང་། སྤོབས་པའི་མཛོད་དབྱེ་ནས་གསུངས་པ། ཨེ་མ་རྡུལ་ཕྲན་བསྐལ་པའི་འབྱུང་པོ་ཀུན་འདུས་ནས། །ཁྲོས་པའི་རྔམ་སྟབས་ཕྱོགས་བཅུར་བསྒྲགས་གྱུར་ཀྱང་། །ཁོ་བོའི་བ་སྤུ་ཉག་གཅིག་གཡོ་མིན་ན། །སྙིང་གི་མཚོན་ཆ་རྣོན་པོར་ག་ལ་འགྱུར། །ཞེས་པའི་ལན་གྱིས་དཔུང་གི་ཚོགས་མངོན་པར་ཞུམ་ནས་ཕན་ཚུན་དུ་བལྟ་ཞིང་འདུག་གོ། །
3-30
དེ་ནས་བདུད་ཀྱི་བུ་མོ་རབ་ཏུ་མཛེས་ཤིང་ལང་ཚོ་རྒྱས་པ། ནུ་འབུར་གྱི་ཟེའུ་འབྲུར་གསེར་གྱི་བུང་བ་འཁོར་བ། བིམ་པའི་མཆུ་ལ་ཨུཏྤ་ལའི་དྲི་བྲོ་བ། གཉེན་ལྕུག་གི་སྐེད་སྐབས་དང་ལྡན་ཞིང་ལུས་ཕྲ་བ། རིན་པོ་ཆེའི་རྒྱན་རྣམས་ཀྱིས་སྤྲས་ཤིང་སིལ་སིལ་གྱི་སྒྲ་སྒྲོག་པ། ཉ་བའི་དཀྱིལ་འཁོར་གྱི་མདངས་འཕྲོག་པའི་བཞིན་རས་ཅན། སྨིན་འཁྱོག་གི་གསེབ་ནས་འཛུམ་འཕྲེང་གི་འོད་ཀྱིས་འགྲོ་བའི་ཡིད་བསླུ་བར་བྱེད་པ་ཞིག །སད་པའི་ཆེད་དུ་བཏང་བ་དེས་སྨྲས་པ། བཞིན་ལེགས་པདྨའི་མཚོ་ནང་དུ། །རབ་མཛེས་བུང་བ་གཞོན་ནུ་ཡིས། །འདོད་པའི་སྦྲང་རྩི་རབ་བརྟེན་ན། །ཅི་སྟེ་སྐྱོད་བྱེད་དོན་ལྡན་འགྱུར། །འདབ་སྟོང་ལྡན་པའི་འཁྲི་ཤིང་རྩེར། །དགའ་བའི་མེ་ཏོག་གཡོ་བ་ནི། །འཆི་མེད་ན་ཆུང་ཡིད་འཕྲོག་གི། །མགྲིན་པའི་རྒྱན་དུ་ཅིས་མི་མཛེས། །ཞེས་ཟེར་བ་ལ། ཐུགས་གཡོ་བའི་དྲི་མ་ཅུང་ཟད་ཀྱང་མེད་པར་ལན་སྩལ་བ། ཡིད་འཕྲོག་གཞོན་ནུའི་རྩེད་འཇོ་དང་། །མི་རྟག་སྒྱུ་མའི་ག་མཁན་གཉིས། །འཕྲལ་མར་མཛེས་པར་སྣང་གྱུར་ཀྱང་། །ལྦུ་བའི་སྙིང་པོ་ཇི་བཞིན་རྟོགས། །སྲིད་འདིའི་ཕུན་ཚོགས་བཀྲ་བ་དང་། །ནམ་མཁར་དབང་པོའི་གཞུ་སྦྲེལ་བ། །འཁྲུལ་པའི་སྐྱེ་བོ་མགུ་བྱེད་ཀྱང་། །དེ་ཡི་རང་བཞིན་ང་ཡིས་མཐོང་། །ཞེས་གསུངས་ཏེ། བདུད་ཀྱི་སྡེ་འཇོམས་པར་མཛད་པའི་ཏིང་ངེ་འཛིན་ལ་སྙོམས་པར་ཞུགས་སོ། །
3-31
དེ་ནས་བདུད་ཀྱི་དཔུང་རྣམས་སོ་སོར་བྱེར་ཞིང་ཕལ་ཆེར་གྱིས་བྱང་ཆུབ་མཆོག་ཏུ་སེམས་བསྐྱེད། དགེ་བའི་རྩ་བ་བསྒྲུབ་པར་དམ་བཅས་པ་ཡང་བགྱིས་སོ། །དེའི་ཚེ་བསམ་པ། ངས་ཆོས་མིན་པའི་བྱ་བ་ནི་མ་བྱས། ད་ཆོས་ཀྱི་ཕྱོགས་སུ་སྡུག་གྲིར་ཤི་ཡང་བླ་ཡི་དགོངས་ནས། ཚེ་བློས་བཏང་གི་མཚམས་སྦྱར་ཏེ། རྗེ་གྲུབ་ཐོབ་ཆེན་པོ་ཐུགས་ལ་དྲན་ཞིང་ཡུས་ཆེ་བའི་སྤྱན་ཆབ་དྲག་ཏུ་བསིལ། མོས་གུས་ཀྱི་འོ་དོད་སྤྲིན་སྐྱེས་སྟོང་སྒྲོག་པ་ཙམ་ནི་བསྒྲགས། སྙིང་རྗེའི་ཚན་ཁ་དབྱར་མཚོའི་ཀློང་རྡོལ་བ་བཞིན་དུ་གྱུར། ངེས་པའི་ཤེས་པ་ནི་མེ་ལོང་གི་གཟུགས་བརྙན་ལྟ་བུར་རྟོགས། གཟུང་རྟོག་ངན་པ་མུན་ནང་དུ་སྒྲོན་མེ་སྦར་བ་བཞིན་དེངས། རྒྱུ་རྟེན་འབྲེལ་སྟོན་དུས་ཀྱི་ནམ་མཁའ་དང་མཚུངས་པར་རབ་ཏུ་གསལ་བར་གྱུར། ཕྱག་རྒྱ་ཆེན་པོའི་རྟོགས་པ་སྤྲིན་བྲལ་གྱི་ནམ་མཁའ་བཞིན་སོང་། སྤང་བྱ་མ་ལུས་པ་རྩ་བ་ནས་དྲུངས་ཕྱུང་སྟེ། ཐུན་མོང་གི་གྲུབ་པ་བརྒྱད་དང་མཆོག་གི་དངོས་གྲུབ་ཐོབ། དེའི་དུས་སུ་དཀའ་བ་སྤྱད་ལུགས་ཀྱི་མགུར་འདི་བཞེངས་སོ། །ན་མོ་རིན་པོ་ཆེ། རྗེ་འགྲོ་མགོན་མྱ་ངན་འདས་འོག་ཏུ། །ཁོ་བོ་གཙང་པ་རྒྱ་རས་ཀྱིས། །ཆོས་བརྒྱད་ཀྱི་རྩི་ཐོག་མ་མྱང་པར། །ལྷོ་བྲག་མཁར་ཆུར་བསྒོམ་དུ་ཡོངས། །ཞེས་སོགས་གསུངས་སོ། །དེའི་དུས་སུ་དཔལ་ཡེ་ཤེས་ཀྱི་མགོན་པོ་ཕྱག་བཞི་པ་དམ་ལ་བཏགས་ཏེ། 
3-32
ཅི་བསྒོ་བའི་བཀའ་ཉན་ཞིང་ཕྱི་བཞིན་དུ་འབྲང་ངོ་། །བཅོམ་ལྡན་འདས་འཁོར་ལོ་སྡོམ་པ་སོགས་ལྷག་པའི་ལྷ་དཔག་ཏུ་མེད་པའི་ཞལ་གཟིགས་ཤིང་། བར་ཆད་རང་གྲོལ་གྱི་མགུར་ཡང་གསུངས་སོ། །དེར་ནུབ་ཅིག་གི་རྨི་ལམ་དུ། རི་ཟུར་གཅིག་གི་ཁར་འདུག་ནས། སྣ་ཕུ་བའི་མགུར་ལེན་རེས་ང་ལ་བབ་འདུག་བྱས་ཏེ། མགུར་བཞེངས་པས་དགེ་འདུན་གྲངས་མེད་པ་འདུས་ཏེ་གསེབ་ནས་མ་ཐོན་པ་ཞིག་རྨིས། དེ་ད་ལྟའི་ཀློང་རྡོལ་དུ་འདུག་གསུང་། ཡང་མནལ་ལམ་དུ། སྣམ་བུ་ཁ་དོག་མང་པོ་བུད་མེད་ཀྱི་ཚོགས་ཀྱིས་འབུལ་བ་ཞིག་རྨིས། དེ་འཁོར་ཚོགས་མང་པོ་འདིའི་རྟེན་འབྲེལ་དུ་འདུག་ཅེས་སྩལ། དེའི་དུས་སུ་ཁ་འཐོར་རིན་ཆེན་ཕྲེང་བ་ཡང་བརྩམ་པར་མཛད་དོ། །འདག་སྦྱར་ལ་བཞུགས་དུས། དགེ་བཤེས་ཤུད་བུ་ན་རེ། བྲག་ཕུག་གནམ་མི་མཐོང་བ་འདི་འདྲར་འདག་སྦྱར་བྱེད་པ། ཁྱོད་ལ་གདེངས་ཅི་ཡོད་ཅེས་ཟེར་བ་ལ། གདེངས་ཚད་དྲུག་གི་མགུར་བཞེངས་པ། ན་མོ་རིན་པོ་ཆེ། སེམས་གཞི་རྩ་བྲལ་བའི་དོན་རྟོགས་པས། །འཁོར་འདས་ཀྱི་ངོ་བོ་གཅིག་ཏུ་འདྲེས། །དགག་སྒྲུབ་སྤང་བླང་མ་མཐོང་ངོ་། །བདག་གི་ལྟ་བའི་གདེང་ཚད་ཡིན། །ཞེས་སོགས་གསུངས་སོ། །དེ་ཡང་ལོ་གསུམ་དང་ཟླ་བ་བཅོ་བརྒྱད་སྟན་གཅིག་ནས་གཡོ་བ་མེད་པར་བཞུགས། དེ་ཙ་ན་རེས་འགའ་རྗེ་ལ་གསོལ་བ་བཏབ། རེས་འགའ་མགུར་དབྱངས་བླངས། 
3-33
རེས་འགའ་བྲོ་བརྡུངས། རེས་འགའ་གར་བསྒྱུར། རེས་འགའ་རྩེད་འཇོའི་དཔྱིད་སྣ་ཚོགས་པའི་སྒོ་ནས་ཉམས་དང་རྟོགས་པ་ལྷག་པར་འཕེལ་བར་ཡོད་པའི་དུས། ཡུལ་སྐྱོང་བ་རྣམས་ཀྱིས་རྒྱ་རས་པ་ཁོ་ལ་ཆོས་སྨྱོ་བྱུང་བ་ཡིན་པར་འདུག་ཅེས་གླེངས་སོ། ། དེ་གྲོགས་ཀློག་སྒོམ་རས་པ་ཞེས་བྱ་བ་ཞིག་ཡོད་པ་དེས་ཐོས་པ་དང་། ཡིད་དངངས་ཏེ་ལ་གོར་གྱིས་ཤུལ་ལམ་བགྲོད་ནས། རྗེའི་དྲུང་དུ་ཕྱིན། དེར་མངོན་པར་གུས་པའི་ཚུལ་གྱིས་འདི་སྐད་ཅེས་གསོལ་ཏོ། །ཀྱེ་རྒྱ་རས་པ་ཁྱོད་གླུ་ཁོ་ན་ལེན་པ་ཞིག་འདུག་ཟེར་བས། ཅི་སེམས་མ་ཟིན་ནམ། འོན་ཀྱང་འཚོ་ཆས་ཀྱིས་ཕོངས་པའི་སྐྱོན་ནམ། ཅི་ཏེ་གྲང་བའི་ཉེས་པར་གྱུར་ཏམ། ཞེས་གསོལ་བ་དང་། རྗེས་སྐྱིད་ཚོར་རྣམ་པ་བདུན་གྱི་མགུར་གསུངས། དེའི་དུས་སུ་རྗེ་གྲུབ་ཐོབ་ཆེན་པོ་མནལ་ལམ་དུ་བྱོན་ནས། གདམས་ངག་འདི་ལྟ་བུ་ཞིག་བསྒོམས་དང་། ཞག་འདི་ཙམ་ཞིག་ན་གཏེར་ཐོན་པའི་རྟགས་ཡོང་གི། སེམས་ཅན་ལ་ཕན་ཐོགས་པར་འདུག་གོ། །ཞེས་བཀའ་རྗེས་སུ་སྩལ། དེ་ནས་བསྒོམས་པས། ནུབ་གཅིག་གི་རྨི་ལམ་ན། མི་དཀར་པོ་ཞིག་གིས་མདའ་དར་ཞིག་ཁྱེར་ནས། ཀྱེ་ཁྱོད་ནཱ་རོ་པ་ཡིན་པ་དེ་མ་དྲན་ནམ། ད་ཁྱེད་ཉིད་ཀྱི་གདམས་ངག་རོ་སྙོམས་སྐོར་དྲུག་ཅེས་བྱ་བ། རྒྱུད་སྡེ་དུ་མའི་བཅུད་བསྡུས་པ་དེ་བྲག་འདིའི་ལོགས་ལ་ཡོད་དོ། །
3-34
ཞེས་འཛེར་ནས། མདའ་དར་བྲག་དེ་ལ་བཙུགས་པ་རྨིས། དེ་མ་ཐག་གཟིམས་སད་དེ། ཐུགས་མཉམ་པར་གཞག་ནས་ཏིང་ངེ་འཛིན་ལ་ཞུགས་ཏེ། སྔོན་གྱི་གནས་ཐམས་ཅད་རྗེས་སུ་དྲན་པའི་མངོན་པར་ཤེས་པ་བསྐྱེད་དོ། །དེ་ནས་བྲག་དེ་ལས་གཏེར་བཏོན་ཏེ། དཔེ་ཁ་ལག་ཚང་བར་བྲིས། མ་དཔེ་རྣམས་སླར་གཏེར་དུ་སྦས་ནས་སྙོན་ཁའི་ཀླུ་བཙན་ལ་སོགས་པ་གཏེར་སྲུང་དུ་གཉེར། དེ་ནས་རྗེ་ཉིད་ཀྱིས་གསུང་ངག་བཅད་དེ། བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེའི་ཚེ་སྐྱེ་བ་ཐོག་མའི་བག་ཆགས་ཀྱི་སྟོབས་སད་པས། རྟག་ཏུ་ཞི་བའི་ངང་ཚུལ་ཅན་གཏོང་བ་དང་དེས་པས་འཚོ་བ། ཀུ་ས་ལིའི་སྤྱོད་པས་དང་བ་སྐྱེད་པར་བྱེད་པ། སྦས་པའི་ཚུལ་གྱིས་འགྲོ་བ་སྐྱོང་ཞིང་། ལོག་པའི་གནས་ལས་ལྡོག་པར་མཁས་པའི་ར་རྫི་གཞོན་ནུ་ཞིག་མངོན་པར་གུས་པའི་སྟོབས་ཀྱིས་བྱུང་ངོ་། །དེར་རྗེ་ལ་འདི་སྐད་ཅེས་གསོལ་ཏོ། །ཤིན་ཏུ་ཞི་བའི་གཏེར་ཐོབ་པ། སྤོབས་པའི་བློ་གྲོས། བྱང་ཕྱོགས་ཀྱི་ཆོས་ཀུན་གྱིས་བརྒྱན་པ། ཟད་མི་ཤེས་པའི་ཡོན་ཏན་གྱིས་ཆུབ་པ། སྲིད་པའི་དགྲ་སྡེ་ལས་མངོན་པར་རྒྱལ་བ། ཏིལ་གྱི་གང་བུའི་ཚུལ་གྱིས་རྒྱལ་བས་དབང་བསྐུར་བ། བླ་ན་མེད་པ། ལྷ་མིའི་འདྲེན་པ་ཁྱེད། དུས་ཀུན་ཏུ་གཉུག་མའི་གླུས་འགྲོ་བའི་ཡིད་འཕྲོག་པར་བྱེད་དོ་ཞེས་ཀུན་གྱིས་སྒྲོག་པ་བདག་གིས་ལེགས་པར་ཐོས་སོ། །
3-35
དེས་ཡིད་རབ་ཏུ་དགའ་སྟེ་རྗེའི་གམ་དུ་འོངས་སོ། །བསོད་པའི་བྲོ་འདི་ལེགས་པར་བཞེས་ནས། བདག་གི་ཡིད་ལ་ཕན་པའི་གླུ་ཞིག་སྩལ་དུ་གསོལ། ཞེས་ཞུས་པ་ལ། ཞལ་རོག་གི་བཞུགས་པར་གྱུར་པས། ཁོ་མ་དགའ་བར་ངོ་གནག་སྟེ་འདུག་གོ། །དེ་གཟིགས་པ་དང་གླུ་སྐད་སེམས་ལ་ཕན་ན་ཅིའི་ཕྱིར་མི་ལེན་གསུངས་ནས། མགུར་འདི་བཞེངས་སོ། །ན་མོ་གུ་རུ། འཁོར་བ་སྡུག་བསྔལ་གྱི་རང་བཞིན་ལ། །སྐྱོ་བ་སྐྱེ་བའི་ཆོས་བཤད་ཀྱང་། །ཞེན་པ་ལོག་པ་གཅིག་ཀྱང་མེད། །གླུ་བླངས་པས་ཕན་པ་ཅང་གདའ་འམ། །ཞེས་སོགས་གསུངས་པས། ཁོ་ལྷག་པའི་དད་པ་ཐོབ་སྟེ་སོམ་ཉི་དང་བྲལ་བའི་སེམས་ཀྱིས་རྗེ་ལ་འདུད་དོ། ། རྗེས་ཀྱང་མ་ནམ་བཞི་སྐོར་གནང་སྟེ། རྟག་ཏུ་ཁ་ཏོན་དུ་བགྱིས་ཤིང་མོས་གུས་ལ་ནན་ཏན་དུ་བྱས་པས། གྲུབ་པ་བརྙེས་ཏེ་རྗེའི་དྲུང་དུ། ནམ་མཁའ་ལ་འཕུར་ནས་འོང་བ་སོགས་གྲུབ་པའི་རྟགས་སྣ་ཚོགས་པ་བསྟན་ཏེ། དམ་པ་ར་ཞིག་ཟེར་བའི་གྲུབ་པའི་དབང་ཕྱུག་ཏུ་གྱུར་ཏོ། །དེ་ནས་འདག་སྦྱར་གྲོལ་ཏེ། ཀུན་དགའ་སྒྲ་སོགས་ལ་ཆོས་དྲུག་གི་གདམས་པ་ཚར་གཅིག་དང་། འཁོར་ལོ་སྡོམ་པ་ལྷ་བཅུ་གསུམ་གྱི་བུམ་དབང་ཆེན་མོ་མཛད་པས། སྐུ་གསུང་ཐུགས་ཀྱི་ཡེ་ཤེས་རབ་ཏུ་བབས་ཏེ། སྐུ་དང་གསུང་དང་ཐུགས་ཀྱི་བཀོད་པ་སྣ་ཚོགས་པ་བྱེད་ཅིང་། 
3-36
འབྱུང་ལྔའི་རང་བཞིན་གྱིས་ཆོ་འཕྲུལ་གྲངས་མེད་པ་བྱེད་དོ། །ཚིག་མདའི་ཚོགས་ཀྱིས་ཀྱང་ལྷའི་རྔ་བོ་ཆེ་བརྡུང་ཞིང་། ཙམ་པ་ཀ་དང་། པུཎྜ་རི་ཀ་དང་། ཨུ་དུམ་ཝ་ར་ལ་སོགས་པ་མངོན་པར་འཐོར་རོ། །བསུང་བཟང་པོའི་ངད་ཀྱིས་ཕྱོགས་ཁོར་མོ་ཡུག་ཏུ་ཁྱབ་པར་བྱས་སོ། །སྐྱེ་བོ་ཀུན་ཀྱང་དགའ་བ་དང་མགུ་བས་ཡིད་ཚིམ་པར་བགྱིས་སོ། ། དེ་ནས་འབུལ་བའི་ཚོགས་ཇི་སྙེད་བསྣམས་ཏེ་སྣ་ཕུར་བྱོན། གྲུབ་ཐོབ་ཆེན་པོའི་དུས་མཆོད་ཀྱི་རྐྱེན་དུ་སྦྱར་ཞིང་གཉེར་གླུ་རིང་མོ་ལ་སོགས་པ་གསུངས་སོ། །དེ་དུས་མནལ་ལམ་དུ། རྗེ་སྣ་ཕུ་པ་དང་མཇལ་ཏེ་ལུས་སྦྱོང་ལ་སོགས་པའི་གདམས་ངག་མང་པོ་གསན་ཏོ། །དེ་ནས་དཔོན་སློབ་འགའ་ཞིག་གིས་འབྲོག་མུ་ཏིག་ཤེལ་གྱི་སྤ་མ་གོང་དུ་བྱོན། འདྲེ་སྲིན་གྱི་ཆོ་འཕྲུལ་སྣ་ཚོགས་བསྟན་པའང་ཟིལ་གྱིས་མནན། རང་རང་གི་སྲོག་སྔགས་ཕུལ་ཏེ་དམ་ལ་བཞག །གདུག་པའི་སྐྱེ་བོ་མང་བས་དེའི་བྱ་བས་སུན་ཏེ་མགུར་ཡང་གསུངས་ནས་བྱོན་ནོ། །དེ་ནས་དགེ་བཤེས་སེ་སྙེ་མོ་བས་སྤྱན་དྲངས་ཏེ། ཁ་རག་གི་རི་ལ་ཟླ་ཤས་ཤིག་བཞུགས་ཤིང་། ཁ་རག་སྨན་བཙུན་གྱིས་ཆོས་ཞུས། དགོན་པ་འདེབས་པར་གསོལ་བས་གནང་། སྤྱིལ་པོ་ཁ་ཡར་བཏབ། ལྷ་གསོལ་དབུ་མ་སོགས་མགུར་མང་པོ་དང་། གཡག་རས་ཀྱི་ཞུས་ལན་བཀའ་དྲིན་བཅུ་གཅིག་མའི་འགྲེལ་པ་མཛད་དོ། །
3-37
ཡང་དེས་བཟད་ཕུར་སྤྱན་དྲངས་ནས་བྱ་ཁྱུང་བྲག་ལ་དབྱར་ལོ་གཅིག་བཞུགས་ཤིང་སྙི་ཕུའི་རི་ཁྲོད་ལ་སོགས་པར་ཡང་བཞུགས་སོ། །བཙད་པོ་རིག་སྔགས་དང་དེ་དུས་མཇལ་ཞིང་། དབེན་གནས་དང་འཚོ་ཆས་སྦྱར་ཏེ་བཞུགས་པར་གསོལ་བས་མ་གནང་བར། དཔལ་ཆེན་ཆུ་བོ་རིར་ཕེབས་ནས་རེ་ཞིག་གི་བར་གདན་ཆགས་པར་མཛད་དོ། །དེ་ནས་རྗེ་མཚུར་ཕུ་པ་ཞེས་ཁམས་གསུམ་ན་སྙན་པའི་གདུག་དཀར་པོ་གཡོ་བ། ལྷ་མིའི་སྟོན་པ། དུས་གསུམ་གྱི་འདྲེན་པ་དམ་པ། དཔལ་མདའ་བསྣུན་ཆེན་པོ་དང་མི་གཉིས་པར་གྱུར་པ་དེ་ཉིད་མཇལ་དུ་འགྲོ་བར་དགོངས་པ་ཙམ་གྱིས་བྱིན་རླབས་ཀྱི་ཡོན་ཏན་གོང་དུ་འཕེལ། མཇལ་བ་དང་ཐུགས་ཡིད་དབྱེར་མེད་དུ་གྱུར་ཏོ། །དེར་རྗེ་དུས་གསུམ་མཁྱེན་པའི་ཞལ་ནས། ཆོས་ཕྱོགས་སུ་དཀའ་བ་མང་པོ་སྤྱད་ཟིན་པར་འདུག །དེ་རེས་གདམས་ངག་ལ་ངེས་ཤེས་སྐྱེས་སམ། རྟོགས་པའི་གདེང་ཚད་ཇི་ལྟར་ཡོད་ཅེས་བཀའ་སྩལ་བ་ལ། མགུར་འདི་བཞེངས་སོ། །རྗེ་བླ་མ་རྣམས་ལ་ཕྱག་འཚལ་ལོ། །ཁོ་བོ་གཙང་པ་རྒྱ་རས་བདག །ཉམས་མྱོང་གླུ་རུ་ལེན་ལགས་པས། །རྗེ་རིན་ཆེན་འདི་ལ་གསན་པར་ཞུ། །ཞེས་སོགས་ཕུལ་བས་རྗེ་དབུ་སེ་ཤིན་ཏུ་མཉེས་ཤིང་ཐབས་ལམ་གྱི་གདམས་པ་གསན་ཏོ། །དེའི་ཚེ་རྗེ་དུས་མཁྱེན་གྱི་ཞལ་ནས། རྒྱ་གར་ན་གྲུབ་ཐོབ་ཀྱི་གདུགས་ཚོད་ལན་གཅིག་ཆག་ན། 
3-38
མུ་གེ་ལོ་བཅུ་གསུམ་ཡོང་ཟེར་བ་ཡིན་པས། རྒྱ་རས་པ་དཔོན་སློབ་མཉེས་པའི་བསྙེན་བཀུར་སྒྲུབས་ཤིག་ཅེས་བསྒོས་ཏེ། སྲི་ཞུ་རྒྱ་ཆེར་མཛད་དོ། །དད་ལྡན་གྱི་འདུས་པ་མང་པོ་ལ་གསུང་གིས་ཚིམ་པར་བྱས་ཏེ། སྐྱིད་སྨད་ཀྱི་རི་ཁྲོད་ལ་བཞུགས་སོ། །དེ་ནས་ཞུ་མཁན་བྲག་ལ་སེ་བའི་དཀའ་ཐུབ་ཞག་བདུན་མཛད་དེ། སྲང་རིང་བྲག་ཆུང་གི་མཐའ་ལ། ཞང་མེས་ཚབ་ཀྱིས་ཞབས་ཏོག་བྱས་ནས་བཞུགས་སོ། །དེ་ནས་རིམ་གྱིས་འཇུག་ཕྲན་དུ་ཕེབས་ཏེ་ཇོ་བོ་ལྷ་དང་མཇལ་ལོ། །དེ་ན་རེ། ཁྱེད་ག་ནས་བྱོན། སུའི་གྲྭ་པ་ཡིན་དྲིས་པ་དང་། ཁོ་བོ་ནི་སྣ་ཕུ་ནས་འོངས་སོ། །རྗེ་གྲུབ་ཐོབ་ཀྱི་རྒྱལ་པོའི་གྲྭ་པ་ལགས་སོ། །ཞེས་གསུངས། ཕོ་བྲང་དུ་སྤྱན་དྲངས་ནས་ཆོས་ཀྱི་གླེང་མོ་རྒྱ་ཆེན་པོ་མཛད་དོ། །དེའི་ཚེ་ཇོ་བོ་ན་རེ། རྣལ་འབྱོར་པ་ཡིད་དང་འཐད། ངས་དགོན་པ་ཞིག་འབུལ། འབྱོན་འཚལ། ཞེས་ཞུས་པ་ལ། རྗེས་དེ་ལྟར་དུ་བགྱིའོ་ཞེས་གསུངས་ནས། ཆུ་བོ་རིའི་དགོན་གནས་ཕུལ་ལོ། །དེ་དུས་དྲ་ཆུང་། ཞལ་བུ། ཅང་ཏེའུ། མེ་ཆ་གཅིག །རས་གཟན་གཅིག་མ་གཏོགས་ཡོ་བྱད་ཀྱི་ཚོགས་བདག་ཏུ་འཛིན་པ་མི་མཛད་དོ། །དེ་ནས་བྱོན་ཏེ། བྱི་བ་ལོའི་དགུན་ཆུ་བོ་རིར་བཞུགས་ཏེ། འདག་སྦྱར་གྱི་ངང་ནས་གསུང་གི་བདུད་རྩི་རྒྱ་ཆེན་པོ་སྩལ་ནས་སྐྱིད་པ་ལྔའི་མགུར་གསུངས་སོ། །
3-39
དེ་ནས་ཡང་སླར་ཁ་རག་ཤར་གྱི་རི་ལ་བྱོན་ཏེ་བཞུགས་པའི་སྐབས་ན། མཚན་མོའི་དགུང་འདས་པ། པདྨའི་རྩ་ལག་གི་འོད་ཀྱིས་ལྷོ་གླིང་དབུས་མའི་མཐོངས་སུ་ངོམ་པའི་ཚེ། འོད་གསལ་གྱི་ངང་དུ་སྙོམས་པར་ཞུགས་པ་ན། ཡེ་ཤེས་ཀྱི་མཁའ་འགྲོ་སེང་གེའི་གདོང་པ་ཅན་མཆེད་གསུམ་མདུན་གྱི་བར་སྣང་ལ་བྱོན་ནས། ཀྱཻ། འབྲི་ཁུང་པ་རྣམས་གནས་ཆེན་ཙ་རི་འཛིན་པར་འགྲོ་འདུག་གི། རྒྱ་རས་པ་ཁྱོད་ཀྱང་འགྲོ་རན་པར་མ་གྱུར་ཏམ། ཞེས་གསུངས་པ་ཐོས་པའི་མོད་ལ་འོད་གསལ་གྱི་ཏིང་ངེ་འཛིན་ལས་བཞེངས་ཏེ། ཅི་རྗེ་གྲུབ་ཐོབ་ཆེན་པོས་བདག་ལ་རོ་སྙོམས་ཀྱི་ཁ་བྱང་གཏད་དུས། འདི་ནས་ཉི་མ་ཤར་ལྷོ་མཚམས་ན་གནས་ཆེན་ཙ་རི་ཏྲ་ཞེས་བྱ་བ་རྒྱུད་སྡེ་མཐའ་དག་ནས་ལུང་བསྟན་ཞིང་། འཁོར་ལོ་སྡོམ་པའི་ཕོ་བྲང་བཞུགས་པ་དེའི་གནས་ཀྱི་སྒོ་ཕྱེ་ལ་སྒྲུབ་པ་གྱིས། མ་འོངས་པ་ན་ཁྱོད་ཀྱི་བུ་སློབ་ཀྱི་བརྒྱུད་པས་འཛིན་པར་འདུག་ཅེས་ལུང་བསྟན་པ་དེའི་དུས་ལ་བབ་པར་གྱུར་ཏམ་སྙམ་མ་ཐག །མདུན་གྱི་ནམ་མཁའ་ལ་རིན་པོ་ཆེའི་གུར་ཁང་འཁྲིགས་ཤིང་། སེང་གེས་བཏེག་པའི་ཁྲིའི་སྟེང་ན། རྗེ་གྲུབ་ཐོབ་ཆེན་པོ་ཉི་མ་འབུམ་གྱི་མདངས་འཕྲོག་པའི་གཟི་འོད་འབར་བ། རབ་ཏུ་བརྗིད་ཅིང་འགྱིང་བག་དང་ལྡན་པ་ཞལ་གཟིགས་ཏེ། བུ་རྒྱ་སྟོན་མ་སྡོད་བསྒོམ་དུ་རྒྱུགས། །
3-40
རྒྱ་སྟོན་བསྒོམ་དུ་འགྲོ་ཙ་ན། །ཙ་རི་སྤྲུལ་པའི་དཀྱིལ་འཁོར་ཡོད། །མཁའ་འགྲོ་རྡོ་ཡི་སྙིང་ཕུག་ཡོད། །གླིང་ཆེན་ཟས་ཀྱི་དངོས་གྲུབ་ཡོད། །ཅེས་བཀའི་གནང་བ་ཐོས་པའི་མོད། མཚན་མོའི་གྲངས་རྫོགས་ཏེ་ཉི་འོད་ཀྱིས་ས་ཀུན་ཡང་ལེགས་པར་ཁྱབ་པར་བྱས་སོ། ། དེ་ནས་གནས་ཆེན་ཙ་རི་ཏྲ་ཡེ་ཤེས་ཀྱི་འཁོར་ལོའི་སྒོ་དབྱེ་བའི་སྐབས་ལ་ཐུག་པར་མཁྱེན་ནས། རྡོ་རྗེ་ལྟ་བུའི་ཏིང་ངེ་འཛིན་ལས་བཞེངས་ཏེ། ཞིག་པོ་སྐྱེས་མཆོག་དང་། ལོ་རོ་བ་སྐལ་ལྡན་གཉིས་ཀྱིས་ཞབས་འབྲིང་པ་བྱས་ནས་སྐྱིད་ཤོད་དུ་ཕེབས་སོ། །དེར་ཇོ་ཡེས་བྱུང་བའང་ཕྱག་ཕྱིར་ཁྲིད། དེ་དུས་རྗེའི་ཞལ་ནས། ངས་དཔོན་བྱས། ལོ་རོ་སྐལ་ལྡན་གྱིས་གྲོས་དཔོན་གྱིས། ཞིག་པོ་རྒྱུ་བ་ངན་པས་ཁྲེས་འཁུར་དང་གཡོས་མཁན་གྱིས་སྒྲིབ་སྦྱོང་ཡིན་ནོ་ཞེས་གསུངས་ནས་བྱོན་ཏོ། །དེ་ནས་འབྲི་ཁུང་དུ་ཕེབས། རྗེ་སྐྱོབ་པ་ཆེན་པོ་འཇིག་རྟེན་གསུམ་གྱི་མགོན་པོ་དང་མཇལ། གསུང་རབ་ཀྱི་འབེལ་གཏམ་མང་དུ་མཛད་དེ་ལྷག་པར་མཉེས་པར་གྱུར་ཏོ། །དེ་ནས་རིམ་པས་བགྲོད་དེ་དྭགས་པོ་གྲུམ་ལུང་གི་ནང་ནས་ཡར་ཕེབས་པའི་ཚེ། གཉོས་མགར་ཆོས་གསུམ་གུར་དཀར་དང་། རྟ་པ་དང་། ཁལ་མ་དང་བཅས་ཏེ་གཟི་བྱིན་བསྐྱེད་ནས་འདུག །དེར་ཁོང་རྣམས་ཀྱིས་སྨྲས་པ། ཁྱེད་གང་ནས་འོངས། ད་གང་དུ་འགྲོ་ཞེས་བརྗོད་པ་དང་། ལན་སྨྲས་པ། 
3-41
ང་ཉི་མ་དབུས་ཀྱི་ཕྱོགས་ནས་འོངས། གླིང་རས་གསུས་པོ་ཆེ་ཞེས་བྱ་བའི་བུ། རྒྱ་རས་ཡེ་ཤེས་རྡོ་རྗེ་ཟེར་བ་ཡིན། ད་གནས་ཆེན་ཙ་རི་ཏྲའི་གནས་ཀྱི་སྒོ་འབྱེད་དུ་འགྲོ་བ་ཡིན་ཞེས་གསུངས་པ་དང་། ཁོང་རྣམས་ན་རེ། གྲོགས་དམ་པ། ཁྱེད་ཀྱི་སྙན་པ་སྔ་མོ་ནས་ཐོས་ཀྱི། རྟགས་ཆ་ལུགས་འདི་ལྟས་གནས་ཆེན་བགྲོད་པར་སྤོབས་སམ། ངེད་རྣམས་ཀྱང་འགྲོ་བ་ཡིན་ཏེ་རང་ཅག་རྣམས་ལྷན་ཅིག་ཏུ་འགྲོའོ་ཞེས་སྨྲས་སོ། །དེར་དགོངས་པ་ལ། རྟགས་དང་ཆ་ལུགས་འདི་ལྟ་བུས་བགྲོད་ནུས་སམ་མི་ནུས་བལྟ་ཡི། ཁོ་བོ་ཁྱེད་རྣམས་ལ་བལྟོས་དགོས་པའི་རྣལ་འབྱོར་པ་ཞིག་མིན་སྙམ་པ་འཁྲུངས་སོ། །འོན་ཀྱང་ཁེངས་པ་ཆེ་བར་མཐོང་གི་དོགས་པས། གྲོགས་རྣམས་ཇི་ལྟར་འགྲོ་བ་ལྟར་བགྱིའོ་ཞེས་གསུངས་ནས་ཕེབས་པར་མཛད་པ་ལས། ཚེ་རིང་མ་མཆེད་ལྔ་བྱ་ཙ་ཀོ་ར་སྤུ་སྡུག་པ། སྙན་པའི་སྐད་འབྱིན་པའི་གཟུགས་སུ་བྱས་ཏེ་ལམ་གསལ་བར་སྣ་དྲངས་ཏེ་བྱོན་ཏོ། །ཞིང་སྐྱོང་བའི་དབང་པོ་ཀུན་དགའ་གཞོན་ནུ་ཡང་ཁྱེའུ་དཀར་པོ་དར་དཀར་གྱི་བེར་གྱོན་པ། གྲོ་སེར་ཁ་དོག་ཅན་གྱི་མགྱོགས་འགྲོ་གཡུའི་རྔ་མ་ཡོད་པ་ཞིག་ལ་བཅིབས་ཏེ་བསུ་བ་ལ་བྱུང་ངོ་། །དེར་ཞིང་སྐྱོང་གི་དབང་པོས་འདི་སྐད་ཅེས་གསོལ་ཏོ། །བླ་མ་རིན་པོ་ཆེ། ལ་འདི་ནས་ཡར་ལ་འབྱོན་པར་ཞུ་དང་། 
3-42
ཤིན་ཏུ་བགྲོད་སླ་བར་ཡོད་ཀྱི་ཞུས་ནས། འབབ་ཆུ་དར་དཀར་པོའི་ཡོལ་བ་བརྐྱང་བ་འདྲ་བའི་འགྲམ། བཀྲ་ཤིས་མཁའ་ལྡིང་གི་བྲག་ཏུ་སྤྱན་དྲངས་ཏེ་བཞུགས་སུ་གསོལ་ལོ། །འདི་ནས་ཞབས་འབྲིང་པ་རྣམས་ངལ་བའི་ཁུར་གྱིས་དུབ་པར་གྱུར་ཏེ། རྗེ་ལ་གནང་བ་དུ་མར་ཞུས་ནས་ཕྱིར་ལོག་པར་གྱུར་ཏོ། །དེར་གཉོས་ཆེན་པོ་བྱུང་ནས། གྲོགས་པོ་རྒྱ་རས་ཁྱེད་ཀྱི་བཞུགས་གནས་འདི་སྐྱིད་སྐྱིད་འདྲ་བར་འདུག །ཅེས་གསུངས་པ་དང་། རྗེས་སྐྱིད་པར་སྨོན་ན་གྲོགས་རང་ལ་ཕུལ་བས་ཆོག་ཅེས་གསུངས་ཏེ་གནང་ངོ་། ། དེ་ནས་མི་རིང་བ་ན་མགར་དམ་པ་ཡང་བྱོན་ནས། རྒྱ་གཉོས་མགར་གསུམ་གྱིས་ཚོགས་འཁོར་ཞིག་མཛད་པའི་གྲལ་དུ། གཉོས་ཀྱི་ཞལ་ནས། རང་ཅག་གྲོགས་མཆེད་རྣམས་བྲག་ཕུག་འདི་རྡིབ་ན། སྒོམ་དྲན་པས་ཟིན་ནམ་མི་ཟིན་ཞེས་ཟེར་བ་ལ། མགར་ན་རེ། བར་དོ་དང་པོ་ལ་སྦྱངས་ནས་ཞག་བདུན་ནམ། བཅུ་གཅིག་གམ། ཉེར་གཅིག་ལ་ཟིན། ཁྱེད་ཇི་ལྟར་བགྱིད་ཅེས་སྨྲས་པ་དང་། གཉོས་ཀྱི་ཞལ་ནས། སྐད་ཅིག་དང་པོ་ལ་དྲན་པས་ཇི་ལྟར་ཟིན། གཉིས་པ་ནས་ཨེ་ཟིན་བལྟ་དགོས་གསུང་བ་ལ། རྗེའི་ཞལ་ནས། གནམ་ས་ཆ་ལང་བརྡབས་པ་བཞིན་སོང་ཡང་། ང་སྒོམ་ལ་འདུ་འབྲལ་གཅིག་ཀྱང་མེད་གསུངས་ནས། མགུར་བཞེངས་པ། ཨེ་མ་རང་ལ་གནས་པའི་ཡེ་ཤེས་འདི། །བླ་མའི་དྲིན་གྱིས་རྟོགས་ལགས་པས། །
3-43
སངས་རྒྱས་སྟོང་རྩ་བྱོན་ལགས་ཀྱང་། །བློ་ཐེ་ཚོམ་ཟ་རྒྱུ་ཡང་མི་གདའོ། །ཞེས་སོགས་གསུངས་པས་གྲོགས་ཟུང་ལྷག་པར་དད་པར་གྱུར་ཏོ། །དེ་ནས་གཉོས་མགར་ཆོས་གསུམ་དང་ཐབས་གཅིག་པ་ཙ་རི་ཡུལ་སྨད་ལ་ཕེབས་པར་ཕྱོགས་པའི་ཚེ། ལོག་འདྲེན་གྱི་ལྟོ་འགྲོས་འཇིགས་སུ་རུང་བའི་སྦལ་པ་ཞིག་ཏུ་ལུས་བསྒྱུར་ཏེ་ལམ་བཀག་ནས་འདུག་གོ། །དེ་མཐོང་བ་དང་། གཉོས་ནི་མི་རྟོག་པའི་ངང་ལ་འདུག་པར་བལྟའོ། །མགར་ནི་སྙིང་རྗེའི་སེམས་སྒོམ་པར་བྱེད་དོ། །དཔལ་ཆེན་ཆོས་ཡེས་ནི་གཏོར་མས་ཆོ་འཕྲུལ་ཞིའོ་སྙམ་པས་གཏོར་མ་བགྱིད་དོ། །དེའི་ཚེ་རྗེ་ཉིད་ཀྱིས་རིག་པའི་བརྟུལ་ཞུགས་ཀྱི་གོ་ལེགས་པར་བགོས་ཏེ་ཕྱག་ཏུ་སྨྱུག་མཁར་བསྣམས་ནས་སྦལ་པའི་སྟེང་དུ་བྱོན་ནས་ལུས་ལ་བསྣུན་ཏོ། །དེ་མཐོང་བ་དང་གཉོས་ཀྱི་ཞལ་ནས། ཀྱེ་གྲོགས་པོ་རྒྱ་རས་པ། དེ་ལྟ་བུའི་སྤྱོད་པ་མཛད་མི་འཚལ། ཀླུ་འདི་ཞེ་གནག་པས། གྲོགས་རང་གི་སྐུ་ཚེ་ལའང་གཟན། མ་འོངས་པའི་རྗེས་འཇུག་ལའང་གནོད་པར་འགྱུར་ཞེས་གསོལ་པས། སྔོན་དང་ཕྱི་མའི་གནས་མངོན་པར་ཤེས་པའི་གདེང་དང་ལྡན་པའི་ངང་ནས། དཔའ་བོའི་གར་སྟབས་ཀྱིས་སྦལ་བའི་ས་ཕྱོགས་ཀུན་ཏུ་མཆོངས་ཏེ། ང་ཚེ་རིང་ཡང་ལྔ་བཅུ་རྩ་གཅིག་ཡིན། ང་ཚེ་ཐུང་ཀྱང་ལྔ་བཅུ་རྩ་གཅིག་ཡིན། ཞེས་གསུངས་ཞིང་འཇིགས་རུང་རྔམ་པའི་བྲོ་བརྡུང་དྲག་པོས་སྦལ་པ་འདམ་རྫབ་བཞིན་དུ་བརྫིས་པའི་ཚེ། 
3-44
དེ་ཉིད་སྲོག་ལྡན་གྱི་ལུས་དོར་ནས། གོར་མ་སའི་གཟུགས་སུ་གྱུར་ཏོ། །དེ་ལ་ཞབས་ཀྱི་པདྨ་དང་། ཕྱག་བེར་གྱི་རྗེས་ཀྱང་སྣ་ཚོགས་པ་གུས་ལྡན་མཆོད་པའི་གནས་སུ་བྱུང་ངོ་། །དེ་ནས་མ་འོངས་པར་གྱུར་པའི་དུས། མེ་ཐབ་ཀྱི་འོག་ནས་ཆུ་བརྡོལ་བའི་དུས་ཤིག་འོང་གི། དེའི་དུས་ཁོ་བོས་འཛིན་པའི་གནས་ལ་འཕོ་བསྐྱས་ཞིག་དགོས་པ་འདུག་ཅེས་གསུང་ནས། ཡུལ་སྨད་དུ་བྱོན་ཏོ། །དེར་དེའུའི་རྣམ་པ་ཞིག་ལ་མཁའ་འགྲོ་མ་བྱེ་བ་ཕྲག་འབུམ་འདུས་ཏེ་ཚོགས་ཀྱི་འཁོར་ལོར་དགའ་མགུར་སྤྱོད་པའི་གྲལ་དུ་ཐུགས་སོམ་ཉི་དང་བྲལ་བར་བྱོན་ཏེ་བཞུགས་སོ། །དེའི་གན་དུ་གནས་མལ་ཀྱང་བཅའ་བར་མཛད་དེ་སྟན་ཆགས་པ་ན། མགར་དམ་པ་བྱོན་ཏེ། གྲོགས་པོའི་བཞུགས་གནས་འདི་ཁོ་ན་ཡིད་དུ་འཐད་ཅིང་ལེགས་པར་འདུག་ཅེས་གསུང་ངོ་། ། དེ་ལ་རྗེས། དགྱེས་ན་གྲོགས་པོ་རང་བཞུགས་ཤིག་གསུངས་ནས་གནང་ངོ་། །དེ་ནས་བྱོན་ཏེ་ཆུ་མིག་ཞིག་གི་རྩར་སྐུ་ཁྲུས་མཛད་ཀྱིན་བཞུགས་པ་ན། དུང་གི་ཕྱག་འཕྲེང་ཞིག་ནོར་སྐྱོང་གི་དབང་མོས་ཁྱེའུའི་གཟུགས་སུ་བྱས་ཏེ་མཆོད་པའི་རྟེན་དུ་སྙེམས་པའི་ཚུལ་གྱིས་ཁྱེར་རོ། །དེ་ནས་རིམ་གྱིས་གནས་ཆེན་གྱི་གཟིགས་སྣང་ཀུན་གཏན་ལ་འབེབས་ཤིང་སྐྱོབས་ཆེན་གྱི་ལ་ལ་མཛད་དེ། ཅིག་ཅར་གྱི་ནང་ན་ཕེབས་པའི་ཚེ། བསིལ་བའི་ཚལ་དུ་དཔལ་སེང་གདོང་གི་དབང་པོ་གུས་པའི་ཡིད་ཀྱིས་བསུ་བར་ཡོངས་ཏེ། 
3-45
རྡོའི་ཆུ་ཞྭ་དང་། ཆུ་ལྷམ་ཕུལ་ལོ། །དེའི་རྡོ་ལ་རྟ་དང་དྲེའུའི་རྗེས་ཀྱང་བྱུང་ངོ་། །དེ་ནས་མི་རིང་བར་སོན་པ་ན། ལྕགས་ཀྱི་སྦལ་པ་རབ་ཏུ་འཇིགས་ཤིང་ཆེ་བ། དྲག་པོའི་ངུར་སྒྲ་འབྱིན་པ། གཏུམ་པའི་མིག་མངོན་པར་འཁྲུག་ཅིང་བསྒྲད་པ་ཞིག་གིས་ལམ་འགེགས་པར་རྩོམ་མོ། །དེ་ལ་ཞི་བའི་ཏིང་ངེ་འཛིན་གྱིས་མངོན་པར་ཟིལ་གྱིས་མནན་ནས་རྗེས་སུ་གཟུང་སྟེ་དམ་བཅས་སོ། ། དེ་ནས་བྱོན་ཏེ། ནེའུ་གསིང་གི་ཐང་རབ་ཏུ་མཛེས་པ། མེ་ཏོག་སྣ་ཚོགས་པས་རབ་ཏུ་བརྒྱན་ཞིང་རྐང་དྲུག་གི་ཚོགས་རྣམས་སྙན་པའི་སྐད་སྒྲོག་པ། འཕུར་ལྡིང་གི་འཇོ་སྒེག་གཡོ་བ། རི་དྭགས་ལྟེ་བའི་དྲི་ཞིམ་པོས་ཁྱབ་པ་ཞིག་ན། ཡེ་ཤེས་ཀྱི་མཁའ་འགྲོ་མ་སྤྲིན་ཕུང་འཁྲིགས་པ་བཞིན་འདུས་ཏེ། རིན་པོ་ཆེ་དང་། རུས་པའི་རྒྱན་དང་། མགོ་ཕྲེང་དང་། རིགས་ལྔའི་ཅོད་པན་ལ་སོགས་པའི་རྒྱན་རྣམས་སྟབས་གཅིག་ཏུ་བཞག་སྟེ། ལ་ལ་ནི་ཁྲུས་བྱེད། ལ་ལ་ནི་གླུ་ལེན། ལ་ལ་ནི་གར་བྱེད་པ་སོགས་འཕྲུལ་གྱི་རོལ་རྩེད་སྣ་ཚོགས་པས་བརྩོན་པར་བྱེད་དོ། །དེའི་ཚེ་རྗེ་འབྱོན་པ་གཅིག་གིས་མཐོང་སྟེ་གཅིག་ལ་རྨེའོ། །དེ་མ་ཐག་རྫུ་འཕྲུལ་གྱིས་གཅིག་ལ་གཅིག་ཐིམ་པར་གྱུར་ནས་མི་སྣང་བར་བྱས་སོ། །དེ་དག་གི་རྒྱན་སྤུངས་པ་རྣམས་དོར་བས་རྒྱན་སྤུངས་ཐང་ཞེས་ད་ལྟ་ཡང་གྲགས་སོ། །
3-46
མ་འོངས་པར་གྱུར་པའི་ཚེ་ལུང་པ་འདིའི་མདའ་ནས་གནས་ཀྱི་སྒོ་ཕྱེ་སྟེ། ངའི་བུ་བརྒྱུད་རྣམས་ཀྱིས་འཛིན་པར་འདུག་ཅེས་ཀྱང་བཀའ་སྩལ་ཏོ། །དེ་ནས་སླར་ཡང་ཕེབས་ཏེ་མཁའ་འགྲོ་རྡོའི་སྙིང་ཕུག་ཏུ་བཞུགས་པར་མཛད་པའི་ཚེ། རྡོ་རྗེ་གཡུ་སྒྲོན་མས་སྲོག་སྙིང་ཕུལ་ཞིང་བསྟན་པ་བསྲུང་བར་ཁས་བླངས་ཏེ། བདེ་སྟོང་གི་ཏིང་ངེ་འཛིན་ཆེར་རྒྱས་པའི་གྲོགས་བཟང་མར་ཡང་གྱུར་ཏོ། །དེ་དང་ཉེ་ལོགས་སུ་རྩ་ཐིག་རླུང་གསུམ་རང་དབང་དུ་བྱན་ཚུད་ཅིང་ཁེངས་ལྡན་གྱི་མཁའ་སྤྱོད་མ་འགའི་ང་རྒྱལ་གཞོམ་པའི་ཆེད་དུ་བྲག་ལ་གསང་བའི་དབང་པོ་བསྣན་ཏེ་རྗེས་ཀྱང་བཞག་གོ། །དེ་ནས་གངས་ལ་ཆེན་པོ་ཞིག་འཇིགས་པ་མེད་པར་བགྲོད་དེ་སོང་བ་དང་སྔར་གྱི་གྲོགས་རྣམས་དང་མཇལ་ལོ། །དེར་ཁོང་རྣམས་ཀྱིས་ཚོགས་ཀྱི་མཆོད་པ་ལན་དུ་མར་བགྱིས་སོ། །དེ་ནས་གྲོགས་རྣམས་ཀྱིས་སུན་དབྱུང་བའི་ཚིག་གིས། དེ་རིང་གི་ཚོགས་གྲོགས་པོ་རྒྱ་རས་ཀྱིས་གཤོམས་དང་། ལན་རེས་ལ་ཡང་མ་བབ་སམ་ཞེས་སྨྲས་པ་དང་། རྗེ་ཁོ་བོས་དེ་ཁོ་ན་བྱ་ཡི། རང་སྣང་དབང་དུ་འདུས་པའི་རྣལ་འབྱོར་ལ་མེད་སྙམ་པའི་དོགས་པ་མཛད་མི་དགོས་གསུངས་ནས། སྔོན་ལ་ཁམས་གསུམ་མྱོས་པར་བྱེད་པའི་སྟངས་སྟབས་ཀྱིས་བྱོན་ཏོ། ། དེ་མ་ཐག་སྲིད་པའི་ལྷ་མ་ཡིན་དཀར་ཕྱོགས་སྐྱོང་བ་དག་ཀྱང་མིའི་འགྲོ་བའི་ཚུལ་གྱིས་ལམ་སྲང་དུ་སྦྲ་སྡེ་དང་བཅས་ཏེ་སྤྲུལ་ཏོ། །
3-47
དེ་དག་གིས་རྒྱང་རིང་པོ་ནས། རྗེ་ཉིད་རྒྱལ་པོ་ཆེན་པོ་བཞི་དང་བཅས་པའི་ལྷ་དང་མཁའ་འགྲོའི་ཚོགས་ཀྱིས་མངོན་པར་བཏུད་དེ་ཁ་དོག་ལྔ་པའི་འོད་ཀྱི་དྲྭ་བས་སྦྲེལ་བའི་སྣ་ལ་བྱོན་པ་མཐོང་ངོ་། །དེ་མཐོང་བ་དང་ལྷག་པར་འདུད་པའི་ཡིད་ཀྱིས་ཧ་རི་ཙན་དན་དང་། ཨ་ཀ་རུ་ལ་སོགས་པ་སྤོས་ཀྱི་དྲི་བཟང་པོས་ཀྱང་ཕྱོགས་ཀུན་ལེགས་པར་ཁྱབ་པར་བྱས་ཏེ་བདུག་གོ། །རོལ་མོའི་ཚོགས་ཀྱི་སྒྲ་སྣ་ཚོགས་བསྒྲག་ཅིང་སྙན་པའི་གླུ་གར་གྱིས་བསུ་བ་བྱས་པར་གྱུར་ཏོ། །དེར་མཆོད་པའི་ཚོགས་ཀྱིས་རབ་ཏུ་མཆོད་ཅིང་། ཞོ་མར་དང་། འོ་ཐུད་སོགས་ཀྱི་མཁོ་དགུའི་འབུལ་བ་རྒྱ་ཆེན་པོ་བྱས་སོ། །དེ་དག་བསྣམས་ཏེ་གྲོགས་འདུས་པའི་རྩར་བྱོན་ནས། ཚོགས་ཀྱི་འཁོར་ལོ་ཆེས་བཟང་ཞིང་། གྱ་ནོམ་པ་མཛད་པས་ཀྱང་ཡོ་བྱད་འཛད་པར་མ་ནུས་སོ། །དེ་དག་ཀྱང་ཕྱོགས་གཅིག་ཏུ་སྤུངས་ཏེ་དོར་བས་དཀར་ཐོག་ཐང་ཞེས་གྲགས་པར་གྱུར་ཏོ། །དེ་ནས་ཉེ་བར་བགྲོད་དེ་ཕོ་བྲང་གཡུ་མཚོར་ཕེབས་པ་ན། ནམ་མཁའ་ནས་མིག་མི་འཛུམ་གྱི་ཚོགས་མེ་ཏོག་སྣ་ཚོགས་པ་འཐོར་བ་དང་སྙན་པའི་རོལ་མོ་འཁྲོལ་ཞིང་གདུགས་དང་། རྒྱལ་མཚན་དང་། བ་དན་ལ་སོགས་པ་རྣམས་ཀྱིས་རབ་ཏུ་མཆོད་ཅིང་འདུག་གོ། །ཀུན་བཟོད་ཀྱི་རྡུལ་ཕྲན་རེ་རེའི་རྩེ་ལས་ཀྱང་དཔའ་བོ་དང་དཔའ་མོའི་ཚོགས་ཇི་སྙེད་པ་བྲོ་བརྡུང་ཞིང་གླུ་དབྱངས་ལེན་པ་དང་། 
3-48
གར་བསྒྱར་བ་སོགས་ཕྱི་ནང་གི་མཆོད་པའི་ཚོགས་ཀྱིས་མཆོད་པར་བྱེད་དོ། །བརྒྱ་བྱིན་གྱི་མཚོན་ཆ་རྣམ་པར་བཀྲ་བས་བར་སྣང་ཀུན་གང་བར་གྱུར་ཏོ། །དེའི་ཚེ། མཚོའི་དབུས་ན་བཅོམ་ལྡན་འདས་ལྷ་བཅུ་གསུམ་གྱི་དཀྱིལ་འཁོར་རྟེན་དང་བརྟེན་པར་བཅས་པ་མངོན་སུམ་དུ་ཞལ་གཟིགས་ཏེ། རྟོགས་པའི་ཉམས་ཀྱི་ངང་ནས་མཚོ་ནང་དུ་ཉེས་པས་མ་གོས་པར་བྱོན་ནས། གཙོ་བོ་ཡབ་ཡུམ་ལས་དབང་བཞི་ཡོངས་སུ་རྫོགས་པར་ཞུས་ཏེ་འགྲོ་བའི་དོན་རླབས་པོ་ཆེ་བྱ་རྒོད་ཀྱི་ཉིན་ལམ་བཅོ་བརྒྱད་དུ་ཁྱབ་པར་གྱུར་ཏོ་ཞེས་པའི་ལུང་བསྟན་ཏོ། །བཞུགས་གནས་དབུ་རྩེའི་བྲག་ཕུག་ཏུ་མཛད་དེ། ཕོ་བྲང་གི་ཕྱོགས་བཞིའི་ཁྲིའི་སྟེང་ནས། ལྷ་དང་། མི་དང་། ལྷ་མ་ཡིན་ལ་སོགས་པ་ལ། གསུང་གི་གསང་བའི་མཛོད་མངོན་པར་དབྱེ་སྟེ། ཟབ་མོའི་བདུད་རྩིས་རྒྱུད་ཚིམ་པར་མཛད་དོ། །མཁའ་འགྲོ་དང་མཁའ་འགྲོ་མ་རྣམས་ཀྱིས་ཚོགས་ཀྱི་འཁོར་ལོས་མཆོད་ཅིང་ཏེ་པོར་མཉེས་པར་བྱས་སོ། །གནས་གསུམ་གྱི་སྲུང་མའི་ཚོགས་ཀྱིས་ཇི་ལྟར་བསྒོ་བའི་བཀའ་ཉན་ཅིང་སྙན་པའི་དྲིལ་གསལ་གནས་ཀུན་ཏུ་སྒྲོག་པར་བྱེད་དོ། །གཉིས་སྐྱེས་ཀྱི་ཚོགས་ཀྱང་ཡིད་དུ་འོང་བའི་སྐད་སྒྲོག་ཅིང་ལེགས་པར་འདུད་དེ་འདུག་གོ། །ཅེ་སྤྱང་སོགས་འཇིགས་པའི་གཅན་གཟན་རྣམས་ལྷག་པར་ཞུམ་པའི་ཡིད་ཀྱིས་ཆོས་ཉན་ཅིང་གན་དུ་དང་བའི་བཞིན་གྱིས་གནས་པར་གྱུར་ཏོ། །
3-49
དེ་ནས་བི་མ་ལ་མི་ཏྲའི་ཁྲིའི་སྟེང་དུ་བྱོན་ནས། ཕྱག་གཡས་པ་གཉིས་འཐུང་གི་སྣ་ལྟ་བུ་རབ་ཏུ་བརྐྱང་སྟེ་ཚོགས་པ་རྣམས་ལ་བཀའ་སྩལ་པ། བྲག་བྱ་ཁྱུང་གི་གཤོག་པ་བརྐྱང་པ་འདྲ་བ་ཡ་ཀིའི་འོག་ཏུ། ངའི་སློབ་མ་ས་བཅུ་ནོན་པའི་བྱང་ཆུབ་སེམས་དཔའ་ཞིག་འབྱོན་པར་འདུག་ཅེས་ཚངས་པ་ནམ་མཁའ་ཕུག་ཏུ་རྗེ་རྒོད་ཚང་པ་འབྱོན་པར་ལུང་བསྟན་ཏོ། །དེ་ནས་གྲོགས་རྣམས་དང་ལྷན་ཅིག་པར་ཙ་རི་རོང་འདོད་དབང་ལྷ་མོ་རེ་ཝ་ཏིའི་ཕོ་བྲང་དམར་ནག་རཀྟ་ལ་འབྱོན་པར་ཆས་ཏེ་ཞིབ་མོ་ཁྲག་ཁྲིག་ཏུ་སོན་ཏོ། །དེར་སྐད་ཅིག་ལ་ནོར་འཛིན་གྱི་ཁྱོན་ཆེན་པོ་མངོན་པར་གཡོས། བར་སྣང་ལ་མུན་པའི་ཚོགས་རབ་ཏུ་གཏིབས་ཤིང་། འབྲུག་ལྡིར་བ་དང་། བར་བར་དུ་སྐར་མདའ་འཁྲུག་པ་དང་། གནམ་ལྕགས་འབེབས་པ་དང་། འཇིགས་པའི་ང་རོ་སྒྲོག་པ་སོགས་ཆོ་འཕྲུལ་སྣ་ཚོགས་པས་གྲོགས་རྣམས་དངངས་ཏེ་བགྲོད་པ་ལས་བཟློག་སྟེ་ཕྱིར་ལོག་པར་བརྩམས་པའི་ཚེ། རྗེའི་ཞལ་ནས། སྒོམ་ཆེན་སྲང་ལ་འཇལ་ས་འདུག །ཆོས་པའི་ཚད་རྡོ་བོར་ས་འདུག །གླིང་ཆེན་ཟས་ཀྱི་དངོས་གྲུབ་འདུག །རྣལ་འབྱོར་རྒྱ་རས་འགྲོ་ས་འདུག །ཅེས་གསུངས་ནས། ཆོ་འཕྲུལ་རྣམས་ཟིལ་གྱིས་མནན་ཏེ། བཤན་པ་ནམ་གྲུ་སྤུན་དགུས་རང་སྲོག་གི་སྙིང་པོ་ཕུལ་ནས་མཚོ་ཁར་ཕེབས་སོ། །དེར་མཚོ་ཁ་དོག་དམར་ནག་འཇིགས་སུ་རུང་བའི་དབུས་ན། 
3-50
ཐོད་པ་སྐམ་རློན་ཆོས་འབྱུང་གི་མཁར་རྔམ་པར་བརྩིགས་པ་མི་མགོའི་ཏོག་དང་གཡང་གཞིའི་རྒྱལ་མཚན་བསྒྲེང་བ། རོ་གསར་རྙིང་དུ་མ་གཅལ་དུ་བཀྲམ་པ། བྱ་རྒོད་དང་ཅེ་སྤྱང་གི་ཚོགས་འཁྱུག་ཅིང་དྲག་པོའི་ངུར་སྒྲ་འདེབས་པ། མ་མོ་དང་ཤ་ཟ་མང་པོ་ཕྱོགས་ཀུན་ཏུ་རྒྱུ་ཞིང་མི་བཟད་པའི་ཆོ་ངེ་དྲག་ཏུ་སྒྲོག་པ་དེ་དག་གི་དབུས་སུ་དཔལ་ལྡན་གྱི་ལྷ་མོ་རེ་ཝ་ཏི་ཤིན་ཏུ་ཁྲོས་ཤིང་སྦེག་པའི་ཉམས་ཅན་ཞལ་མཐོང་སྟེ། ཇི་ལྟར་བསྒོ་བའི་བཀའ་སྡོད་དུ་དམ་བཅས་ཤིང་ཕྲིན་ལས་བསྒྲུབ་པར་ཁས་བླངས་སོ། །འདིར་ངའི་བུ་སློབ་དམ་ཚིག་ལ་གནས་པ་ཞིག་སླེབ་ནའང་ཇི་ལྟར་གཉན་ཀྱང་ཁ་ཆར་ལ་སོགས་པའི་ཆོ་འཕྲུལ་གྱིས་ཉེན་པ་མི་འོང་། འོན་ཏེ་བྱུང་ཡང་ཆར་སྐྱོབ་སྐེམས་ནུས་པའི་ཉི་མ་ཞིག་འོང་ངེས་གསུངས་སོ། །མཚོ་དེ་ཉིད་འབྲུག་པའི་བླ་མཚོར་ཡང་གྲགས་སོ། །དེ་ནས་སླར་ཡར་བྱོན་ཏེ་སིནྡྲ་རའི་རྒྱ་མཚོ་དང་ཡོངས་སུ་ཉེ་བའི་བྲག་ཕུག་ཞིག་ཏུ་བཞུགས་པ་ན། མཚོ་དེའི་ནང་ནས་ཌཱ་ཀི་མ་ཡིད་དུ་འོང་ཞིང་གཞོན་ཤ་ཆགས་པ། ལུས་ཕྲ་ཞིང་ནུ་འབུར་རྒྱས་པ། དར་ལའི་སྟོད་གཡོགས་དང་སྐེད་འགེབས་བྱས་པ། སྐྲ་སིལ་བུར་འཕྱང་ཞིང་ཤིན་ཏུ་མཛེས་པའི་བཞིན་རས་ཀྱིས་འགྲོ་བའི་ཡིད་འཕྲོག་པ། མཐོང་བ་ཙམ་གྱིས་དགའ་བདེའི་སྤུ་ལོང་གཡོ་བར་བྱེད་པ་ཞིག་མོས་པའི་ཤུགས་ཀྱིས་བྱུང་ནས་འདི་སྐད་ཅེས་གསོལ་ལོ། །
3-51
ཀྱེ་རྣལ་འབྱོར་པ་ཁྱོད། གངས་རི་དང་གནས་ཆེན་ལ་སོགས་པ་རྣམས་སུ་བགྲོད་པའི་ཚེ། རྟགས་འདི་ལྟ་བུ་རབ་ཏུ་བཅངས་པས་གནས་སྐབས་སུ་མིག་ལའང་ཕན་ཞིང་། མཐར་ཐུག་གི་དགོས་པ་བསམ་གྱིས་མི་ཁྱབ་པ་ཡོད་དོ་ཞེས་མིག་ར་ཕུལ་ལོ། ། གནས་དེ་ལ་ད་ལྟ་ཡང་། རྒྱ་རས་མིག་ར་ཕུག་ཅེས་མིང་དུ་ཆགས་སོ། །དེ་ནས་བགྲོད་དེ་བྲག་གི་འཕྲང་ཞིག་ལ་ཐུགས་འཇིགས་སྐྲག་པའི་ཚུལ་གྱིས་གཉོས་ཀྱིས་ཕྱག་ནས་འཐེན། མགར་དམ་པས་ཞབས་ནས་ཕུལ་ཏེ་བྱོན་ནོ། །དེ་བགྲོད་པ་དང་། གཉོས་ཀྱིས་གྲོགས་པོ་རྒྱ་རས་པ་ཇི་ལྟར་བྱུང་ཞེས་གསོལ་བ་དང་། སྨྲས་པ། རྐུབ་བཙུམས་པ་ཞིག་བྱུང་སྟེ། ང་བླ་མས་ལུང་བསྟན་ཙ་རིར་སླེབ། །རྒྱ་རས་རྐུབ་བཙུམས་ཀྱི་འཕྲང་ལས་ཐར། །འཁོར་བ་མྱ་ངན་འདས་པར་རྟོགས། །ད་འཁོར་འདས་ཀྱི་བདག་པོ་ང་རང་ཡིན། །ཞེས་གསུངས་ནས། པརྤ་ཏ་ཡིད་བཞིན་གྱི་ནོར་བུའི་སྒང་དུ་ཕེབས་སོ། །དེར་གཉོས་ཆེན་པོ་དང་ཐབས་གཅིག་པར་ཁྲི་གཅིག་གི་སྟེང་དུ་བཞུགས་ནས་ཚོགས་ཀྱི་འཁོར་ལོ་གནང་བའི་དུས། འཁོར་གྱི་ཚོགས་ལ་ཁྱེད་དག་ངེད་གཉིས་ཀྱི་མདུན་གྱི་ནམ་མཁའ་ལ། ཇི་ལྟ་བུ་འདུག་པར་མཐོང་། ཞེས་གསུངས་པ་དང་། གསོལ་པ། སྦྲང་བུ་མང་པོ་འཕྱོ་ཞིང་འཕུར་ལྡིང་བྱེད་པ་མཐོང་ངོ་། །ཞུས་པས། མ་དང་མཁའ་འགྲོའི་ཚོགས་ཀྱིས་གང་ནས་འདུག་པ། ཁྱེད་རྣམས་ཀྱིས་ཀྱང་མཐོང་ཐང་བ་ལ། 
3-52
ཞེས་གསུང་ཞིང་། ཐུགས་ཉམས་འུར་ཏེ་འཁྲབས་པས་ལྭ་བ་དཀར་པོ་ལྟ་བུའི་རྡོའི་ངོས་ལ་ཞབས་སེན་གྱི་པདྨའང་རྣམ་པར་བཀོད་དོ། །དེ་ནས་རིམ་པས་ཡུལ་སྟོད་དུ་ཕྱག་ཕེབ་ནས། རྫ་ཁྲོད་ཤར་མ་རྡོ་རྗེ་ཕག་མོའི་ནུ་མ་གཡོན་དང་ཉེ་བའི་ཐུགས་ཁར་གཟིགས་ཏེ། དེ་ན་སྡོང་པོ་ཁ་ཊཾ་གའི་རྣམ་པར་ཡོད་པ་དེའི་དྲུང་དུ་མི་རྟོག་པའི་བསམ་གཏན་ལ་ཟླ་བ་གསུམ་གྱི་བར་དུ་བསྒུལ་བསྐྱོད་མེད་པར་མཉམ་པར་གཞག་སྟེ་བཞུགས་སོ། །དེའི་ཚེ་དུས་མི་རིང་བ་ཞིག་གི་མཚན་མོའི་ཐུན་མཐའ་མ་དང་ཉེ་བར་གྱུར་པའི་ཚེ། སྔོན་ཆད་མ་ཐོས་པའི་རོལ་མོའི་སྒྲ་སྣ་ཚོགས་པ་བསྒྲགས་པ་དང་། གོ་ཤིརྵ་སོགས་བདུག་པའི་དྲིས་ཁོར་ཡུག་ཏུ་གང་བ་དང་། ལྷའི་སྡེ་དུ་མས་མེ་ཏོག་གི་ཆར་དབབ་པ་དང་། ལྷ་དང་། ཀླུ་དང་། ལྷ་མ་ཡིན་དང་། དྲི་ཟ་དང་། ནམ་མཁའ་ལྡིང་རྣམས་ཀྱིས། མེ་ཏོག་དང་། སྤོས་དང་། བྱུག་པ་དང་། དར་དཔྱངས་དང་། ལྡ་ལྡི་དང་། བ་དན་དང་། ལྷབ་ལྷུབ་དང་། རིན་པོ་ཆེའི་རྒྱན་དུ་མ་ཐོགས་ནས་མདུན་དུ་བལྟས་ཏེ་བདར་རོ། །དེའི་ཚེ། ཅི་འདི་ལྟ་བུའི་ལྟས་ངོ་མཚར་བའི་རྐྱེན་གང་ལས་གྱུར་དགོངས་ཏེ་གཟིགས་པ་ན། མདུན་གྱི་ནམ་མཁའ་ལ་ལྷའི་དྲི་གཙང་ཁང་སེང་གེ་དུ་མ་དང་། རིན་པོ་ཆེའི་དྲ་བས་མངོན་པར་ཀླུབས་པའི་ཁྲིས་བཏེག་སྟེ། 
3-53
ཚངས་པ་དང་། ཁྱབ་འཇུག་དང་། བརྒྱ་བྱིན་དང་། སྦྱིན་སྐྱེས་དགྲའི་དབང་པོ་དང་། ལྟོ་འཕྱེའི་བདག་པོ་རྣམས་ཀྱང་དེ་དག་ལ་སྲི་ཞུའི་ཆེད་དུ། གསེར་གྱི་འཁོར་ལོ་དང་། ཁྱུ་མཆོག་གི་རྒྱལ་མཚན་དང་། རྡོ་རྗེ་དང་། མཚོན་ཆ་དང་། ཡིད་བཞིན་གྱི་ནོར་བུ་དག་བཟུང་ནས་གུས་པས་འདུད་ཅིང་གནས་སོ། །སྒྲ་སྒྲོག་གི་ཉི་སྟོན་ཀུན་ཏུ་འོད་ཟེར་གྱི་དྲ་བས་ཁྱབ་པ་དང་། རིན་པོ་ཆེའི་གདུགས་ཀྱི་འོད་ཀྱིས་ས་ཐམས་ཅད་སྣང་བར་བྱས་སོ། །རབ་འབྱམས་ཀྱི་ཞིང་ཀུན་ནས་རྒྱལ་བའི་སྲས་བགྲང་བ་ལས་འདས་པ་འདུས་ཏེ། དེ་དག་གིས་མདུན་ན་མཆོད་ཅིང་འདུག་གོ། ། དེ་ནས་ཐུགས་ལ་འདི་དག་གང་གི་མཐུའོ་སྙམ་པ་དང་། ལྷའི་བུ་དང་བུ་མོ་རྣམས་ཀྱིས་སྨྲས་པ། འདི་ནི་ཡང་དག་པར་རྫོགས་པའི་སངས་རྒྱས་བདུན་རྟེན་ཅིང་འབྲེལ་བར་འབྱུང་བའི་ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བའི་མཐུ་ལགས་སོ། །ཞེས་སྨྲ་བ་གསན་མ་ཐག །ཐུགས་ཆོས་ཀྱི་རྗེས་སུ་འབྲང་བའི་དད་པ་ཆེར་སྐྱེས་ནས་དེ་དག་གི་དབུས་སུ་གཟིགས་པ་ན། རིན་པོ་ཆེའི་གནྡྷོ་ལ་དེ་དག་སྒོ་རང་བྱུང་གིས་བྱེ་བར་གྱུར་ཏོ། །དེ་རྣམས་ཀྱི་ནང་ན་སྔོན་གྱི་སངས་རྒྱས་རྣམ་པར་གཟིགས་ལ་སོགས་པ་སངས་རྒྱས་རབས་བདུན། སྐུ་བལྟ་བས་མི་ངོམས་པ། རབ་ཏུ་བརྗིད་ཅིང་མཛེས་པ། མཚན་དཔེའི་འོད་འཕྲོ་བ་བཞུགས་པ་ཞལ་གཟིགས་སོ། །
3-54
གསུང་གསང་བ་བསམ་གྱིས་མི་ཁྱབ་པའི་ཆོས་ཀྱི་སྒྲ་ཆེན་པོ་གསན་ནོ། །ཇི་ལྟ་བ་དང་། ཇི་སྙེད་པའི་དོན་མཐའ་དག་མངོན་སུམ་དུ་དྲི་མ་མེད་པར་གཟིགས་སོ། །དེ་ནས་སངས་རྒྱས་རབས་བདུན་དང་། བྱང་ཆུབ་སེམས་དཔའ་རྣམས་མགྲིན་གཅིག་ཏུ། ཀྱེ་རིགས་ཀྱི་བུ། རང་གི་རྟོགས་པའི་གནས་ལུགས་མ་ལུས་པ་གཞན་ལ་ལེགས་པར་འདོམས་ཤིག་དང་། ཕན་འདོགས་རྒྱ་ཆེན་པོ་འབྱུང་བར་འགྱུར་རོ། །ཞེས་བཀའ་ཡི་གནང་བ་སྦྱིན་ནས་མི་སྣང་བར་གྱུར་ཏོ། །དེ་ནས་ཟག་པ་དང་ཟག་པ་མེད་པའི་ཆོས་བླང་དོར་དུ་བྱ་ཞིང་། ཆོས་དང་ཆོས་མ་ཡིན་རྣམ་པར་འབྱེད་པ། རང་དང་གཞན་གྱི་དོན་རླབས་པོ་ཆེ་བདེ་བླག་ཏུ་འགྲུབ་པར་བྱེད་པའི་མན་ངག །རྟེན་ཅིང་འབྲེལ་བར་འབྱུང་བའི་ཆོས་ཀྱི་སྒོ་གནད་བདུན་གྱིས་བཅིངས་ཏེ་བསྟན་བཅོས་རྒྱ་ཆེན་པོ་བརྩམས་སོ། །དེ་ནས་བསམ་གཏན་ལས་བཞེངས་ཏེ། ཞབས་འབྲིང་བ་རྣམས་ཀྱང་སླར་བྱུང་བ་དང་ཆབས་ཅིག་ཏུ་ཀོང་པོ་ནས་མདོ་ཁམས་ཀྱི་སྟོད་ཀྱི་བར་ཞབས་ཀྱིས་བཅགས། བོན་མང་དག་སངས་རྒྱས་ཀྱི་བསྟན་པ་ལ་བཙུད་ནས་སླད་མ་བྱར་ཡུལ་གྱི་ནང་དུ་ཕེབས་ཏེ། ལ་ཞིག་བགྲོད་དེ་སོང་བ་ན། རྫི་བོ་ཞིག་དང་ཕྲད་པས་དེ་ན་རེ། བླ་མ་སློབ་དཔོན་ག་ནས་བྱོན་ཟེར་བ་ལ། འམ་བུས་ལ་འདི་ལ་འོངས་ཞེས་གསུངས་ནས། འམ་བུ་ལ་ཞེས་པར་གྲགས་སོ། །
3-55
དེ་ནུབ་རྡོའི་བྱ་སྐྱིབས་ཤིག་ཏུ་གདན་ཕབ་སྟེ་བཞུགས་པ་ན། བྱེས་སུ་སླེབ་པ་ལ་འདི་སྐྱིད་པར་བྱུང་གསུངས་པས། སྐྱིད་ཕུག་ཏུ་མིང་ཆགས་པར་གྱུར་ཏོ། །དེར་ཡེ་ཤེས་ཀྱི་མཁའ་འགྲོ་མཆེད་ལྔས་གསེར་ཕུལ་བ། དུས་མཐའ་མར་གནས་ཆེན་ཙ་རི་ཏྲ་འཛིན་པ་ལ་ཕན་པའི་ཕྱིར་དུ་བྲག་དེའི་ལོགས་སུ་གཏེར་དུ་སྦས་ཏེ་བཞག་གོ། །དེ་ནས་ཞབས་འབྲིང་བ་གཉིས་རང་ཡུལ་དུ་འགྲོ་ཞེས་ཞུས་པས། རྗེའི་ཞལ་ནས། ཕ་ཡུལ་བདུད་ཀྱི་ཕོ་བྲང་ན། །ཉོན་མོངས་ཀྱི་ཇག་པ་མགོ་ལོ་རྒོད། །འཕགས་པའི་ནོར་བདུན་འཕྲོག་ཉེན་ཡོད། །སྐྱེལ་མར་བླ་མའི་མོས་གུས་ཁྲིད། །ཅེས་སོགས་ཞལ་གདམས་མགུར་དུ་བཞེངས་ནས་གནང་ངོ་། །དེ་ནས་རྗེ་དཔོན་སློབ་གཉིས་ཀྱིས་ངམ་ཤོད་ལ་བྱོན་པ་ན། མི་རྒོད་ཀྱི་ཇག་པ་དང་ལན་མང་དུ་ཕྲད་ཅིང་། བརྡེག་འཚོག་སྣ་ཚོགས་པ་བྱས་ཏེ་ཀ་ཅ་གང་འདུག་ཏེ་སོང་ངོ་། ། དེ་སོང་བ་དང་། ཅི་སྙིགས་དུས་མི་ངན་གྱི་སྤྱོད་པ་འདི་ལ། ནོར་རྫས་ཀྱི་ཁུར་པོ་མེད་ཀྱང་། ཆོམ་འཕྲོག་བྱེད་པ་ཚོ་སྙིང་རེ་བརྩེ། འོན་ཀྱང་ཁྱེར་ཅིས་ལན་པར་ཡིན་དགོངས་ནས་གཟིགས་པ་ན། རྫས་ཀྱི་རྟེན་འབྲེལ་མེ་ལྕགས་གཅིག་སྣོད་ན་འདུག་པ་དེས་ལན་པར་མཁྱེན་ནས་དེ་བསྐྱུར་བས། ཕྱིས་དགྲ་ཇག་དང་ཕྲད་མ་མྱོང་གསུང་ངོ་། །དེ་ནས་སྡང་བ་མེད་པར། དཔལ་ཟབ་ཡང་ལྷུན་གྱིས་གྲུབ་པའི་གཙུག་ལག་ཁང་གི་མགུལ། 
3-56
ཨུ་རྒྱན་གྱི་མཁན་པོ་པདྨ་བཛྲ་གྱིས་སྒྲུབ་པའི་གནས་ཆེན་པོ། ཚང་ཚིང་དང་འདབ་ཆགས་སྣ་ཚོགས་པས་བརྒྱན་པ། རི་དྭགས་ཀྱི་ཚོགས་མང་པོ་དགའ་བདེར་སྤྱོད་ཅིང་བྲོ་བརྡུང་བ། ཤིན་ཏུ་དབེན་པའི་གནས་མཆིམས་ཕུར་བྱོན་པའི་ཚེ། ཆོས་པའི་གཟུགས་བརྙན་དུ་བཅོས་པ་འགའ་ཡི་སྤྱོད་འགྲོས་ལ་ཁྲེལ་ནས་མགུར་བཞེངས་པ། ཚིག་ལ་མཁས་པའི་སྟོན་ཆེན་ཀུན། །ཐ་སྙད་ཀྱི་ཚིག་ལ་མཁས་ལགས་ཀྱང་། །ཆོས་བརྒྱད་ཀྱི་དགྲ་ལ་ལྟད་མོ་ཆེ། །རང་ངོ་ཤེས་པའི་སྟོན་ཆེན་ཉུང་། །ཞེས་སོགས་གསུངས་ནས། སྒོམ་པ་གཏེར་ཁུང་བ་དང་། སློབ་དཔོན་ཇོ་སྲས་ཀྱིས་སྤྱན་དྲངས་ཏེ་གྲར་ཕེབས་སོ། །དེར་ཆོས་འཁོར་ཞིག་མཛད་དེ་འབུལ་བའི་ཡོ་བྱད་ཇི་སྙེད་པ་བསྣམས་ནས་སྣ་ཕུར་བྱོན་ཏེ། རྗེ་གྲུབ་ཐོབ་ཆེན་པོའི་སྐུའི་དབོན། ཆོས་ཀྱི་རྒྱལ་སྲིད་ལ་མངོན་པར་དབང་བསྐུར་བའི་སྐྱེས་སུ་ཕུལ་ལོ། །དེ་ནས་ཐུགས་ལ་གནས་ཆེན་ཙ་རི་ནི་འཁོར། ལྷག་པའི་ལྷ་ཡིས་རྗེས་སུ་བཟུང་ཞིང་རྒྱལ་བ་དུ་མའི་ཞལ་ཡང་མཐོང་། ད་རྒྱལ་བས་ཞབས་ཀྱིས་བཅགས་ཤིང་། དགྲ་བཅོམ་པ་དུ་མ་བཞུགས་པའི་གནས། གངས་རི་ཆེན་པོ་ཏི་སེ་ལ་འགྲོའོ་ཞེས་དགོངས་ནས་འབྱོན་པར་བརྩམས་པའི་ཚེ། བུ་སློབ་དང་ཉེ་དུ་རྣམས་ཀྱིས་གསོལ་བ། བླ་མ་རིན་པོ་ཆེ་ན་ནིང་ཙ་རི་ལ་བྱོན་ནས་ཀྱང་རིང་དུ་མ་བྱོན། ད་ཏི་སེ་ལའང་མི་འབྱོན་པར་ཞུ། 
3-57
ངེད་རྣམས་ཀྱི་འདྲེན་པར་བཞུགས་སུ་ཅིས་མི་གནང་། ཞུས་པ་དང་། རྗེའི་ཞལ་ནས། ང་ཡོན་བདག་བཟང་སར་མི་སྡོད། འདྲིས་མེད་ཀྱི་ཡུལ་དུ་འགྲོ་ཞེས་མགུར་བཞེངས་པ། ཡོན་བདག་བཟང་སར་མི་སྡོད་པར། །འདྲིས་མེད་ཡུལ་དུ་འཁྱམ་པ་འདི། །གྲོས་ཉེས་བཤོམ་པ་མ་ཡིན་ཏེ། །ངོ་བསྲུང་གི་ཐག་པ་གཅོད་པ་ཡིན། །ཞེས་སོགས་བཀའ་སྩལ་པ་དང་། འབུལ་བ་ཆེར་ཕུལ་ནས། ཡང་གསོལ་པ། འགྲོ་བའི་བླ་མ་ཆེན་པོ། ལན་གཅིག་ཅིས་ཀྱང་ཏི་སེ་ལ་མི་ཐེགས་པ་ཞུ་ཞེས་ནན་བགྱིད་པ་ལ་མགུར་བཞེངས་པ། ལྷ་མི་དགོངས་དང་རྒྱ་རས་འདི། །འགྲོ་འོ་ཟེར་ནས་སྡོད་ཀྱི་གདའ། །སྡོད་དོ་ཟེར་ན་འགྲོ་ཡི་གདའ། །དེ་ཡི་རྒྱུ་མཚན་བཤད་ཀྱིས་ཉོན། །ཏི་སེར་འགྲོ་བར་དམ་བཅས་ནས། །ཞེས་སོགས་གསུངས་ནས་ཏི་སེར་འབྱོན་པ་བཤོལ་ཏེ། ཆུ་བོ་རིར་བཙད་པོ་རྣམས་ཀྱིས་བཤོས་བཟང་པོ་སྦྱར་ཏེ་བཞུགས་པ་ན། འཁོར་འདུས་པ་མང་བའི་སྟབས་ཀྱིས་ཐུགས་སུན་ཏེ་འཁོར་རྣམས་ལ་གདམས་པ། ཁྱེད་རྣམས་ཀྱང་སྒྲུབ་པ་ཁོ་ན་ལ་འབད། འཆི་བའི་དུས་སུ་ཆོས་མིན་པ་ཅིས་ཀྱང་མི་སྟོངས་པ་ཡིན། སྒྲུབ་པ་བྱེད་པའི་དུས་སུ་མཐུན་རྐྱེན་དང་འགལ་རྐྱེན་གང་བྱུང་ནའང་། དེ་ལ་ཆེད་དུ་མི་འཛིན་པ་ཞིག་དགོས་པ་ཡིན་གསུངས་ནས་དཔེ་དོན་དྲུག་གི་མགུར་བཞེངས་སོ། ། དེ་ནས་བཙད་པོ་རིག་སྔགས་ཀྱིས་སྐྱིད་སྨད་སྦུར་བུ་ཀློང་རྡོལ་དུ་སྤྱན་དྲངས་ཏེ་དགོན་པ་འདེབས་པར་ཞུ་བ་མང་དུ་གསོལ་བས་གནང་སྟེ། 
3-58
སྤྱིལ་པོ་འགའ་ཞིག་བཏབ་སྟེ་བཞུགས་སོ། །དེའི་དུས་སྐུའི་ཉེ་བར་གནས་པ། བྱང་ཆུབ་གཞོན་ནུ་བྱ་བ་ཡོད་པ་དེའི་བསམ་པ་ལ། ང་ནམ་ཟླ་སྟོན་གྱི་སྐབས་སུ་གང་དུ་ཕྱིན་ཀྱང་རྙེད་པ་ཆེར་ཐོབ་པའི་སྐབས་ལ། ཅི་འདིར་དོན་མེད་དུ་ལྟོ་ཕྱིད་ལ་སྡོད་དགོས་པར་འདུག་སྙམ་པའི་ཚེ། རྗེའི་ཐུགས་ལ། ཨ་ཙ་མ། ངས་ཁོ་ལ་སྡོད་བྱས་པ་ནི་མེད། ལས་ལ་ཆོས་སུ་མ་མཐོང་བ་ཞེས་གསུངས་ནས། ན་མོ། མི་ཆེན་བྱང་ཆུབ་གཞོན་ནུ་བ། །གསང་སྔགས་སྡོང་པོ་བླ་མ་ཡི། །ལས་ལ་ཆོས་སུ་མ་མཐོང་བ། །ཞེས་སོགས་གདམས་པར་མཛད་དོ། །དེ་ནས་རྗེའི་ཐུགས་དགོངས་ལ། ད་འབྲི་ཁུང་དུ་རྗེ་འཇིག་རྟེན་གསུམ་གྱི་མགོན་པོའི་སྤྱན་སྔར་ཕྱིན་ཏེ། ཟབ་ཆོས་འགའ་ཞུའོ་སྙམ་པ་འཁྲུངས་པ་ན། གཏེར་ཁུང་པ། གཅེན་པོ་སྒོམ་པ། སྟོན་རིང་བ་དང་དཔོན་སློབ་བཞིས་བགྲོད་པར་ཆས་སོ། །དེ་ཡང་ཉི་མ་གཅིག་གིས་བགྲོད་པ་དང་། ཉེ་བར་གྱུར་པ་ན། རྗེ་འཇིག་རྟེན་གསུམ་གྱི་མགོན་པོའི་ཞལ་ནས། ཉེ་བར་འཁོར་དུ་གནས་པ་གང་སུ་དག །དེ་རིང་དྲོ་ཀའི་དུས་ལ་མངོན་པར་བབ་པ་ན། ང་ལ་ཕྲད་པའི་མི་ཞིག་ཡོང་བ་ཡོད་པས། དེའི་ལམ་གྱི་གེགས་མ་བྱེད་པར་ངའི་དྲུང་དུ་ཐོང་ཞིག་ཅེས་གསུངས་སོ། །དེའི་ཉིན་རྗེ་དཔོན་སློབ་ཀྱིས་འབྲི་ཁུང་དུ་སོན་ཏེ། 
3-59
སྐྱོབ་པའི་རིམ་གྲོ་པ་ཞིག་དང་ཕྲད་དོ། །དེ་ལ་གསུངས་པ། ཀྱེ་ངེད་རྣམས་རྗེ་སྐྱོབ་པའི་ཞལ་བལྟ་ཞིང་གསུང་གི་བདུད་རྩི་ཡང་མྱང་བར་སྤྲོ་ན། ཅི་ཁྱོད་ཀྱིས་བྱ་མ་རྟ་བྱ་བར་བགྱིད་དམ། དེས་གསོལ་པ། བླ་མ་རིན་པོ་ཆེ་ནི་ད་ལྟ་སྐུ་མཚམས་དམ་པར་བཞུགས་སོ། །གསུང་གི་བདུད་རྩིས་ངོམས་པར་བྱེད་པ་ལྟ་ཞོག །ཞལ་ཡང་མཐོང་བར་མི་ནུས་སོ། །ཞེས་བསྒོ་བ་གསན་མ་ཐག་པར་མྱུར་བའི་སྟབས་ཀྱིས་གུང་ཐང་ཕྱོགས་སུ་བྱོན་ནོ། །དེའི་ཚེ་སྐྱོབ་པས་འཁོར་རྣམས་ལ། དེ་རིང་མི་མ་བྱུང་ངམ་ཞེས་གསུངས་པས། བྱ་བྲལ་བ་འདི་འདྲ་ཞིག་བྱུང་སྟེ་ཕྱིར་ལོག་པར་གྱུར་ཏོ། །ཞེས་གསོལ་པས། ཁྱེད་ཅག་གིས་གོ་མ་ཆོད་པ་ཞིག་བྱས། འོན་ཀྱང་ཕྱིར་སློག་ནུས་སམ། དེ་ལྟ་མིན་ན་ཞྭ་འདི་གཏོད། རྗེ་ཕག་མོ་གྲུ་པའི་དབུ་ཞྭ་ཡིན་ཅེས་སྩལ་ཏེ། དེ་དག་གིས་ཕྱིར་བསྙེགས་པས་སྦྲང་ཞེས་པའི་ཡུལ་གྲུའི་ཉེ་ལོགས་སུ་ཟིན་ཐབས་དུ་མས་ཀྱང་ལྡོག་པར་མ་ནུས་ཏེ་ཞྭ་ཕུལ་ལོ། །དཔོན་སློབ་རྣམས་ཚ་ཁད་ཀྱི་བགྲོད་པར་སླེབ་པ་ན། ཞང་འགྲོ་བའི་མགོན་པོས་མངོན་པར་མཁྱེན་ཏེ། དེ་རིང་རྒྱ་གར་གྱི་རྗེ་བཙུན་ནཱ་རོ་ཏ་པ་འབྱོན་པར་ཡོད་པས། རང་ཅག་དཔོན་སློབ་བསུ་བ་ལ་འགྲོ་གསུང་ནས། དར་ཁྲ། གདུགས་རྒྱལ་མཚན་དང་། བ་དན་དང་། རོལ་མོའི་བྱེ་བྲག་དཔག་ཏུ་མེད་པ་བསྣམས། 
3-60
འཁོར་ཚོགས་བརྒྱ་ཕྲག་དུ་མས་བསྐོར་ནས་བྱོན་ཏོ། །དེར་འཁོར་བླ་མ་ཆེན་པོ་ཞིག་ཡོད་ངེས་བསམས་ཏེ་བལྟས་པས། རེ་ཞིག་ན། བྱ་བྲལ་བ་དཔོན་སློབ་བཞི་པ་ཞིག་ཡོད་པ་རིང་པོ་ནས་མཐོང་ངོ་། །དེ་མ་ཐག་དེ་རྣམས་ཡི་མ་རངས་ཏེ། ཞང་ལ་གསོལ་ལོ། །བླ་མ་ཞང་རིན་པོ་ཆེ་ནི་ཤིན་ཏུ་མཉེས་ཏེ། རིམ་གྱིས་སྤྱན་དྲངས་མཇལ་བས་ཐུགས་གཉིས་མེད་དུ་གྱུར་ཏོ། ། ཞང་གི་ཞལ་ནས། ཁྱེད་ལྟ་བུའི་སྐྱེས་བུ་རབ་ཏུ་བྱུང་ན། བསྟན་པ་དང་སེམས་ཅན་མང་པོ་ལ་ཕན་ཆེན་པོ་ཐོགས་པར་འདུག་གསུངས་པ་ལ། གསོལ་བ། བདག་ལ་བླ་མའི་བཀའ་མེད་པས། མི་མཆིའམ། ཞང་གི་ཞལ་ནས། བཀའ་ང་ཡིས་བྱིན་པས་ཆོག་གི། ཅི་ཕྱིར་རབ་ཏུ་བྱུང་བའི་རྟགས་མི་བཟུང་། དེར་ཐུགས་ལ་མདང་གི་རྨི་ལམ་བཟང་བ་དེ་འདི་ཡིན་ཐང་དགོངས་ཏེ། གསོལ་པ། ཇི་ལྟར་སྔོན་གྱི་དེ་བཞིན་གཤེགས་པ་དག་གིས་ཀྱང་གཙུག་ཕུད་བྲེགས་པ་བཞིན་དུ། བདག་ཀྱང་དེ་ལྟར་བགྱིའོ་ཞུས་ནས། དབུ་སྐྲ་མཐོན་ཀའི་མདངས་ཅན། གསེར་གྱི་སྐྲ་བཞར་གྱིས་གསིལ་བའི་ཚེ། བླ་མ་ཞང་ནི་རབ་ཏུ་མཉེས་ཏེ། གངས་ཅན་གྱི་ལྗོངས་འདིར་མི་ང་ལས་ལྷག་པ་སུ་འདུག་གི། དཔལ་ནཱ་རོ་པའི་དབུ་སྐྲ་ངས་བཅད་པ་ཡིན་གསུངས་ནས། བླ་མ་རྒོད་མ་དཀར་མོ་ཞིག་ལ་བཅིབས་ཏེ་བརྒྱུགས། མཆོད་པའི་ཆས་རབ་ཏུ་མང་པོས་གཙུག་ལག་ཁང་ལ་སོགས་པ་བརྒྱན་པར་བྱས་སོ། །
3-61
དེ་ཙ་ན་རྗེས་རིགས་ཀྱི་ཅོད་པན་འདི་བཞེས་ནས་བཞུགས་པ་ན། བླ་མ་ཞང་གི་ཞལ་ནས། ཁོ་བོའི་ཞྭ་རྒོད་པོས་ནམ་འཕང་བསྐྱོད་པ་འདྲ་བ་འདིས་ས་གསུམ་འགེངས་བསམ་པ་ཡོད་ཀྱང་རྒན་པོས་གཡས་ཆུང་བྱེད་པའི་བར་ལ། ཞྭ་རྟ་རྨིག་འདྲ་བ་འདི་བཞེས་གྲུབ་འདུག་པས། ད་ནི་འདིས་རྒྱལ་ཁམས་ཐམས་ཅད་ཁེངས་པ་ཞིག་ཡོང་བར་འདུག་གསུང་། དེར་བར་མ་རབ་བྱུང་དང་། མཁན་ཆེན་བཟད་པ་ལས་དགེ་ཚུལ་མནོས་སོ། །མཁན་པོ་ཞང་གིས་མཛད། སློབ་དཔོན་རྩི་འདུལ་བ་འཛིན་པ་ཐུགས་རྗེ་བྱང་ཆུབ་ཀྱིས་མཛད། དགེ་སློང་གི་དགེ་འདུན་གྲངས་ཚང་བའི་དབུས་སུ། གསོལ་བ་དང་བཞིའི་ལས་ཀྱིས་བསྙེན་པར་རྫོགས་ཏེ། ཆོས་གོས་རྣམ་པར་གསུམ་བགོས། ལྷུང་བཟེད་དང་བྱ་མ་བུམ་ཐོགས། སྦྱངས་པའི་ཡོན་ཏན་ལ་གནས་ཤིང་། ཞི་བ་དང་། དུལ་བ་དང་། དེས་པའི་ངང་ཚུལ་བཟང་པོས། ལྷ་མི་རྣམས་ཀྱི་ཕྱག་གི་གནས། ཆོད་པའི་ཡུལ། ངུར་སྨྲིག་གི་རྒྱལ་མཚན་འཛིན་པ་རྣམས་ཀྱི་གཙོ་བོ་ཆེན་པོར་གྱུར་ཏོ། །དེའི་ཚེ་དགུང་ལོ་སོ་གསུམ་བཞེས་པ་ཡིན་ནོ། །དེ་ནས་མཁན་ཆེན་ཞང་གི་དྲུང་དུ། བདེ་མཆོག་ལྷ་ལྔ་དང་ལྷན་སྐྱེས་ཀྱི་སྒྲུབ་ཐབས་དང་བྱིན་རླབས། རྡོ་རྗེ་དྲིལ་བུ་པས་མཛད་པ་དང་། ཨ་བྷ་ཡཱ་ཀ་རས་མཛད་པ། དཔལ་རྒ་ལོའི་མན་ངག་ལ་སོགས་པ་དང་། མགོན་པོ་ཕྱག་བཞི་པའི་དབང་། 
3-62
མངོན་འབྱུང་སོགས་ཡོངས་གྲགས་ཀྱི་རྒྱུད་ཉེར་བཞི་དང་། མགོན་པོ་ཀླུ་སྒྲུབ། རྡོ་རྗེ་དྲིལ་བུ་པ། ཨཱརྻ་དེ་ཝ། ནག་པོ་པ། རྡོ་རྗེ་གདན་པ། ཨ་བྷ་ཡ་ཀ་ར་སོགས་རྒྱ་གར་གྱི་སློབ་དཔོན་རྣམས་ཀྱིས་མཛད་པའི་བསྐྱེད་རྫོགས་ལས་སྦྱོར་དང་བཅས་པའི་གཞུང་། ཙ་མི་དང་། རྒྭ་ལོ་ནས་བརྒྱུད་པ་རྣམས་ཡོངས་སུ་རྫོགས་པར་གསན་ནོ། །གནད་རྣམས་ཀྱང་ལེགས་པར་སྩལ། དེ་ཉིད་ཀྱི་བཀའ་རྒྱའི་སྐོར་ལ་སོགས་པའང་གསན། མཁན་ཆེན་བཟད་པ་ལས་འདུལ་བ་མདོ་རྩ་བ་བསླབས། གཞན་ཡང་ཆོས་སྐོར་མང་རབ་གསན་ནོ། ། དེའི་ཚེ་བླ་མ་ཞང་གི་གཏོར་བཤོམ་པ་རབ་ཏུ་བྱུང་བ་གཞོན་ནུ་ཞིག་རྗེ་ལ་དད་དེ། ཞབས་ཕྱིར་འགྲོ་བར་འདོད་པ་དང་། རྗེ་ཡང་འདི་བདག་གི་གཏོར་གཡོག་ལ་བྱུང་ན་ཅི་མ་རུང་སྙམ་པ་ཞང་གིས་དགོངས་ཏེ། ཡེ་ཤེས་མགོན་པོ་རང་རྒྱ་རས་པའི་ཕྱི་ལ་རྒྱུགས། གཉིས་ཀ་དགྱེས་པ་ཞིག་བྱའོ་གསུངས་པས་དགའ་སྟེ། རྗེའི་སློབ་མར་ཁས་བླངས་སོ། །དེ་ནི་ཕྱིས་པ་རི་བ་མཁྱེན་པའི་མངའ་བདག་ཅེས་པ་ཀུན་ཏུ་གྲགས་པའི་མཁས་གྲུབ་ཆེན་པོ་བསྟན་པ་ལ་བྱ་བ་རླབས་པོ་ཆེ་བགྱིས་པ་ཞིག་བྱུང་ངོ་། །དེའི་མིང་དང་། ཆོས་སྐྱོང་གི་མཚན་གཅིག་པར་སོང་བས། ཆོས་སྐྱོང་ཡང་ཕྱི་བཞིན་དུ་འབྲང་ངོ་། །དེ་ལྟ་ནའང་།ད་དུང་རྟེན་འབྲེལ་ཞིག་མཛད་དགོངས་ཏེ། རྗེ་ཉིད་འབྱོན་པའི་ནངས་པར། 
3-63
བུ་རམ་ལ་སོགས་པས་གཞོན་ནུ་རྣམས་དགའ་བར་བགྱིས་ཏེ། ཞང་འགྲོ་བའི་བླ་མའི་ཆོས་སྐྱོང་ཕྱག་བཞི་པ་ལྕམ་དྲལ་འཁོར་དང་བཅས་པ། རྒྱ་རས་པའི་ཕྱི་ལ་སོང་ཞེས་བརྗོད་ཅེས་བསྒོས་སོ། །དེ་ནས་རྗེ་ཉིད་འགྲོ་བར་ཞུགས་པའི་ཚེ། དེ་དག་གིས་དེ་ལྟར་བགྱིས་པ་དང་། ཁྱིའི་ཚོགས་ཀྱང་རྗེས་སུ་འབྲང་ངོ་། །དེ་ཞང་གིས་གཟིགས་པ་དང་། ཆོས་སྐྱོང་འཁོར་དང་བཅས་པ་ཡང་ཆས་ཟིན་ཏེ་འབྱོན་པ་གཟིགས་སོ། །དེ་ནས་ཞང་གིས་ཁོ་བོའི་ཆོས་སྐྱོང་གི་བཀའ་རྒྱ་རས་པ་ལ་བབ་བོ་ཞེས་བཀའ་སྩལ་ལོ། །དེ་ནས་གྲའི་རེའུ་མིག་ཏུ་བྱོན་ནས་དབྱར་བཞུགས་མཛད་པ་ན། མི་ཞིག་ན་རེ། སྣ་ཕུ་བ་རྣམས། ཁྱེད་ལ་རང་རེའི་བརྒྱུད་པ་མི་འཛིན་པར་རབ་ཏུ་བྱུང་ནས་ཞེས་གཤེ་བར་བྱེད་ཀྱིན་འདུག་ཅེས་གསོལ་པ་དང་། མགུར་འདི་གསུངས་སོ། །བླ་མའི་ཞབས་ལ་ཕྱག་འཚལ་ལོ། །རྒྱ་རས་རབ་ཏུ་བྱུང་བ་ལ། །རྒྱལ་ཁམས་མི་ཚོ་ཁ་མ་མཐུན། །དེ་ལ་གླུ་ལེན་གསན་པར་ཞུ། །ང་རྒན་པོ་རབ་ཏུ་བྱུང་བ་དེ། །ཆོས་པ་བཟང་དུ་མི་འགྲོ་སྟེ། །སྒོམ་མ་ལ་རིབ་མ་བཙུགས་པ་ལགས། །བློ་ཤོ་རྒོད་པར་མི་དགོངས་འཚལ། །ཞེས་སོགས་གསུངས་ནས། གཏེར་ཁུང་པས་སྤྱན་དྲངས་ཏེ། བརྒྱ་འབུལ་དང་། ན་བཟའི་བྱེ་བྲག་མང་པོས་ཐུགས་མཉེས་པར་བྱས་སོ། །དེའི་དགུན་སྐྱིད་སྨད་དུ་ཇོ་བོ་རིག་སྔགས་ཀྱིས་གདན་དྲངས་ཏེ་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བ་ན། 
3-64
རྗེ་ཞང་སྐུ་གཤེགས་ཞེས་བརྣག་མིན་གྱི་གཏམ་གསན་པས། ལྷག་ཁོང་སྙོམ་པར་གྱུར་ནས། མཆོད་པའི་རྫས་དུ་མ་ཐོགས་ཏེ། གུང་ཐང་དུ་གདུང་གི་མཆོད་པ་ལ་བྱོན་ནོ། །འདུས་པའི་ཚོགས་ལ་མཁོ་དགུའི་ཡོ་ལང་ཇི་སྙེད་པ་བསྟབས་ནས། སྐུ་གདུང་མཆོད་པའི་སྤྲིན་ཕུང་གིས་མཉེས་པར་མཛད་དོ། །དེ་དུས་སྟོན་པ་འགའ་བྱུང་ནས་མངོན་པའི་ང་རྒྱལ་གྱི་སྒོ་ནས་ཆོས་ཀྱི་འབེལ་མཆིད་བྱེད་པ་ལ། ཁྱོད་ང་རྒྱལ་མ་ཆེ། ཆོས་པ་བྱ་བ་ང་རྒྱལ་ཞི་བ། བདག་འཛིན་བློས་ཐོངས་པ་ཞིག་དགོས་པ་ཡིན་མོད་གསུངས་པས། ཁོ་ན་རེ། ཆོས་པ་ང་རྒྱལ་མི་ཆེ་རུ། །གཏན་ཚིགས་ཁོང་ནས་རྒྱས་པ་ཡིན། །ཁྱོད་ཀྱིས་གནས་ལུགས་རྟོགས་པ་ན། དེའི་རྒྱུ་མཚན་ཅིག་གསུངས་དང་། ཟེར་བ་ལ། ཚིག་གིས་རྒྱགས་པའི་སྟོན་ཆེན་གྱིས། །སྒོམ་ཆེན་རྣམས་ལ་སྡིག་པ་བསག །བདག་གི་ཁ་གཟུང་གཞན་ལ་རྒོལ། །ཕྱོགས་རིས་ཅན་ལ་སྙིང་རེ་ཚིམ། །ཞེས་སོགས་གནང་བ་དང་སྟོན་པ་དང་བཅས་པའི་ཚོགས་པ་རྣམས་མངོན་པར་ཡི་རངས་ཏེ་དད་པ་ཆེར་གྱུར་ནས། གསུང་གི་བདུད་རྩིས་ངོམས་པར་བྱས་སོ། ། དེ་ནས་ཀློང་རྡོལ་དུ་བྱོན་ནས། འདག་སྦྱར་ལོ་གསུམ་མཛད་དེ་བཞུགས་པའི་དུས། བླ་མ་ལ་གསོལ་བ་བཏབ། ཡི་དམ་ཆོས་སྐྱོང་ལ་ཡང་ས་སྡེ་བཙུགས། རྩེ་གཅིག་ཏུ་བསམ་གཏན་ལ་སྙོམས་པར་ཞུགས་པ་ན། ཕྱོགས་ཀུན་ཏུ་སྙན་པའི་དྲིལ་འགྲོ་བ་ཐམས་ཅད་ཀྱིས་བསྒྲགས་པས། 
3-65
ཟང་ཟིང་གི་ཡོ་བྱད་ནི་ཆར་ལྟར་དུ་བབ། དད་ལྡན་གྱི་བུང་བ་ནི་ནམ་མཁའི་སྐར་ཚོགས་བཞིན་བརྒྱ་ཕྲག་དྲུག་ཅུ་ཙམ་འདུས། རྒྱུད་སྡེའི་དགོངས་འགྲེལ་དང་བསྐྱེད་རྫོགས་ཀྱི་མན་ངག་སྟེ། ཟབ་པ་དང་རྒྱ་ཆེན་པོའི་ཆོས་ཀྱི་འཁོར་ལོ་རང་རང་གི་སྐལ་བ་དང་མཐུན་པར་བསྐོར་ཞིང་། མདོར་ན་སྦྱིན་པ་རྣམ་པ་གསུམ་གྱིས་གདུལ་བྱའི་ཡིད་དགའ་མགུར་སྤྱོད་པར་མཛད་དོ། །དེའི་ཚེ་སྙེ་ཐང་བདེ་བ་ཅན་གྱི་དགེ་བཤེས་རྣམས་ཕྲག་དོག་པས་རྩོད་པས་བཅོམ་སྟེ། ཡུལ་གཞན་དུ་སྤྱུགས་ལ་བཏང་ངོ་སྙམ་ནས། སྒྲ་ཚད་ལ་མཁས་ཤིང་། སྡེ་སྣོད་འཛིན་པ་ཞིག་འཁོར་འགའ་དང་བཅས་ཏེ་བཏང་ངོ་། །དེས་ཀྱང་གུས་པའི་ཚུལ་ལྟར་དུ་བྱས་ཏེ་དྲུང་དུ་སོན་ཏོ། །དེ་ནས་ལུང་དང་རིགས་པ་ཕུན་སུམ་ཚོགས་པས་རྩོད་པ་ན། དེ་ཉིད་ཕམ་ནས་ངོ་འཁུམས་ཏེ་འདུག་གོ། །དེ་ནས་ཀྱང་རྗེའི་བསྟན་བཅོས་མཐོང་བས་མངོན་པར་དད་དེ། ཞབས་ལ་བཏུད་དོ། །ལུང་མན་ངག་ཀྱང་མང་དུ་ཐོས་ཤིང་ཐུན་མོང་དང་མཆོག་གི་དངོས་གྲུབ་ཐོབ་ནས་བསྟན་པ་ལ་བྱ་བ་ཆེར་མཛད་དེ། རྐྱང་མོ་ཁ་པ་ཞེས་སྐྱེ་བོ་རྣམས་ལ་གྲགས་སོ། །དེའི་སྟོན་ལོ། སྔར་གངས་རིའི་ཁྲོད་དུ་གྲགས་པར་མ་གྱུར་པའི་གདམས་པའི་གནད་རོ་སྙོམས་སྐོར་དྲུག་དང་། རྟེན་འབྲེལ་རབས་བདུན་མ་དག་འདུས་པ་རྣམས་ལ་གསུངས་ཏེ་བསྲེ་འཕོའི་གཏོང་ཐུན་ཀྱང་མཛད་དོ། །
3-66
དེའི་དགུན་འཁོར་མང་པོ་འདག་སྦྱར་ལ་བཙུད་དེ། སྒྲུབ་པའི་སྲོལ་ཆེན་པོ་གཏོད། རོ་སྙོམས་ཉམས་སུ་ལེན་པ་དུ་མས་རི་ཁྲོད་ཀུན་ཁེངས་པར་གྱུར་པས། སྙིང་པོའི་བསྟན་པའི་རྒྱལ་མཚན་བཙུགས་སོ། །དེ་ནས་སློབ་དཔོན་ཇོ་ཚུལ་དང་། གཅེན་གཉིས་ཀྱིས་ར་ལུང་དུ་གཤེགས་པར་གསོལ་བ་གནང་སྟེ། བརྒྱ་འབུལ་མང་དུ་བྱུང་བ་ཐོ་ཕྱིར་བྱུང་ངོ་ཅོག་ལ་སྦྱིན་པ་མཛད་ནས། ར་ལུང་དུ་བྱོན་ཏེ། གཅེན་ལྷ་གཉན་གྱི་སྲས། བྱང་ཆུབ་སེམས་དཔའ་ཆེན་པོ་ས་བཅུ་ལ་གནས་པ་ཞིག་རབ་ཏུ་བྱུང་སྟེ། མཚན་དར་མ་སེང་གེ་ཞེས་བྱ་བར་བཏགས་སོ། །དེ་ཡང་སྦྱངས་སྟོབས་དང་སྒོམ་བྱུང་གི་ཤེས་རབ་ཕུན་སུམ་ཚོགས་པས་ཕྱིས་གདན་ས་མཛད་དེ། སངས་རྒྱས་དབོན་རས་ཞེས་གྲགས་སོ། །ཆོས་དབང་མང་པོས་འགྲོ་བའི་རེ་བློ་མཐའ་དག་རྫོགས་པར་བྱས་སོ། །དེའི་སྐབས་སྙུན་དྲག་པོས་གཙེས་པའང་། ལམ་ཁྱེར་གྱི་གདེངས་དྲག་པོའི་ངང་ནས་ཤུ་ཨ་ན་ནའི་མགུར་ཡང་གསུངས་སོ། ། དེར་ཡུན་རིང་བཞུགས་ཤིང་། དེ་ནས་ལྷ་ཁབ་ཏུ་བྱོན་ནས། ཁྲིད་གསར་པ་རྣམས་ཀྱི་གདམས་ངག་ཀྱང་མྱུར་དུ་ཚར་ནས། ཐུགས་ཉམས་ཀྱང་ཤིན་ཏུ་དགའ་སྐྱིད་དུའང་ཚོར། ཐོ་ཕྱི་ན་མི་གཅིག་ཀྱང་མེད་པས་ཤ་རྐྱང་ལ་སོགས་པའི་རི་དྭགས་ཀྱི་ཚོགས་ཀྱང་རོལ་རྩེད་སྣ་ཚོགས་པས་བདེ་བར་འགྲོ་ཞིང་གནས་པས། རྗེའི་ཐུགས་ལ་དུད་འགྲོ་འདི་རྣམས་ལ་ཡང་སྐྱིད་ཚོར་འདི་འདྲ་བར་འདུག་སྙམ་པ་འཁྲུངས་ནས། 
3-67
འབངས་སུ་གནས་པ་རྣམས་ལ་ཕོ་མའི་སྐྱིད་གླུ་རིང་མོ་གསུངས་སོ། །དེ་ནས་ཉིད་ཀྱི་སློབ་མ་མཁས་གྲུབ་ཆེན་པོ་བརྒྱ་ཡགས་པས་གདན་དྲངས། གྲྭ་ལ་བྱོན། དེར་རབ་ཏུ་བྱུང་བ་བརྒྱ་ཕྲག་གཅིག་དང་བརྒྱད་ཀྱིས་སྣ་དྲངས་པའི་མཁོ་དགུའི་ལོངས་སྤྱོད་ཡོད་དོ་ཅོག་ཕུལ་ནས། ཀློང་རྡོལ་དུ་ཕེབས་སོ། །དེ་དུས་སློབ་མའི་ཚོགས་ཇི་སྙེད་པ་ལ་ཞལ་གདམས་ཀྱི་གསུང་མགུར་ཀྱང་མང་དུ་བཞེངས་སོ། །དེ་ནས་ཡང་འདུས་པའི་འཁོར་ལ་རོ་སྙོམས་དང་། ཆོས་དྲུག་སོགས་གདམས་པའི་གནད་མང་པོ་སྩལ་ནས། རྗེའི་ཐུགས་དགོངས་ལ། ཡོང་ཡེ་འཁོར་མྱག་མྱོག་མང་པོ་སྐྱོང་བ་ལས། དབེན་པའི་རི་ཁྲོད་ཅིག་ཏུ་མ་ནམ་བཞི་སྐོར་གྱིས་གསོལ་བ་ཕུར་ཚུགས་བཏབ་ན། འགྲོ་བའི་དོན་ཡང་དེ་ཆེ་བར་འདུག །བླ་མ་རྗེའི་དགོངས་པ་ཡང་དེ་ཁོ་ནས་རྫོགས་པར་མཆི། སངས་རྒྱས་ཀྱི་བསྟན་པ་ལའང་དེ་ཉིད་ཀྱིས་ཕན་པར་གདའོ་དགོངས་ནས་ཐུགས་དྲག་ཏུ་སྐྱོ་ཞིང་། ཁྱད་པར་སྒྲུབ་བརྒྱུད་ཀྱི་བསྟན་པ་ཕྱོགས་བཅུར་རྒྱས་པའི་རྟེན་འབྲེལ་དུའང་གཟིགས་ནས། འདུས་པ་འགྱེད་ཀར་ཞལ་གདམས་མགུར་དུ་བཞེངས་པས། དབུ་ཆེ་བུ་སློབ་རྣམས་ཀྱིས་སྟབས་གཅིག་པར་གསོལ་བ། འོ་སྐོལ་ཚོགས་པ་སྐྱོང་བའི་ལོང་མ་མཆིས་པ་ལ། འགྱེད་པ་འདི་མི་འཐད་པར་བསམ་པས། ཆོས་ཀྱི་རྗེ་བདག་ཅག་རྣམས་ཀྱི་སྐྱབས་དང་མགོན་དུ་ཐུགས་ཕབ་ནས་བཞུགས་པར་འཚལ་ཞིང་། 
3-68
ངེད་རྣམས་ཀྱང་ཕྱོགས་ལ་མི་འགྱེད་པར་སྐྱོང་བར་ཞུ་ཞེས་ཞུས་པ་དང་། རྗེའི་ཞལ་ནས་སྒྱུ་ལུས་མི་རྟག་པའི་ཆོས་ཅན་འཇིག་པར་བྱེད་པ་ཡིན་པས། ཆོས་མཁས་པ་དང་སྨྲ་མཆུ་བདེ་བ་ལ་སོགས་པས་འཆི་བ་མི་བཟློག །དཔེར་ན་ས་རྡོ་རི་བྲག་ལ་སོགས་པ་ཐམས་ཅད་ཀྱང་མི་རྟག་པའི་ཆོས་ཅན། གང་གིས་ཀྱང་བློ་གཏད་མི་ཐུབ་པ་ཡིན། སྐྱེས་པའི་མཐའ་མ་འཆི་བ་ལས་མ་འདས། དེ་ལ་འཆི་ཆོས་གཤའ་མ་ཞིག་བྱེད་དགོས། དེ་བས་ང་ཡང་གཙང་ར་ལུང་གི་ཕྱོགས་སུ་བསྒོམ་དུ་འགྲོ། ཁྱེད་རྣམས་ཀྱང་ངའི་ཕྲིན་དེ་ཁྱེར་ལ། རྒྱལ་ཁམས་ཕྱོགས་མེད་དུ་བསྒོམ་དུ་རྒྱུགས། ཞེས་གསུངས་ནས་སྒོམ་གཤེགས་ཕྲིན་སྐྱེལ་གྱི་མགུར་མཛད་དོ། །ཡང་འཁོར་རྣམས་ཀྱི་ཅི་ནས་ཀྱང་ཐུགས་ཕབ་སྟེ་ལོ་འགའ་ཞིག་བཞུགས་པར་ནན་གྱིས་གསོལ་བས། རྗེའི་ཞལ་ནས། ད་རེས་ཅིས་ཀྱང་བསྒོམ་དུ་འགྲོ། དགེ་སྦྱོར་ལ་བོགས་མ་ཐོན་པར་ལག་སྟོང་དུ་ལོག་མི་འོང་། ད་རེས་ལྡོམ་བུ་ཞིག་བྱས་ཏེ་ཕྱོགས་མེད་དུ་འགྲོ་གསུངས་ནས་མགུར་མཛད་དོ། ། དེ་ནས་དགུང་ལོ་ཞེ་གཅིག་བཞེས་པ་ལྕགས་མོ་བྱ་ཡི་ལོ་ལ། རྣལ་འབྱོར་པའི་ཆ་བྱད་ཅན་དང་། དགེ་སློང་གི་དགེ་འདུན། སེམས་ཀྱི་དེ་ཁོ་ན་ཉིད་རྟོགས་ཤིང་། མཁའ་སྤྱོད་གྲུབ་པ་བརྒྱ་ཕྲག་བརྒྱ་ལས་མི་ཉུང་བ། ཡུལ་ཉི་ཤུ་རྩ་བཞི། ཤམྦྷ་ལ། 
3-69
རྒྱ་ནག་རི་བོ་རྩེ་ལྔ། རི་བོ་གྲུ་འཛིན། རི་བོ་གངས་ཅན། སྤོས་ངད་ལྡན་པའི་རི། སུམ་ཅུ་རྩ་གསུམ། སྒྲ་མི་སྙན། ལུས་འཕགས། བ་ལང་སྤྱོད་ལ་སོགས་པའི་རི་ཁྲོད་དང་། བས་མཐའ་དང་། དུར་ཁྲོད་ལ་སོགས་པ་རྣམས་སུ་སྒྲུབ་པ་སྙིང་པོར་གྱིས་ཤིག་ཅེས་གདམས་ཏེ་བཀྱེ་ནས་བཞུགས་པ་ན། ཇོ་ཡེས་དྲུང་དུ་འོངས་ནས་ད་ང་ཡང་རི་ལ་བསྒོམ་དུ་འགྲོ་ཞེས་ཞུས་པ་ལ་ཞལ་གདམས་དང་བཅས་ཏེ་དགྱེས་པས་གནང་ངོ་། །དེ་ནས་ཡར་གཙང་གཉིས་ཀྱིས་སྤྱན་དྲངས་ཏེ་ཁ་རོར་བཞུགས་ནས། གྱ་ནོམ་པའི་འབུལ་བ་དང་མཆོད་པ་བྱས། ཆོས་དོན་དུ་གཉེར་བ་མང་དག་ལ་ཁྲིད་བཏབ་པས། ཀུན་སེམས་ངོ་འཕྲོད་དེ་རྟོགས་པའི་ཀློང་རྡོལ་ལོ། །དེའི་དུས་བསོད་སྙོམས་པ་རྣམས་ནང་འཐབས། གཅིག་གིས་གཅིག་ཁྲག་ལ་བཅར་བ་གསན་པའི་ཚེ། ཐུགས་དགོངས་ལ། སྔོན་གྱི་ཟས་བསོད་སྙོམས་ལ་སོགས་པ་སྦྱངས་པའི་ཡོན་ཏན་བཅུ་གཉིས་ཀྱིས་འཚོ་བ་དེ་ནི་ཡལ། ལྔ་བརྒྱ་དུས་ཀྱི་སྙིགས་མ་ལ་སླེབས་ནས་འདུག་སྙམ་པ་འཁྲུངས་ནས་གསུངས་པ། ལྔ་བརྒྱ་དུས་ཀྱི་སྙིགས་མ་ལ། །བདེ་སྡུག་གཏམ་ངན་བདོ་གྱུར་ན། །ལྟོ་གོས་གཉིས་པོ་འགྲུབ་གྱུར་པའི། །བསོད་སྙོམས་པ་ལ་གླུ་ཞིག་ལེན། །དབྱར་གྱི་དུས་སུ་ཆར་པས་གཤེར། །དགུན་གྱི་དུས་ན་ལྷགས་པས་འཁྱགས། །ཉམས་ལེན་ནམ་མཁའི་མཐོངས་སུ་ཡལ། །ལྡོམ་བུ་བ་ལ་ཡི་རེ་མུག །
3-70
ཅེས་སོགས་ཐུགས་སྐྱོ་ནས་གསུངས་སོ། །དེ་ནས་ཀློང་རྡོལ་དུ་བྱོན་པ་ན། གྱ་བའི་ཇག་པས་མདོ་བོ་བའི་ཁམས་པ་རྣམས་འཕྲོག་བཅོམ་བྱས། དེའི་ལན་དུ་མདོ་བོ་བའི་དམག་རྣམས་སྙེ་མོ་གྱ་བའི་སར་བཏེག་ནས། ཁྲག་མཚོན་གྱི་ཆར་དང་གདུག་པའི་གཡུལ་སྤྲོད་པར་འགོ་རྩོམ་པའི་ཚེ། རྗེ་ཉིད་ཀྱིས་གསན་ནས། དཔོན་སློབ་འགའ་རིངས་པར་བྱོན་ནས་དཔུང་གི་ཚོགས་ལ་བཀའ་བསྒོས་པ། དེ་དག་གིས་དང་དུ་བླངས་ནས་འཁྲུག་པ་ཞི་བར་མཛད་ཅིང་། དེ་དུས་དམག་དབྱངས་རིང་མོ་གསུངས་སོ། །དེ་ནས་དུས་ལན་གཅིག་ན། རྗེའི་ཞལ་ནས། བུ་སློབ་རྣམས་ངའི་དྲུང་དུ་ཤོག་དང་། ཞེས་གསུངས་ནས་འདུས་པ་ན། འཁོར་རྣམས་ལ་བསྒོས་པ། ང་རྟེན་འབྲེལ་ཞིག་གིས་བྱང་ཕྱོགས་སུ་འགྲོ་དགོས་པར་ཡོད་པས། ཆས་ཀྱི་གསུངས་ནས། དཔོན་སློབ་རྣམས་ཤུལ་ལམ་ལ་ཞུགས་ཏེ་ཞ་ལུར་སོན་ཏེ། ཇོ་བོ་ཐུགས་རྗེ་ཆེན་པོ་ལ་བསྐོར་བ་མཛད་ཅིང་བཞུགས་པ་ན། སྟོན་པ་དང་དགེ་བཤེས་འགའ་ཞིག་ན་རེ། ཆོས་ཀྱི་རྩ་བ་གང་ཡིན། གདམས་ངག་གང་ལ་བྱེད། ལྟ་བའི་གདེང་ཅི་ཡོད་ཅེས་ཟེར་བ་ལ། དཀར་པོའི་རྩ་བ་དད་པ་ཡིན། །འཆི་བ་རྗེས་སུ་དྲན་ཡང་འཚལ། །བརྩོན་འགྲུས་རྩ་བ་སྙིང་རྗེ་ཡིན། །ཉེན་ཅན་གཡང་ལ་མཆོང་ཡང་འཚལ། །ཞེས་སོགས་གསུངས་པས་དད་པ་ཐོབ་སྟེ་སློབ་མར་གྱུར་ཏོ། ། དེ་ནས་ཉེ་བར་བགྲོད་དེ་བྱང་གི་ཚྭ་ཁ་བཅུ་གསུམ་ལ་གཟིགས་སུ་བྱོན་ཏེ། 
3-71
གཉན་ཆེན་ཐང་ལྷའི་མགུལ་དུ་ཕེབས་ནས་བཞུགས་པའི་ནུབ་ཅིག་གི་མནལ་ལམ་དུ། ཆུ་ཕར་ཀ་ཡུར་ཆུའི་འགྲམ་དུ། རྗེ་ཚལ་པ་ཆེན་པོ་དེ། སྐུ་གཟི་མདངས་དང་ལྡན་པ། ཞལ་དགྱེས་པའི་འཛུམ་བག་དང་བཅས་ཏེ་བྱོན་ནས། ཡིད་ལ་ཕན་པའི་གདམས་ངག་མང་པོ་གནང་། སྔོན་མ་ཐོས་པའི་ཆོས་དུ་མ་གསུང་བ་ཞིག་རྨིས་ནས། གཟིམས་སད་པ་དང་། བླ་མས་གསུངས་པ་རྣམས་དྲན་ནས་རྨི་ལམ་བརྡ་གྲོལ་གྱི་མགུར་གསུངས་སོ། །ད་ནི་གནམ་མཚོའི་དོ་ལ་འགྲོའོ་གསུངས་ནས། དཔོན་སློབ་འགའ་ཞིག་དང་བཅས་ཏེ་འབྱོན་པར་ཆས་པའི་ཚེ། ཐང་ཆེ་བ་མིག་གིས་བཟོད་པར་དཀའ་བ། མདུན་རི་སྲིན་མོར་འབྲོས་པ་འདྲ་བ། རྒྱབ་རི་སོག་པོ་ཁྲོས་པ་འདྲ་བ། རླུང་གིས་བྲང་ནས་དྲག་ཏུ་འཕུལ་བ་ཞིག་ལ་ཞག་མང་པོའི་བར་དུ། བཏུང་བ་ཆུ་གཅིག་ཀྱང་མ་རྙེད་དེ། ཤིན་ཏུ་འོ་བརྒྱལ་བར་བྱོན་པ་ལས། གནམ་མཚོའི་དོ་ལ་གནས་པའི་ལྷ་འདྲེ་རྣམས་ཀྱིས་མཆོད་པའི་ཚོགས་ཇི་སྙེད་པ་ཐོགས་ཏེ། མདུན་བསུས་ནས་བསྙེན་བཀུར་ཏེ་རེ་ཞིག་བཞུགས་སོ། །དེར་གཞིའི་བདག་པོའི་ཚོགས་རྣམས་སྨིན་ཅིང་གྲོལ་བ་ཐོབ་པར་བགྱིས་སོ། །དེ་ནས་བྱང་དུ་འབྱོན་པར་ཆས་པ་ན། མི་མ་ཡིན་གྱི་དཔུང་རྣམས་ཀྱིས་རྗེས་བཞིན་དུ་འབྲངས་ཏེ་བཀུར་སྟི་ཕུལ་དུ་བྱུང་བ་བགྱིས་ནས་སྐྱེལ་བ་ལ། སྐྱེལ་དར་དབྱངས་སུ་བསྙད་པའི་མགུར་གནང་ངོ་། །
3-72
དེ་ནས་རིང་པོར་སོན་པ་དང་། མཚོ་སྨད་ལ་སླེབ་ཏུ་ཉེ་བའི་ཕྱི་དྲོ་ཞིག་གི་དུས། ཤུལ་རིངས་ཀྱི་ངལ་བས་ནི་དུབ། འཚོ་ཆས་ནི་རྩི་སྨན་ལས་ཉུང་། མི་སྡུག་པའི་རླུང་ནག་ནི་དྲག་ཏུ་འཕྱོ། ཉིན་མོའི་སྣང་བ་གཞོན་ནུ་ནི་ནུབ་རིའི་རྩེ་ལ་ཕྱོགས། མཚན་མོ་སྲིན་པོའི་བུ་མོ་ནི་རྔམ་སྟབས་ཀྱིས་མྱུར་བར་གཉེར། ཝ་སྤྱང་སོགས་ངུ་བའི་གཅོང་སྒྲ་ཀུན་ཏུ་འདོན། སྐོམ་པའི་གདུང་བས་ལྷག་པར་ཉེན་ཀྱང་། རྩྭ་རྩེའི་ཟིལ་པ་ཙམ་གྱི་ཆུ་ཡང་མ་རྙེད་པར་གྱུར་ནས། ཞབས་འབྲིང་བ་དག་ཡིད་ངལ་བའི་ཁུར་གྱིས་ནོན་པ་ན། རྗེ་ཉིད་ཐུགས་སྐད་ཅིག་ཀྱང་གཡོ་བ་མེད་པར་ཏིང་ངེ་འཛིན་གྱིས་འཚོ་ཞིང་། སྐུ་གཟི་མདངས་དང་ལྡན་པར་བཞུགས་པའི་ཚེ། ནོར་འཛིན་གྱི་བདག་པོས་ཁྱེའུ་གཅིག་ཏུ་ལུས་བཟུང་ནས། ཀྱེ་བླ་མ་དཔོན་སློབ་རྣམས་འདི་ནས་ཕར་འབྱོན་པར་ཞུ་དང་ཟེར་བའི་ཕྱི་བཞིན་ཐེགས་པ་ན། ནེའུ་གསིང་རྩྭ་སྔོན་དང་མེ་ཏོག་དཀར་དམར་གྱིས་བརྒྱན་པ། ཡིད་དུ་འོང་བའི་ལྗོན་པས་མཐའ་བསྐོར་བ། དེའི་དབུས་ན་ལྷའི་བདུད་རྩིའི་རྒྱུན་འབབ་པ་ཞིག་ས་འོག་ཏུ་སྤྱོད་པ་རྣམས་ཀྱིས་མངོན་པར་སྤྲུལ་པ་དེར་སོན་ནོ། །དེར་སློབ་མ་རྣམས་དགའ་སྤྲོ་ཆེར་ཐོབ་སྟེ་རེ་ཞིག་གི་བར་བཞུགས་ནས་མགུར་ཀྱང་གསུངས་སོ། །དེ་ནས་ཚུར་འབྱོན་པར་བརྩམས་པ་ན། རྗེའི་ཞལ་ནས། 
3-73
སྤྱིར་སྒོམ་ཆེན་པ་བྱ་བ་ནོར་དད་ཆུང་འཚལ། སྒོས་སུ་སྒོམ་དུ་འོངས་ནས་ནོར་བཙལ་ན་རྟེན་འབྲེལ་འཆུག །ཡང་སྒོས་སུ་ད་རེས་བྱང་ནས་བོད་དུ་ནོར་མི་འཁྱེར་བས། སྒོམ་ཆེན་རྣམས་ཀྱི་སྣོད་ལྟོས་ཤིག་ཅེས་གསུང་ནས། སྣོད་རྣམས་བལྟས་པས། རླུང་སྒོམ་གྱི་སྣོད་ནས་ཀྲད་པ་ཞིག་བྱུང་བས། རྗེའི་ཞལ་ནས། དེ་ཡང་སྐྱུར་ཅིག་གསུངས་ནས་བསྐྱུར་རོ། ། དེ་ནས་བྱང་ཕྱོགས་ཀྱི་གནས་སུ་ལོ་གསུམ་ཙམ་བཞུགས་ཏེ། བོད་དུ་འབྱོན་པའི་ལམ་དུ། བྱང་གི་བཙད་པོ་ཇོ་རྩེ་བྱ་བ། རྗེའི་དྲུང་དུ་གུས་པས་འོངས་ཏེ་གསོལ་པ། རྗེ་ལགས། ངེད་བྱང་གི་མི་འདི་དད་པ་ཆུང་བ། སྡིག་པའི་ལས་འབའ་ཞིག་གིས་དུས་འདའ་བ། འདི་རྣམས་ལ་ཐུགས་རྗེའི་སྤྱན་གྱིས་ཉེ་བར་གཟིགས་ནས། སྨོན་ལམ་དང་ཟབ་མོའི་གསུང་གི་འབྲེལ་པ་སྩལ་དུ་གསོལ། ཞེས་ཞུས་ཏེ་འབུལ་བ་རྒྱ་ཆེན་པོ་བྱས་པ་ན། རྗེའི་ཞལ་ནས། ཆོས་དང་སྨོན་ལམ་གྱི་འབྲེལ་པ་བཞག་དགོས་གསུང་ནས། ཆོས་མང་པོ་གསུངས། སྨོན་ལམ་མང་པོ་ཡང་གནང་བས། དེ་ཉིད་དད་དེ། ཀྱེ་འགྲོ་བའི་སྒྲོན་མེ། སེམས་ཅན་གྱི་སྐྱོབ་པ། རྗེ་ཉིད་བྱང་གི་ཚྭ་ཁ་གཟིགས་པ་ལ་ཐུགས་དགྱེས་ཤིང་། ཐུགས་དམ་འཕེལ་བར་གྱུར་ལགས་སམ། ཞེས་གསོལ་པ་དང་། རེས་འགའ་ཕྱིའི་ཡུལ་ལ་བལྟས་པས་སྐྱོ་བ་སངས་པ་ཡིན། རེས་འགའ་ནང་གི་སེམས་ལ་བལྟས་པས་སེམས་ལ་གདེང་ཐོབ་པས། 
3-74
སྐྱིད་པར་བྱུང་གསུངས་ནས་མགུར་བཞེངས་སོ། །ཡང་བཙད་པོས་གསོལ་པ། ད་དུང་ངེད་ཁྱིམ་པ་བྱ་བ། ཆོས་མི་གོ་ཞིང་། དགེ་སྡིག་གི་བླང་དོར་མི་ཤེས་པས། ལས་སུ་སྡིག་སྤྱོད་ཁོ་ན་བྱེད་པ་ལ། གོ་སླ་བའི་གདམས་པ་ཞིག་རྗེས་སུ་གཟུང་དུ་གསོལ་ཞེས་ཞུས་པ་ལ། མཚན་ལྡན་བླ་མ་རིན་པོ་ཆེ། །སྤྱི་གཙུག་གི་རྒྱན་དུ་བཞུགས་སུ་གསོལ། །བདག་ལ་རེ་ས་གཞན་མེད་པས། །རྟག་ཏུ་བྱིན་གྱིས་བརླབ་ཏུ་གསོལ། །ཞེས་སོགས་གདམས་ཏེ་བོད་དུ་འགྲོ་གསུང་པ་ན། ལྷོ་པའི་དགྲ་ཇག་མང་པོ་དང་ཕྲད་དེ། མཐོ་འཚམ་པར་རྩོམ་པའི་ཚེ། རིགས་ཀྱི་ཅོན་པན་དབུ་ལ་གསོལ་བ་མཐོང་སྟེ། དྭགས་པོ་པར་འདུག་ཟེར་ནས་འཇིགས་པ་མེད་པར་བྱོན་ནོ། །དེ་ནས་ཤངས་སུ་དགེ་འདུན་བྱེའུ་ཕུག་པས་སྤྱན་དྲངས་ནས། གནས་གཞི་ཞིག་ཕུལ་ཏེ། ཇོ་མོའི་བྱིན་རླབས་གནང་བའི་གྲལ་དུ་འདུས་པ་རྣམས་ཀྱིས་གསོལ་པ། བྱང་ཐང་ལ་སྐུ་མཉེལ་བའི་ཉེས་པས་མ་གོས་པ་གྱུར་ཏམ། འཚོ་བའི་རྫས་ཀྱིས་ཕོངས་པས་དབེན་ནམ། ཞེས་བགྲོ་བ་ལ། བྱང་ཤ་ཟན་ཧོར་གྱི་སྡེ་པ་ཡི། །སྐད་རིགས་མི་གཅིག་ཡུལ་དུ་ཕྱིན། །ངོ་མཚར་ཆེ་བ་བརྗོད་ལས་འདས། །དེ་ནས་བོད་ཡུལ་འོངས་ལགས་པས། །ཞེས་སོགས་གསུངས་ནས། བསོད་སྙོམས་ཀྱིས་འཚོ་ཞིང་འགོས་ཁུ་ལུང་དུ་བྱོན་པ་དང་། གྲོང་པ་རྣམས་ན་རེ། ཁྱེད་རང་མི་འཇིགས་ན། 
3-75
གངས་ཕུག་ཡ་གིར་སོང་། བཟའ་བཏུང་མང་པོ་ཡོད་ཅེས་སྨྲེང་ངོ་། །དེ་ཇི་ལྟར་ཡིན་ཞེས་གསུངས་པས། སྔགས་པ་རྣམས་རོ་སྒྲུབ་བྱས་པ་ཉེས་ནས་ཡོད་པ་ཡིན་ཟེར། དེར་རྗེའི་ཐུགས་ལ། ང་སྟོང་ཉིད་སྒོམ་པའི་རྣལ་འབྱོར་པ་ཅི་ལ་འཇིགས་དགོངས་ནས། ཁམས་གསུམ་ཟིལ་གྱིས་གནོན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱོན་པ་ན། སྔགས་པ་ཐམས་ཅད་ཤི་སྟེ་རོ་མང་པོ་ལངས་ནས། ཁ་གདངས། མིག་བསྒྲད། རལ་པ་བརྫིངས་པ། ཡན་ལག་བརྐྱང་སྟེ། ལ་ལ་ནི་གར་བྱེད། ལ་ལ་ནི་རྒོད། ལ་ལ་ནི་བྲོ་བརྡུང་། ལ་ལ་ནི་རྩེད་མོ་བྱེད། ལ་ལ་ནི་མཆོང་ཞིང་བརྒྱུག །ལ་ལ་ནི་ངུར་སྒྲ་འབྱིན། ལ་ལ་ནི་གདུང་དབྱངས་ལེན། ལ་ལ་ནི་ཆོ་ངེས་འདེབས། ལ་ལ་ནི་རྐན་སྒྲ་བརྡེབ། ལ་ལ་ནི་ཕན་ཚུན་འཐབ་ཅིང་རྩོད། བགེགས་དང་འབྱུང་པོའི་ཚོགས་མང་པོ་འདུས་ཏེ། སྐད་དང་གཟུགས་སྣ་ཚོགས་སྟོན་པ་སོགས། འཇིགས་ཤིང་ཡ་ང་བ། ཐོས་པ་ཙམ་གྱིས་ཀྱང་སྲོག་གི་དབང་པོ་ཕྱེ་མར་བྱེད་ཅིང་། མངོན་པར་སྐྲག་པ་དེར་ཐེ་ཚོམ་མེད་པར་ཟག་མེད་ཀྱི་ཏིང་ངེ་འཛིན་ལ་མཉམ་པར་གཞག་སྟེ་བཞུགས་སོ། །དེའི་ཚེ་ཡུལ་མི་རྣམས་ཀྱིས་གླེང་པ། ཁར་རྩང་བཙུན་པ་གཞོན་ནུ་ཞིག་སོང་བ་ཡིན་ཏེ། ད་དེ་ཡང་ཤི་ལས་ཆེ། འོན་ཏེ་ཤི་བར་གྱུར་ཏམ། གསོན་པོར་མཆིས་བལྟ་རུ་འགྲོའོ་ཟེར་ནས། 
3-76
མི་མང་པོ་འདུས་ཏེ་བལྟ་རུ་སོང་བ་དང་། རྗེ་ཉིད་ནི་རོ་ལ་ལ་ལ་སྔས་བྱས། ལ་ལ་སྟན་དུ་བཏིངས། ལ་ལ་གཡས་གཡོན་དུ་བརྩིགས་ཏེ། ཉམ་ང་མེད་པའི་ཚུལ་གྱིས་མགུར་དབྱངས་ཆོང་ཆོང་མཛད་ཅིང་བཞུགས་པ་མཐོང་ངོ་། །དེ་མཐོང་བས་མི་རྣམས་ངོ་མཚར་ནས་གཅིག་གིས་གཅིག་ལ་བལྟ་ཞིང་ཨ་ལ་ལ་ཞེས་སྒྲོགས་པར་བྱེད་དོ། །དེ་རྣམས་ཀྱི་ནང་ནས་གཞོན་ནུ་ཞིག་ན་རེ། ཀྱེ་ཁྱེད་དབུགས་བྲལ་གྱི་འཇིགས་པའི་ཉེས་པས་མ་གོས་སམ། ཤི་ཡིས་དོགས་པར་མ་གྱུར་གྲང་། ཞེས་གསོལ་པ་དང་། རྗེའི་ཞལ་ནས། ང་སྟོང་ཉིད་རྟོགས་པའི་རྣལ་འབྱོར་པ། ཤི་ཡིས་དོགས་པ་ག་ལ་ཡོད། ཅེས་གསུངས་ནས་མགུར་བཞེངས་པ། ཁོ་བོ་བན་སྨྱོན་ལྡོམ་བུ་བ། །མཚན་ལྡན་བླ་མའི་བཀའ་དྲིན་གྱིས། །གདེང་དུ་ཚུད་པ་འདི་ཚོ་ཡོད། །མི་ན་རེ་སྟོང་ཉིད་སྟོང་ཉིད་ཟེར། །སྟོང་མཁན་དང་སྟོང་ཡུལ་གཉིས་ཀ་མེད། །ཅེས་སོགས་གསུངས་པས་ཁོང་རྣམས་ཡིད་རབ་ཏུ་དགའ་སྟེ། འདི་ནི་ངེས་པར་གྲུབ་པ་བརྙེས་པ་ཞིག་གོ། །འཇིགས་སུ་ངར་བའི་ཚོགས་འདི་ལྟ་བུ་དག་ཀྱང་མངོན་པར་ཕམ་པར་བྱས་སོ། །སྲིན་པོའི་དཔུང་ཡང་འཇོམས་པར་ནུས་པའི་རོ་ལངས་ཀྱི་ཚོགས་རྡོ་རྗེའི་ཏིང་ངེ་འཛིན་གྱིས་ལྷག་པར་བཏུལ་ཏེ། ཡུལ་ལྗོངས་དག་ཏུ་མི་འཇིགས་པའི་སྐྱབས་སྦྱིན་ནོ། །ཞེས་པ་ཀུན་ཏུ་ཆེད་དུ་བསྔགས་པ་བརྗོད་དེ་མོས་པས་རིམ་གྲོ་ཆེར་བྱས་སོ། །
3-77
དེ་ནས་ཚོང་དུས་མགུར་མོར་སླེབ་པ་ན། བུ་མོ་གཞོན་ནུ་མཛེས་མ་ཞིག་ཆུ་ལེན་དུ་བྱུང་བ་ལ། རྣལ་འབྱོར་པ་དཔོན་སློབ་ལ་ཟས་ཞིག་དགོས་ཞེས་གསུངས་པས། རེ་ཞིག་བཞུགས་ཤིག་དང་ཟེར་ནས་ནང་དུ་ལོག་གོ། །དེས་མ་ན་བ་ལ་སྨྲས་པ། རིམ་གྲོར་ཚོགས་ཀྱི་འཁོར་ལོ་ཞིག་བྱ་ཡི། རྣལ་འབྱོར་པ་དཔོན་སློབ་འགའ་སྒོ་དྲུང་ན་མཆིས་སོ། །དེ་ཁོ་མོས་ནང་དུ་སྤྱན་དྲང་རུང་ངམ། མས་སྨྲས་པ་དེ་ཁོ་ན་བགྱིའོ། །དེ་ནས་བུ་མོ་ཕྱིར་བྱུང་ནས། ཚོགས་ཀྱི་འཁོར་ལོ་ཞིག་བྱེད་པས་ནང་དུ་བྱོན་དང་ཟེར་བ་ལ། རྗེའི་ཞལ་ནས། ཚོགས་ཀྱི་འཁོར་ལོ་བསྐོར་བ་ལ་ཡོ་བྱད་ཕུན་སུམ་ཚོགས་པ་དགོས་གསུངས་པས། དེ་ན་རེ། བླ་མ་ཁྱེད་ཞལ་བརྫུན་གསུང་བ་ཞིག་འདུག་གི། ཁྱོད་ཙ་རི་ཏྲ་ཡུལ་སྨད་དུ་བྲ་བ་གཡག་པོའི་གཟུག་གཅིག་ལ་ཡུལ་ཉི་ཤུ་རྩ་བཞིའི་དཔའ་བོ་དང་མཁའ་འགྲོ་ཐམས་ཅད་འདུས་ནས་ཚོགས་ཀྱི་འཁོར་ལོ་མཛད་ཀྱི་འདུག་ཟེར་རོ། །འོ་ན་དེ་བདེན་པའི་དཔང་དུ་ཅི་ཡོད་གསུངས་པས། ཁྱེད་ཀྱི་ཕྱག་རྩེ་སྐོར་འདི་མ་ལགས་སམ་ཟེར་ཏེ། ཙ་རིར་བོར་བའི་དུང་ཕྲེང་དེ་བསྟན་པ་ལ། ཅུང་ཟད་ཐུགས་སྐྱེངས་སོ། ། དེ་ནས་ནང་དུ་བྱོན། མཁའ་འགྲོ་མ་དེས་སྦྱིན་པའི་བདག་མོ་བྱས་ཏེ། མཚན་མོའི་ཐུན་དང་པོ་ལ། ལྷའི་བདུད་རྩིའི་ཚོགས་དང་། 
3-78
རོ་བརྒྱ་ཕྲག་མང་པོ་དང་ལྡན་པའི་བཟའ་བ་དང་། བཏུང་བ་དང་། བལྡག་པ་དང་། གཞིབ་པའི་བྱེ་བྲག་དཔག་ཏུ་མེད་པ་སྐད་ཅིག་ལ་ཚོགས་ཤིང་། མཁའ་འགྲོ་མ་བྱེ་བ་ཁྲག་ཁྲིག་མང་པོའང་མཆོད་པའི་ཚོགས་དུ་མ་ཐོགས་ཏེ་འདུས། རྗེ་ཉིད་དཔལ་འཁོར་ལོ་སྡོམ་པ་ལྷ་བཅུ་གསུམ་གྱི་དཀྱིལ་འཁོར་རྟེན་དང་བརྟེན་པར་བཞེངས། འཁོར་རྣམས་ཀྱང་བྱིན་གྱིས་བརླབས་ཏེ་ལྷའི་རྣམ་པར་བསྒྱུར། རྣལ་འབྱོར་གྱི་དབང་ཕྱུག་དཔག་ཏུ་མེད་པ་རྫུ་འཕྲུལ་གྱིས་བྱོན་ཏེ། ཚོགས་ཀྱི་འཁོར་ལོ་རྒྱ་ཆེན་པོ་བསྐོར། མཚན་མོའི་ཐུན་མཐར་རང་རང་གི་གནས་སུ་གྱེས་སོ། །དེ་ནས་བོད་དོར་དུ་བྱོན་ཏེ་བཞུགས་པ་ན། རླུང་སྒོམ་དཔོན་སློབ་རྣམས་མདོ་ཁམས་སུ་འགྲོ་བའི་གནང་བ་ཞུ་བར་འོངས་པ་ན། འགྲོ་རྫོངས་ཀྱི་མགུར་དང་བཅས་ཏེ་གནང་ངོ་། །དེའི་དུས་སུ་དཔོན་རོང་པ། གསེར་སྒོམ་གྲགས་ཡེས་དཔོན་སློབ་བྱུང་སྟེ། མཆོད་པའི་བྱེ་བྲག་གིས་རི་མོ་དང་བསྟི་སྟང་དུ་བྱས་ནས་འདི་སྐད་ཅེས་གསོལ་ཏོ། །དོན་བཟང་ཞིང་ཚིག་སྙན་པ། འཁྱེར་བདེ་བ། མདོ་སྔགས་ཀྱི་དགོངས་པ་མ་ལུས་པ་གཅིག་ཏུ་དྲིལ་བའི་བསྟན་བཅོས་ཞིག་ཞུ་འཚལ་ལོ། །ཞེས་ཞུས་པ་ལ། རྗེའི་ཞལ་ནས། བདག་མཆིས་ཀྱི་རྣལ་འབྱོར་རྒྱ་རས་འདི། །བསྟན་བཅོས་མི་མཁས་གླུ་ལ་བཟོ། །ཞེས་པའི་ཚིགས་སུ་བཅད་པ་དག་ཀྱང་གནང་ངོ་། །འཁོར་ཚོགས་རྒྱ་མཚོ་ལྟ་བུས་ཡོངས་སུ་བསྐོར་ཏེ་གཙང་ལ་ཕེབས། 
3-79
དེའི་སྟོན་དུས་དང་ཉེ་བ་ན། འབྲས་མོ་བས། དགེ་སློང་གི་དགེ་འདུན་དང་བཅས་པ་འབྱོན་པར་གསོལ་བ་གནང་སྟེ། ཆོས་ཀྱི་འཁོར་ལོ་རབ་ཏུ་བསྐོར་ནས་འབུལ་བ་སོགས་བསྟི་སྟང་རྒྱ་ཆེན་པོ་བྱས་སོ། །མེ་སྒོམ་གྱིས་རྗེའི་སྐུའི་བཀོད་པ་མང་དུ་མཛད་པ་མཐོང་སྟེ། ཉམས་འུར་ནས་འཁྲབ་ཅིང་གསོལ་བ་བཏབ་པས། རྣལ་འབྱོར་པ་རུས་པའི་རྒྱན་ཅན་རལ་པའི་དོ་ཀེར་ལ་མེ་ཏོག་ཆུན་པོས་མཚན་པ། ཀྲྀཥྞ་ས་རའི་པགས་པ་བཏིང་བ། ཕྱག་ན་གསེར་གྱི་བདེ་སྐྱོང་བདུད་རྩིས་གང་བ་ཐོགས་པ་ཞིག་ཏུ་མཐོང་ངོ་། །དེའི་དུས་སུ་དབུས་ཀྱི་བུ་སློབ་རྣམས་ཀྱིས་བདག་ཅག་འདི་ན་གནས་པའི་མགོན་དུ། རྗེ་ཉིད་དགེ་འདུན་གྱི་འཁོར་དང་བཅས་ཏེ་འབྱོན་པ་ཅིས་མི་གནང་། ཞེས་པའི་ཉན་རྣ་བ་བཀད་སར་སོན་ནས་མི་རིང་བར་ཤུལ་ལམ་བགྲོད་དེ། རིམ་པར་བརྒྱུད་ནས་གཞུང་དུ་ཕེབས་སོ། །དེར་བུ་སློབ་དང་ཡུལ་མི་རྣམས་ཀྱིས་འབུལ་བ་དང་བསྙེན་བཀུར་བརྗོད་ཀྱིས་མི་ལང་བ་བྱས་སོ། །དེའི་ཚེ་ཆོས་ཉན་དགེ་སློང་གི་དགེ་འདུན་ཁོ་ན་འདུས་པ་ཡང་བརྒྱ་ཕྲག་བརྒྱ་དང་སྟོང་ཕྲག་གི་ཚོགས་བྱུང་ངོ་། །དམུ་རྒོད་ཀྱི་སྐྱེ་བོ་མང་པོ་ལ་ཕན་པ་རྒྱ་ཆེན་པོ་སྩལ་བས་འགྲོ་བའི་དོན་མང་པོ་འགྲུབ་གསུང་ནས་མཉེས་པར་མཛད་དོ། །དེའི་དུས་རྒྱལ་བ་ལོ་རས་པ་དགུང་ལོ་བཅུ་དྲུག་གཞེས་པ། 
3-80
ཡབ་ཡུམ་སྲས་བཅས་ཀྱིས་མཇལ་ཏེ་འབུལ་བ་མང་དུ་ཕུལ་ཞིང་ཆོས་ཀྱི་འབྲེལ་པ་ཉན་ནོ། །དེའི་དུས་རྗེའི་ཞབས་འབྲིང་བར་འདོད་པ་ལས། ཉེ་དུ་རྣམས་ཀྱིས་དེའི་སྐབས་མ་ཕྱེའོ། ། དེ་ནས་སྙེ་ཐང་དུ་སྡེ་བཙད་གཉིས་འཁྲུགས་ནས། རྒྱ་བོད་ཀྱི་མི་མང་པོ་འདུས། ལྷ་མ་ཡིན་ལྟར་འཐབ་རྩོད་དང་། འཇིགས་དངངས་ཆེ། མི་བཟད་པའི་སྡུག་བསྔལ་གྱིས་སེམས་ཅན་དམྱལ་བ་པ་བཞིན་མནར། ཉེས་མེད་ཀྱི་སྲོག་ལྡན་རྣམས་ཀྱང་མཚོན་ཆའི་ཆར་དྲག་པོས་བཅོམ། རྒྱལ་བའི་བསྟན་པ་ནི་དུས་མཐའི་མུན་པས་བསྒྲིབས། སྐྱིད་པ་བདེ་ལྡན་གྱི་གྲོང་ཁྱེར་འདྲ་བ་ཡང་དྲི་ཟའི་བསྟི་གནས་ལྟར་དུ་སོང་བ། ཐུགས་ཀྱིས་བཟོད་པར་ཕངས་ནས་བྱོན་ཏེ། དཔུང་གི་ཚོགས་ལ་བཀའི་བསྒོ་བ་ཇི་སྙེད་པ་དག་གཙུག་གིས་བསྙེན་ནས། ཕན་ཚུན་འཁྲུག་པ་ཞི་བར་མཛད་དོ། །དེ་ནས་རིམ་པས་ཕ་བོང་དཀར་ལེབ་བྱ་བའི་སྟེང་དུ་ཆོས་ཀྱི་སྒོ་མཐའ་ཡས་པའི་ཏིང་ངེ་འཛིན་ལ་ཞུགས་ཏེ་མགུར་མང་དུ་གསུངས་སོ། །དེ་ནས་ཀློང་རྡོལ་དུ་ཕེབས་ཚེ། རྒྱལ་བ་དུ་མ་མཉེས་པར་བྱས་ཤིང་ཚོགས་རྣམ་པ་གཉིས་བསྒྲུབས་པ། རྒྱལ་ཚབ་ཏུ་དབང་བསྐུར་བ་ཐོབ་པ། གཞོན་ནུ་ཞིག་ཆོས་ལ་འོངས་པ། རབ་ཏུ་བྱུང་སྟེ་གྲགས་པ་དབང་ཕྱུག་ཅེས་པའི་མིང་བཏགས་སོ། །དེ་ནི་ཕྱིས་རྒྱལ་བ་ལོ་རས་པ་ཞེས་བསྟན་པའི་བདག་པོར་གྱུར་ཏོ། །
3-81
དེར་གདུལ་བྱ་མཐའ་དག་ལ་ཆོས་དང་དབང་གིས་ངོམས་པར་བྱས་ནས། བུ་སློབ་འགའ་ཞིག་རྗེའི་གན་དུ་འོངས་ཏེ། བདག་ཅག་རྣམས་ཕྱོགས་མེད་དུ་བསྒོམ་དུ་འགྲོ་བས། རྗེའི་སྙན་པ་ཇི་སྐད་དུ་སྒྲོག་ཅེས་གསོལ་པ་དང་། རྗེའི་ཞལ་ནས། ང་ལ་སྙན་པ་སྒྲོག་མི་དགོས། ཁྱེད་རྣམས་རྒྱལ་ཁམས་སུ་འགྲོ་ན། ངའི་ཕྲིན་འདི་རྒྱལ་ཁམས་ཐམས་ཅད་ལ་སྒྲོགས་ཤིག་གསུང་ནས། མགུར་བཞེངས་པ། འོ་སྐོལ་མི་ལུས་ཐོབ་ནས་ཆོས་མེད་པོ། །གསེར་གླིང་དུ་ཕྱིན་ནས་སྟོང་ལོག་བྱས། །རང་ངན་སོང་དུ་ལྷུང་ན་མི་འགྱོད་དམ། །མི་དད་མེད་རྣམས་ལ་ཕྲིན་དེ་སྐྱོལ། །ཞེས་སོགས་གསུངས་ནས་རང་ཅག་རྣམས་འདེང་ངོ་གསུངས་ཏེ། དགུང་ལོ་ཞེ་ལྔ་གཞེས་པ། ཤིང་མོ་གླང་གི་ལོའི་འབྲུག་གི་ཟླ་བ། དཀར་པོའི་ཕྱོགས་ཀྱི་ཉིན་གཅིག །རྩེ་བོ་ལའི་རྩེ་མོར་བྱོན་ནས་ཡུལ་ཕྱོགས་ཀུན་ཏུ་གཟིགས་པའི་ཚེ། གནམ་གྱི་ཕུ་ན་འཇའ་འོད་སྣ་ལྔའི་གུར་སུམ་རིམ་དུ་ཕུབ་ཅིང་། འོད་ཟེར་གྱི་དྲྭ་ཕྱེད་ཀྱིས་མཛེས་པ། རྟ་དང་། གླང་པོ་དང་། འཁོར་ལོ་དང་། པདྨ་དང་། ནོར་བུ་སོགས་ཀྱི་གཟུགས་སྣ་ཚོགས་པས་སྤྲས་པ་གཟིགས་པའི་ཚེ། རྗེའི་ཞལ་ནས། མ་གིར་ངའི་ཚོགས་པ་སྐྱོང་བའི་གནས་ཡོང་བར་འདུག་གསུང་ནས་བྱོན་ནོ། །དེར་ཚང་ཚིང་གི་གསེབ་ཏུ་སོན་པ་དང་། ཆུ་མིག་ཅིག་གི་རྩ་ན་སྒྱེད་པུ་གསུམ་བཙུགས། ཤིང་ཕྱག་གང་ཙམ་ཡང་འདུག་པས། 
3-82
རྗེའི་ཞལ་ནས། རྟེན་འབྲེལ་འགྲིག །རྣལ་འབྱོར་དགའ་ཡེས་དང་། ཇོ་ཡེས་ལ་སོགས་པ་ཁྱེད་རྣམས་ཤིང་རེ་ཐུས་ལ་ཤོག་དང་གསུངས་ནས། ཤིང་འཐུས་ཏེ་འཇམ་སྐོལ་ཞིང་བཞུགས་པ་ན། ནམ་མཁའ་ནས་ཤིན་ཏུ་ཆེ་བའི་འབྲུག་སྒྲ་དྲག་པོ་ལན་གསུམ་གྱི་བར་དུ་བསྒྲགས་པས། རྗེའི་ཞལ་ནས། འབྲུག་གི་སྒྲས་གར་ཁྱབ་ཏུ། ངའི་སྙན་པས་ཁྱབ་པར་འདུག་ཅེས་གསུངས་སོ། །དེའི་ཚེ་ཡར་འབྲོག་སྟག་ལུང་པའི་གཅེས་ཕྲུག་བདུན་ཆོས་ལ་བྱུང་སྟེ་མདའ་དང་གཞུ་ཕུལ་བས་སྤྱིལ་པོའི་གདུང་ལྕམ་བྱས་ནས་གཟིམས་ཁང་ཕུབ་པས་མདའ་གཞུ་ལྷ་ཁང་དུ་གྲགས་སོ། ། དེ་ནས། སའི་དབྱིབས་པདྨ་འདབ་བརྒྱད་ལྟ་བུའི་ལྟེ་བར་གཙུག་ལག་ཁང་དང་། སྤྱིལ་པོ་བརྩིགས་ཏེ་ལོ་དེ་ཉིད་ལ་སྒོམ་ཁང་སྟོང་ཕྲག་ཙམ་ཐེབས་ཏེ། རབ་གནས་ཀྱི་དུས་སུ་མགུར་བཞེངས་པ། རྗེ་གོང་མའི་གདན་ས་རི་ཁྲོད་དང་གཅིག །ཆུང་ལ་མཛེས་པའི་འཇག་སྤྱིལ་དང་གཉིས། །ཉམས་རྟོགས་ལྡན་པའི་སྒོམ་ཆེན་དང་གསུམ། །དེ་གསུམ་སྒོམ་ཁང་གི་ཁ་བསྲོ་ཡིན། །ཞེས་སོགས་གསུངས་ནས་དགོན་པའི་མིང་ཡང་འབྲུག་ཅེས་བྱ་བར་ཆགས་སོ། །དེ་དུས་རྗེའི་ཞལ་ནས། འབྲུག་རྗེ་སྣ་ཕུ་བའི་ལུང་བསྟན་ཡིན། ཀློང་རྡོལ་ཞང་རིན་པོ་ཆེའི་ལུང་བསྟན་ཡིན། གཞན་ཡང་ཁོ་བོས། དགོན་པ་བྱང་དུ་བཏབ་ན། འཁོར་དང་ཟང་ཟིང་ལ་སུས་ཀྱང་འགྲན་པར་མི་ཡོང་བར་འདུག་སྟེ། ཕྱི་རབས་རྣམས་ལ་ཕན་པ་ཆེར་ཡོང་བར་མི་འདུག །
3-83
ངམ་ཤོད་དུ་བཏབ་ན་འགྲོ་དོན་རླབས་ཆེ་བར་གདའ་སྟེ། མ་འོངས་པའི་དུས་བསྐྱང་དཀའ་བར་འདུག་པས་བཞག །ར་ལུང་དུ་བཏབ་ན་ནོར་མི་རབས་འགར་སྤྱད་ཀྱང་མི་འཛད་པ་ཞིག་དང་། མི་ཆེན་མང་དུ་འདུ་བར་མཆིས་ཏེ། འགྲོ་དོན་ཆེ་རྒྱུ་མི་འདུག་ཅེས་གསུང་ངོ་། །དེ་ནས་ཚོགས་པ་བསྐྱངས་ནས་བཞུགས་པ་ན་ཐན་པ་བསྐལ་པའི་མེ་བས་ཚ་བ་བྱུང་བས། མེ་ཏོག་དང་ལྗོན་ཤིང་ཐམས་ཅད་སྲིན་བལ་མེས་བསྲེགས་པ་བཞིན་དུ་སོང་། ཆར་པ་ནི་ཨུ་དུམྦཱ་རའི་མེ་ཏོག་བས་དཀོན། མི་ཐམས་ཅད་སྡུག་པའི་སྐད་ངན་གྱིས་ཕྱོགས་བཅུ་ཀུན་ཏུ་ཁྱབ་པར་བྱེད་པའི་ཚེ། རྗེ་ཉིད་ཀྱིས་འབྲུག་ཕུ་བྱེ་དཀར་དུ་བྱོན་ནས། ལྷ་ཀླུའི་ཚོགས་ལ་བཀའ་བསྒོས་ཏེ། ཆར་དབབ་པའི་རྟེན་འབྲེལ་མཛད་པས། ཉིན་ཞག་བདུན་གྱི་བར་ཆར་དྲག་ཏུ་བབས་པས། རྩི་བཅུད་མེ་ཏོག་ཀུན་རྒྱས། མི་ཐམས་ཅད་དབུལ་བའི་སྡུག་བསྔལ་དང་བྲལ། ཀུན་ཀྱང་རྗེའི་ཐུགས་རྗེར་མཐོང་ནས། ལྷག་པའི་དད་པ་དང་ངེས་ཤེས་ཐོབ་སྟེ་མཁོ་དགུའི་ཚོགས་ཀྱིས་རྗེད་པར་བྱས་སོ། །དེའི་ཚེ་དད་ལྡན་གྱི་འདུས་པ་རྣམས་ཀྱིས། སྐུ་ཡི་བཀོད་པ་སྣ་ཚོགས་པ་མཐོང་བ་དང་། རིགས་དྲུག་པོ་སོ་སོའི་སྐད་དུ་ཆོས་སྟོན་པ་སོགས་རྫུ་འཕྲུལ་གྱི་སྒོ་བསམ་གྱིས་མི་ཁྱབ་པས་དུས་འདའ་བར་གྱུར་པ་ན། སྒོམ་ཆེན་འགའ་རྭ་སྒྲེང་དང་། 
3-84
སྟག་ལུང་གི་གནས་བསྐོར་ནས། ཚུར་ལམ་འབྲི་ཁུང་ལ་འོངས་པ་ན། རྗེ་སྐྱོབ་པ་འཇིག་རྟེན་མགོན་པོའི་ཞལ་ནས། སྒོམ་ཆེན་ཚོ་ག་ནས་བྱོན། འདུག་སའི་དགོན་གནས་གང་ཡིན། བླ་མ་དང་གདམས་ངག་ཅི་འདྲ་ཡོད་ཅེས་གསུང་བ་ལ། དགོན་པ་འབྲུག་བྱ་བ་ནས་འོངས། བླ་མ་གཙང་པ་རྒྱ་རས་བྱ་བ་ཡིན། གདམས་ངག་ནཱ་རོའི་རོ་སྙོམས་སྐོར་དྲུག་བྱ་བ་བདོག་ལགས། ཞུས་པས། ཁྱེད་ཀྱི་བླ་མ་གཙང་པ་རྒྱ་རས་དེ། བསོད་ནམས་ཤིན་ཏུ་ཆེ་བར་ཡོད་འདུག །ཁོང་ལ་ང་རྒྱལ་ཆེན་པོ་མི་འདུག་གམ་གསུང་བ་ལ། ངེད་རྣམས་ཀྱིས་ང་རྒྱལ་འདུག་པའང་མ་ཤེས། མི་འདུག་པའང་མ་ཤེས། རྒྱལ་བའི་དགོངས་པ་ལ་སྤར་ཚོད་ཇི་ལྟར་ཐེབས། ངེད་ཀྱིས་ཞུ་ཡོང་གི་བྱས་ནས་རྗེའི་དྲུང་དུ་སོན་ནོ། ། དེར་རྗེའི་ཞལ་ནས། ཁྱེད་རྣམས་ལ་གཏམ་ཇི་ལྟར་ཡོད། རྗེ་འབྲི་ཁུང་པ་ཇི་སྐད་གསུང་འདུག་ཅེས་བཀའ་སྩལ་པ་ལ། སྔར་གྱི་མོལ་མཆིད་རྣམས་ཞུས་པས། རྗེའི་ཞལ་ནས། ཁྱེད་རྣམས་ཕྲིན་སྐྱེལ་དུ་འདུག་པས། ངའི་འཕྲིན་འདི། རྗེ་སྐྱོབ་པ་ལ་ཕུལ་ཤོག་གསུང་ནས། ན་མོ་རཏྣ་གུ་རུ། སྐྱེས་པའི་ཕ་ཡུལ་སྤངས་ལགས་ནས། །གཉུག་མའི་གཏན་ཡུལ་བཙལ་ལགས་པས། །ད་ལྟ་གནས་ལུགས་ཀྱི་བཙན་ས་ཟིན། །ཕ་ཡུལ་གྱི་ང་རྒྱལ་བདག་ལ་མེད། །བྱང་འབྲི་ཁུང་གི་ཕྱོགས་སུ་ཕྲིན་འདི་སྐྱོལ། །ཞེས་སོགས་མགུར་དང་། 
3-85
གཞན་ཡང་གདམས་པ་མང་དུ་གསུངས་སོ། །དེའི་ཚེ་འདུས་པའི་ཚོགས་ཁྲི་ཕྲག་གསུམ་ལས་ཆེས་མི་ཉུང་བ་དག་ཚོགས་ཏེ། ས་པདྨ་འདབ་བརྒྱད་ཀྱི་འདབ་མ་ཀུན་ཀྱང་། དགེ་སློང་གིས་ཏིལ་གྱི་གང་བུ་ལྟར་རབ་ཏུ་གཏམས་པས། དགེ་འདུན་སྡུ་བ་ལ། དུང་མང་པོ་བསྒྲིལ་ཏེ་བུས་པས་ཀྱང་ཐོས་པར་མ་གྱུར་ཏེ། རི་བོའི་སྤོར་དར་ཆེན་ཕྱར་ནས་འདུ་བར་བྱེད་དོ། །དེ་དག་ལ་སྔར་མ་གྲགས་པའི་ཆོས་སྒོ་གྲངས་མེད་པ་དབྱེ་སྟེ། རིགས་ཅན་གསུམ་གྱི་གདུལ་བྱ་མཐའ་དག་བྱང་ཆུབ་ཀྱི་ལམ་ལ་བཀོད་དོ། །འགྲོ་དོན་གྱི་རྟེན་འབྲེལ་འགྲིག་པ་ནི་དུས་གསུམ་གྱི་ཐམས་ཅད་མཁྱེན་པ་དང་དབྱེར་མ་མཆིས། མི་ནོར་འདུ་འཛིའི་ཚོགས་དབྱར་དུས་ཀྱི་འདབ་བརྒྱའི་གནས་ལྟར་དུ་ལྷག་པར་རྒྱས། གདམས་ངག་ནི་ཁ་བ་ཅན་གྱི་ལྗོངས་ན་ཟབ་ཅིང་རྒྱ་ཆེ་བར་ཡང་གྲགས། ཐུགས་རྗེའི་ཀློང་རྡོལ་བས། ནམ་མཁའི་བྱ་ལ་ཡང་སྒོམ་ཐེབས་ཞེས་རྒྱལ་ཁམས་ཀུན་ཏུ་གྲགས་སོ། །སྔར་མ་གསུངས་པའི་བླ་མ་སྒྲུབ་པ་དང་། སྤེལ་སྦྱང་གི་ཁྲིད་ཀྱང་མཛད་དོ། །དེ་དུས་རྣལ་འབྱོར་ཇོ་ཡེས་མདོ་ཁམས་ནས་ལོག་སྟེ། འཕགས་པ་འཇིག་རྟེན་དབང་ཕྱུག་གི་སྐུ་དངུལ་ལས་གྲུབ་པ་གཅིག་གིས་གཙོས་ཏེ། གསེར་དང་། དངུལ་དང་། རྟ་ལ་སོགས་པ་འབུལ་བ་གྱ་བ་མེད་པ་བྱས་སོ། །དེའི་ཚེ་ལྷོ་ཕྱོགས་གཡོར་པོ་ཡུལ་གྱི་བྱེ་བྲག །
3-86
གཞུང་གྲགས་ཆེན་པ་ཞེས་བྱ་བར། རྗེ་ལོ་རས་པས་དཔོན་སློབ་དགེ་འདུན་དང་བཅས་པ་སྤྱན་དྲངས་བར་གསོལ་བ་གནང་སྟེ། དགེ་སློང་གི་དགེ་འདུན་ཁྲི་ཕྲག་གསུམ་རྣམས་དང་ཐབས་གཅིག་ཏུ་ཆོས་གོས་དང་། ལྷུང་བཟེད་བསྣམས་ཏེ་གཤེགས་པར་ཆས་སོ། །འཇིག་རྟེན་སྐྱོང་བའི་དབང་པོའི་ཚོགས་རྣམས་ཀྱང་རྗེས་བཞིན་དུ་འབྲང་བ་དང་། བསྲུང་བ་དང་། སྦེད་པར་བྱེད་དོ། །རོལ་གནས་ཀྱི་འཛན་པོ་དང་འཛན་མོ་དག་ཀྱང་ཁོར་མོ་ཡུག་ཏུ་བསྙེགས་ཏེ་མཆོད་པར་བྱེད་དོ། །བགྲོད་བྱའི་ས་ཀུན་གྱི་འགྲོ་བ་རྣམས་ཀྱི་ཡིད་ཕྲོགས་ཏེ། ལ་ལ་ནི་གསོལ་བ་དང་སྨོན་ལམ་འདེབས། ལ་ལ་ནི་རང་གི་ནོངས་པ་བཤགས། ལ་ལ་ནི་ཞལ་མཐོང་བ་ཙམ་གྱིས་རྟོགས་པའི་མཚོ་རྡོལ། ལ་ལ་ནི་མཆོད་པ་འབུལ་བར་བྱེད། ལ་ལ་ནི་ཤུལ་སྣ་དྲངས་ཏེ་འགྲོ། ལ་ལ་ནི་ཕྱི་བཞིན་དུ་འབྲང་ངོ་། །དེ་དག་ཀུན་ཀྱང་མཆོག་གི་གནས་སུ་བཀྲི་བཞིན་པ་ནས་ག་ལ་བ་དེར་སོན་པར་གྱུར་ཏོ། །དེ་མ་ཐག་ཏུ་གྱིམ་ཤིང་གི་ཚོགས་དང་བཅས་ཏེ་བསུས་སོ། ། རིན་པོ་ཆེ་སྣ་ཚོགས་པས་སྤུད་པའི་ཁྲི་ལ། ས་གསུམ་གྱི་སྐྱོབ་པ་ཆེན་པོ་བཞུགས་སུ་གསོལ་ཏེ། དགེ་འདུན་རྣམས་བཀད་སར་འཁོད་ནས། བསམ་དགུའི་ཟས་གྱ་ནོམ་པ་སྦྱར་ནས། གདུགས་མང་པོ་སྦྲེལ་ཏེ་མཉེས་པར་བྱས་སོ། །སྐུ་དང་གསུང་དང་ཐུགས་ཀྱི་ཡོན་གནས་དམ་པས་སྣ་བགྱིས་ཏེ། 
3-87
གསེར་དང་། མུ་ཏིག་དང་། གཡུ་དང་། སྤུག་ལ་སོགས་པ་རིན་པོ་ཆེ་དང་། དར་ཟབ་དང་། ན་བཟའ་དང་། རྟ་དང་། གླང་པོ་དང་། འཚོ་སྨན་གྱི་གཙོ་བོ་དཔག་ཏུ་མེད་པ་དང་།མདོར་ན་ཡོད་དགུ་ཅོག་གི་རྫས་བསྟབས་ཏེ་འབུལ་བ་བགྲང་དུ་འདས་པ་ཀུན་ངོ་མཚར་བར་བགྱིས་སོ། །དེ་ནས་འདུས་པའི་ཚོགས་དང་ལྷན་ཅིག་པར་དགོན་གནས་འབྲུག་ཅེས་བྱ་བའི་གཙུག་ལག་ཁང་དུ་ཕེབས་སོ། །ཟང་ཟིང་གི་ཡོ་བྱད་ཇི་སྙེད་པ་འགྲོ་བ་གྲངས་མེད་པ་ལ་སྦྱིན་གཏོང་ཆེན་པོ་མཛད་ནས། དབུལ་བའི་གུད་པ་མངོན་པར་བཅོམ་སྟེ། ལོངས་སྤྱོད་ཀྱི་བདེ་བས་འཚོའོ། །དེ་ལྟར་ཡུལ་གང་དང་གང་དུ་བྱོན་པ་ཐམས་ཅད་དུ་ལོངས་སྤྱོད་ཟད་མི་ཤེས་པར་གྱུར་ཀྱང་། སློབ་མའི་ཚོགས་རྣམས་འཇིག་རྟེན་གྱི་ཞེན་ལོག །ཚེ་བློས་བཏང་གི་སྒྲུབ་པ། ལམ་ཟབ་བླ་མའི་མོས་གུས་རྣམས་ཆེད་དུ་བཟུང་བས། གནས་ལུགས་ཀྱི་རྟོགས་པ་གཤའ་མ་འཁྲུངས་པ་ཁྲི་ལྔ་སྟོང་ཙམ་དང་། གཞན་ཡང་དྲོད་ཐོབ་པའི་སྒྲུབ་པ་པོ་གཞལ་དུ་དབེན་པ་རྣམས་ལ། མེ་ཡོས་དགུང་ལོ་ཞེ་བདུན་དུ་སོན་པ་ན་བཀའ་སྩལ་པ། འཇིག་རྟེན་བློ་ཡིས་ཐོང་ལ་སྒྲུབ་པ་སྙིང་པོར་གྱིས། །ཚེ་ལ་ལོང་མེད་སྒོམས་ལ་རྩེ་གཅིག་ཏིང་འཛིན་སྒོམས། །ཞེན་ལོག་མཐའ་རུ་སྐྱོལ་ལ་ཕྱོགས་མེད་རི་ཁྲོད་འགྲིམས། །ལམ་གྱི་རྩ་བ་ཡིན་པས་བླ་མའི་མོས་གུས་འབོད། །
3-88
ཉམས་ལེན་གྱི་སྙིང་པོ་རྩ་ཐིག་རླུང་གསུམ་ལ་སྦྱོངས། །བསྟན་པའི་གཞི་མ་རབ་ཏུ་བྱུང་བའི་རྟགས་དང་མ་བྲལ་བའི་ངང་ནས་སྒྲུབ་པ་སྙིང་པོར་གྱིས་ཤིག །ཅེས་སོགས་ཞལ་གདམས་མང་དུ་གནང་སྟེ། ཨོ་ཌི་ཡ་ཎ་དང་། ནཻ་པཱ་ལ་དང་། ཛཱ་ལནྡྷ་ར་དང་། བཛྲ་ས་ན་དང་། ཀསྨཱི་ར་དང་། གྲྀ་དྷ་ཀུ་ཊི་པརྦ་ཏ་དང་། མཧཱ་ཙཱི་ན་པཉྩ་གིར་ཏི་དང་། ཙ་རི་ཏྲ་དང་། ཏི་སེ་དང་། ཤམྦྷ་ལ་དང་། ཆུ་བོ་སི་ཏཱའི་འགྲམ་དང་། ཀཻ་ལ་ཤ་ལ་སོགས་པ་ཡུལ་ཉེར་བཞི་དང་། གནས་སོ་གཉིས་རྣམས་སུ་སྒྲུབ་པ་ཁོ་ན་ལ་འབོད་ཅིག་གསུངས་ནས། གྲངས་ལས་འདས་པའི་འདུས་པ་ཕྱོགས་དེ་དང་དེ་དག་ཏུ་བཀྱེ་བར་མཛད་ནས། ལོ་གཅིག་གི་བར་དུ་སྟན་གཅིག་ལ་གཡོ་བ་མེད་པར་བཞུགས་སོ། །སླད་མ་ཚོགས་པ་གསར་བུ་མང་པོ་འདུས་ཤིང་། རྙིང་པའང་འགའ་རེ་ལོག་པ། དེ་དག་ལའང་སྨིན་པ་དང་གྲོལ་བའི་ལམ་ཇི་སྙེད་པ་རྗེས་སུ་གནང་བས་གྲོལ་བ་ཆེར་ཐོབ་པར་གྱུར་ཏོ། ། དེ་དུས་རྗེའི་ཞལ་ནས། ངས་འགྲོ་དོན་འགྲུབ་མི་འགྲུབ་བལྟས་པ་ཡིན་ཏེ། འགྲུབ་པར་འདུག །བསྒོམ་དང་འགྲོ་དོན་གེབས་གང་ཆེ་བལྟས་པས། འགྲོ་དོན་གེབས་ཆེ་བར་འདུག་ནས་འགྲོ་དོན་བྱས་པ་ཡིན། ཕྱིས་ལོང་མི་འོང་བར་འདུག །ཁྱེད་རྣམས་ཀྱང་ཐོས་པ་ལ་སོགས་པའི་གཡེང་བར་མ་སོང་བ་གྱིས། 
3-89
མ་བསྒོམས་པའི་ཆོས་ཀྱིས་འཚང་མི་རྒྱ་བ་བླ་མ་གོང་མ་རྣམས་ཀྱིས་གསུང་གིན་གདའ་བ། སྐབས་སུའང་དཔེ་ཆ་བྲིས། གདམས་ངག་ཞུས། སློབ་དཔོན་ནམ་འཆི་མི་ཤེས་པས། དགེ་སྦྱོར་འབུངས་ལས་གྱིས་གསུང་། ཡང་ཉིན་གཅིག་རྗེའི་ཞལ་ནས། སྒོམ་མ་ཚར་བ་རྣམས་བརྩོན་འགྲུས་བསྐྱེད་ལ་སྒོམས། མི་ལ་རས་པའི་བུ་བརྒྱུད་འདི་སྐྱིད་སྡུག་ལ་རྩིས་གདབ་མི་གཏོང་བར་བསྒོམས་པས་སངས་རྒྱས་པ་ཡིན་གསུང་ནས་སྐུ་མཚམས་དམ་དུ་གནང་ངོ་། །དེར་གྲྭ་པ་རྣམས་ལ་མཐོང་སྣང་མང་དུ་བྱུང་སྟེ། ལ་ལས་ནི་བདེ་མཆོག་གི་སྐུ་ལ་སྤྱན་སྟོང་འདུག་པར་མཐོང་བ་དང་། ལ་ལས་རྗེ་བཙུན་མར་གཟིགས་པ་དང་། ལ་ལས་རྡོ་རྗེ་འཆང་བར་མཐོང་བ་དང་། ལ་ལས་གཏུམ་པོ་འཇིགས་སུ་རུང་བར་མཐོང་བ་དང་། ལ་ལས་ཐུགས་རྗེ་ཆེན་པོར་གཟིགས་པ་དང་། ལ་ལས་སྐུ་རྣམ་པ་གསུམ་དང་མང་པོའི་བར་མཐོང་བ་དང་། ཕྱི་དང་ནང་གང་དུ་ཕྱིན་ཀྱང་རྗེ་ཉིད་ནང་དུ་སྐུ་མཚམས་ཀྱི་ངང་དུ་བཞུགས་པ་དང་། ཕྱིར་ཆོས་གསུང་བར་མཐོང་བ་སོགས་རྫུ་འཕྲུལ་གྱིས་སེམས་རངས་པར་བྱས་སོ། །དེ་ནས་ར་ལུང་ནས་བུ་སློབ་རྣམས་ཀྱིས་ཕོ་ཉ་བ་བཏང་སྟེ། སྤྱན་འདྲེན་པར་གསོལ་བ་ཞལ་གྱིས་འཆེས་ནས། འབྱོན་པར་མངོན་དུ་ཕྱོགས་པའི་ཚེ། རྗེའི་ཞལ་ནས། སློབ་དཔོན་གཙང་དུ་གྲོངས་ན་གཙང་པ་འཚེངས། དབུས་སུ་གྲོངས་ན་གཙང་པ་རྣམས་ཁྲེས་པོ་ཕྲ་ལ་རིང་བ་རེ་ཁུར་ནས་དབུས་སུ་འོང་བ་མིན་པ་མེད། 
3-90
ཁྱེད་རྣམས་ཆོས་དང་གདམས་ངག་ལ་ནན་ཏན་ད་ལྟ་གྱིས་ཤིག །དཔེ་ཆ་དགོས་ནའང་ད་ལྟ་བྲིས། ཕྱིས་གྲོགས་པོའི་ཕོངས་སུ་མགོ་འཚང་བ་དཀའ་མོ་ཡོད་དོ། །ཞེས་སོགས་སྐྱོ་བའི་གསུང་མང་དུ་སྩལ་ནས། དཔོན་སློབ་བརྒྱ་ཕྲག་དུ་མ་དང་སྟབས་གཅིག་པར། ཉི་མ་གཙང་སྟོད་ཀྱི་ཕྱོགས་སུ་ཕེབས་པར་ཆས་སོ། །ཕེབས་ལམ་རོང་ཆུང་ནས་གཙང་གཞུང་ལ་མཛད་དེ་ཡར་བྱོན་པ་ན། རྗེའི་ཞལ་ནས། ལམ་འདི་ལ་འོང་བའང་ད་རེས་ཙམ་ཡིན། ཞེས་སོགས་རིང་པོར་མི་བཞུགས་པའི་གསུང་ཡང་མང་དུ་གནང་ངོ་། །གཙང་གཞུང་དུ་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་མཇལ་བར་བྱོན་ནས་བསྙེན་ཅིང་བཀུར། འབུལ་བའི་ཚོགས་མང་པོ་བསྟབས། ཆོས་ཀྱི་འབྲེལ་དང་གསུང་རབ་ཀྱི་འབེལ་གཏམ་ཡང་ཞུས། ཐུགས་དགྱེས་པའི་རྣམ་པ་མང་པོ་མཛད་དོ། །དེ་ནས་ར་ལུང་དུ་ཕེབས་པའི་ཚེ། ཉང་སྟོད་ཀྱི་མི་རྣམས་འདུས། འབུལ་བ་དང་བཀུར་སྟི་ཆེན་པོ་བྱས། ཚོགས་པ་གསར་རྙིང་མ་ལུས་པ་ལ་ཆོས་དང་ཟང་ཟིང་གིས་ཚིམ་པར་མཛད་དོ། ། དེའི་དུས་བུ་སློབ་རྣམས་ལ། ཁྱེད་ཀུན་གྱིས་རང་གཞན་གྱི་དོན་རླབས་ཆེན་པོ་མི་ཉམས་ཤིང་ཕྱི་རབས་བསོད་ནམས་བསགས་པའི་དོན་དུ་རྩ་བརྒྱད་བཞེངས་ཤིག་ཅེས་བསྒོ་བ་ཉན་ཏེ། ཚོགས་པ་ཁྲི་ཕྲག་མང་པོས་བརྩིགས་པས་དེ་ཉིན་ལ་དགུ་བཞེངས་གྲུབ་སྟེ་ཞུས་པ་དང་། རྗེའི་ཞལ་ནས། 
3-91
ད་སང་ཉིན་ཀྱང་ཁྱེད་རྣམས་ཀྱིས་འབད་རྩོལ་དྲག་ཏུ་ཐོན་ལ་ཅི་མང་བཞེང་ཐུབ་པ་གྱིས་ཞེས་བཀའ་སྩལ་ཏོ། །དེ་ནས་མཚན་མོའི་ཐུན་རྫོགས་མ་ཐག་པའི་ཆ་ལ་ཐམས་ཅད་འདུས་ཏེ། ཉིན་ཐོག་ཐག་ཏུ་འབད་ཀྱང་གསུམ་ལས་བཞེངས་མ་སྤོབས་པ་དང་། རྗེ་ལ་གསོལ་པ། ཅི། ཁར་རྩང་ནི་མཆོད་རྟེན་དགུ་ཡང་བཞེངས་པར་ནུས་ལ། དེ་རིང་མི་རྣམས་ཀྱང་དེ་ལས་ཆེས་མི་ཉུང་བར་སྣང་ཞིང་། རྩོལ་བ་དྲག་པོས་བསྒྲུབས་ཀྱང་གསུམ་མ་གཏོགས་བཞེངས་མ་གྲུབ་པ་ཇི་ལྟར་ལས་གྱུར་ཅེས་ཞུས་པ་དང་། རྗེའི་ཞལ་ནས། འཕགས་པའི་ཡུལ་གྱི་གྲུབ་ཆེན་བརྒྱད་ཅུ་རྩ་བཞིའི་ནང་ནས། འདིར་དགུ་སེང་གེའི་མཚན་ཅན་གྱི་ཚུལ་བཟུང་སྟེ། སྒྲུབ་བརྒྱུད་ཀྱི་བསྟན་པ་འཛིན་ཅིང་རྒྱས་པར་བྱེད་དོ། །དེ་ལས་རྟིང་མར་ཇི་ཙམ་ཞིག་འབད་ཀྱང་། གསུམ་ལས་མ་གྲུབ་པ་ནི། དེའི་རྗེས་སུ་རིགས་གསུམ་མགོན་པོའི་རྣམ་སྤྲུལ་བྱོན་ནས་གཞན་དོན་རྒྱ་ཆེན་པོ་མཛད་དེ། དེ་དག་གི་རྒྱུ་ཐམས་ཅད་ཀྱི་རྟེན་འབྲེལ་རྣམས་དེ་ལས་གྲུབ་པ་ཡིན་ནོ། །དེའི་རྗེས་ཐོགས་སུ་ཁོ་བོ་རང་སླེབ་དགོས་པའི་དུས་གཅིག་འོང་བར་འདུག་གི་ཞེས། དཔལ་མཚུངས་མེད་རྒྱལ་བའི་དབང་པོ་འབྱོན་པར་ཡང་ལུང་བསྟན་ནོ། །དེའི་ཚེ་ལྷོ་བྲག་དོལ་བུ་ཆུང་གི་ཡུལ་ལྗོངས་ག་ལ་བར་སྦྱངས་པའི་སྟོབས་སད་པ། ཚོགས་གཉིས་ཀྱི་འབྲས་བུས་ཕྱུག་པ། 
3-92
སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས་ཤིང་དབང་བསྐུར་བའི་རྒྱལ་བའི་མྱུ་གུ་ཞིག་བྱང་ཆུབ་སེམས་དཔའི་སྤྱད་པ་སྤྱོད་ཅིང་། ཞི་ཞིང་དུལ་བ། མངོན་པར་མཛེས་ཤིང་སྨྲ་མཁས་དང་ལྡན་པ། གཞོན་ནུའི་རོལ་རྩེད་ཀྱིས་འགྲོ་བའི་ཡིད་བསླུ་བ། བྱིས་པའི་ངང་ཚུལ་དང་བྲལ་ཞིང་རྟག་ཏུ་མི་རིངས་པའི་སྤྱོད་ལམ་གྱིས་མཛེས་པ་ཞིག །རང་གི་དྲྭ་མ་རྣམས་དང་བྱུག་རིས་གཅིག་པར་རྩེ་ཞིང་རོལ་བར་གནས་པའི་ཚེ། སྤྲུལ་པའི་གླུ་མཁན་ལྔ་བྱུང་སྟེ། སྙན་པའི་གདངས་ཀྱིས་འདི་སྐད་ཅེས། ར་ལུང་གི་ཆོས་རྗེ་རྒྱ་རས་ལ། །ཚེ་འདི་ཕྱི་གཉིས་ཀྱི་བདེ་ལེགས་ཡོད། །ཅེས་སོགས་གསན་པའི་མོད་ལ་དད་པའི་སྤུ་ལོང་དྲག་ཏུ་གཡོས་ཤིང་གདུང་ཤུགས་ཀྱིས་མཆི་མ་འཁྲུགས་ཏེ་རང་གི་ཕའི་གན་དུ་སོང་ནས། དམ་པའི་ཆོས་ལ་འགྲོ་བར་བགྲོས་ཏེ་འོངས་ནས། རྗེའི་དྲུང་དུ་གཙུག་ཕུད་བྲེགས། མགོན་པོ་རྡོ་རྗེ་ཞེས་པའི་མཚན་བཏགས། དཔལ་འཁོར་ལོ་སྡོམ་པའི་དབང་དང་། ཕྱག་རྒྱ་ཆེན་པོ། ནཱ་རོའི་ཆོས་དྲུག་རྣམས་གསན་ཅིང་རྗེས་སུ་འབྲང་ངོ་། །དེའི་དཔྱིད་ཁ་རོར་བཞུགས་ཤིང་། དེ་ནས་སྤོས་སྐྱའི་རི་ཁྲོད་ལ་བཞུགས་པའི་དུས། སྐུ་བསྙུན་པ་ཞིག་བྱུང་བ་ལ། བུ་སློབ་རྣམས་ཀྱིས་སྐུ་ཡི་རིམ་གྲོ་བགྱི་བར་འཚལ་ལགས་ཞེས་གསོལ་པ་དང་། རྗེའི་ཞལ་ནས། ང་རོ་སྙོམས་ཀྱི་རྣལ་འབྱོར་པ་ལ། 
3-93
གང་བྱུང་རྒྱན་དུ་འཁྱེར་བ་མ་གཏོགས། ཟང་ཟིང་བློས་བྱས་ཀྱི་རིམ་གྲོས་ཅི་ཞིག་བྱ་གསུང་ནས་མ་གནང་ངོ་། ། དེ་ནས་མི་རིང་བ་ན། སྙུན་དེངས་ཏེ་ཕྱག་རྒྱ་ཆེན་པོ་དང་ཕྲ་རྒྱས་ཆེན་མོ་ཡི་གེར་བཀོད་དོ། །དེ་ནས་ར་ལུང་དུ་གཙུག་ལག་ཁང་བརྩིགས། བུ་སློབ་ཀྱི་ཚོགས་རྣམས་ཀྱིས་རྗེའི་འདྲ་འབག་སྐུ་ཚད་ཅིག་བཞེངས་པ་ཉིད་ཀྱིས་རབ་ཏུ་གནས་པ་མཛད་དེ། བྱིན་རླབས་ཀྱི་སྟོབས་མངོན་པར་མངའ་བ་སྐུ་འབག་ཁམས་གསུམ་ཟིལ་གནོན་དུ་གྲགས་སོ། །ཁ་རོ་ལ་སོགས་པའི་དབེན་གནས་རྣམས་སུ་འགའ་ཞིག་རེ་བཞུགས། སྔོན་གྱི་རྣམ་པར་ཐར་པ་དང་། ཡུན་རིང་དུ་མི་བཞུགས་པའི་གསུང་ཡང་དུ་མར་བྱོན་ནོ། །དེ་ནས་དགོན་པར་ཕེབས་ཏེ་ཆོས་མང་དུ་གསུངས་པའི་གྲལ་དུ། ཁྱེད་རྣམས། ད་ལྟ་བླ་མ་ཞལ་བཞུགས་པའི་དུས་སུ། ཆོས་ལ་ནན་ཏན་གྱིས་ཞེས་ཡང་དང་ཡང་དུ་གསུང་ངོ་། །ཁྱད་པར་ཇོ་མོའི་བྱིན་རླབས་ཤིག་མཛད་པའི་ཚེ། གྲྭ་བུ་སློབ་དང་། ཡོན་བདག་ཕོ་མོ་ཐམས་ཅད་ཚོགས་པ་ལ། ཁྱེད་རྣམས་འཚེངས་པ་ཡིན་ནོ། །དགའ་བར་སོམས་ཤིག །ཁོ་བོ་ཡང་མ་བརྗེད་པར་གྱིས་ཤིག་དང་། དེས་ཆོག་པ་ཡིན་ནོ་ཨང་ཞེས་གསུང་ངོ་། །དེ་ནས་དབུས་སུ་སྤྱན་འདྲེན་པར་གསོལ་བའི་རྟ་པ་དང་རྐང་ཐང་མང་པོ་བྱུང་ནས། ཕེབས་པར་ཕྱོགས་པ་ན། ར་ལུང་གི་གྲྭ་བུ་སློབ་དང་ཡོན་བདག་རྣམས་ཀྱིས་མཐོ་དཀར་པོ་ལ་ཐུག་གི་བར་གཤེགས་སྐྱེམས་འབུལ་ལ་འབྲངས་སོ། །
3-94
བྱེ་བྲག་ཏུ་སྐུ་ཕྲ་མོའི་དུས་ནས་བདེ་བར་སྐྱོང་བའི་མ་ཉེ་ན་ཚོད་ཀྱི་ཁུར་གྱིས་ངལ་བ་ཞིག་ཡོད་པ་ན་རེ། ད་བུ་ཁྱེད་དང་ང་མི་འཕྲད། ཀྱེ་མ་ཞེས་མཆི་མ་མང་པོ་འདོན་གྱི་འདུག་པ་ལ། རྗེས་ཨ་མའི་ལག་པ་ནས་བཟུང་སྟེ། ན་མོ་རིན་པོ་ཆེ། ཨ་མ་དང་དུས་འདི་ནས་གྱེས་ཤིང་གྱེས་པ་ན། །ཨ་མ་ཁྱོད་ཆོས་ཉིད་ཡང་དག་པའི་ལམ་ལ་ཤོག །བུ་ངས་ཀྱང་མཐའ་བྲལ་ཆེན་པོའི་ལམ་ལ་ཡོངས་ལ། །ཆོས་ལྟ་བའི་ལ་ཀར་ཞལ་མཇལ་བ་བྱས་ནས། །ལྟ་བ་འདི་ལ་ཕྱོགས་རིས་མེད་པས། །འོ་སྐོལ་མ་སྨད་གསུང་གླེང་གཤའ་མ་ཞིག་བྱའོ། །ཞེས་སོགས་མགུར་གྱི་ཕྱི་མ་གསུངས་ནས། ཨ་མ་ཁྱེད་དགེ་སྦྱོར་གང་ནུས་གྱིས། འཇིག་རྟེན་གྱི་མཛའ་བཤེས་ལ་སྙིང་པོ་མེད་དོ་ཞེས་གདམས་པས། མས་ཀྱང་སྤྲོས་པ་བཅད་དེ་མཉམ་པར་གཞག་ནས་བསྒོམས་པས་སེམས་ལ་བརྟན་པ་ཐོབ་པར་གྱུར་ཏོ། །ཡང་རྗེའི་ཞལ་ནས། ར་ལུང་གི་བུ་སློབ་རྣམས་ལ། ར་ལུང་ལ་མ་གྱིས། དེ་མིན་རྣམས་ལ་བུ་དང་ལག་གྱིས། འགྲོགས་ལུགས་བཟང་བ་གྱིས་ཤིག་ཅེས་གསུང་ངོ་། །གྲྭ་པ་རྣམས་ཀྱིས་ཞུས་པ། ནམ་རྗེའི་ཞལ་མཇལ་ཞེས་ཀུན་མཆི་མ་འབྱིན་ཞིང་ཡིད་འཕྲེང་འཕྲེང་པོར་བྱེད་དོ། །དེར་རྗེའི་ཞལ་ནས། ཆོས་ཀྱི་དབྱིངས་སུ་འཕྲད་པར་བྱའོ། །ད་ཁྱེད་རྣམས་བཞུགས་ཤིག །ངེད་འགྲོ་བ་ཡིན་ནོ་གསུངས་ནས། 
3-95
ཐམས་ཅད་ཀྱང་ཕྱག་དང་སྨོན་ལམ་རྒྱ་ཆེན་པོ་བགྱིས་ཏེ་ཕྱིར་ལོག་གོ། །དེ་ནས་དགེ་འདུན་བརྒྱ་ཕྲག་མང་པོས་མངོན་པར་བསྐོར་ནས་ཁ་རོ་ཕྱོགས་བརྒྱུད་དེ་ཕེབས་སོ། །ཡར་འབྲོག་སྟག་ལུང་དང་ཉེ་བར་སོན་པ་ན་མི་མང་པོ་སྤྱན་འདྲེན་དུ་བྱུང་ངོ་། །ཁྱེད་རྣམས་ཀྱི་འབུལ་བ་ཞབས་ཏོག་བྱས་པ་དང་ཁྱད་མེད། ད་རེས་རྟེན་འབྲེལ་ཞིག་གིས་མི་འགྲོ་ཞེས་གསུངས་པས། ཁོང་རྣམས་ཀྱིས་ཆིབས་མཐུར་ལ་བཟུང་པས། རྗེས་ཆིབས་མྱུར་ཐབས་སུ་བཤོལ་ཏེ་བཞུགས་སོ། ། དེས་ཁོང་རྣམས་མ་དགའ་སྟེ་ཆོ་ངེས་འདེབས་ཤིང་སོང་བ་དང་། གྲྭ་པ་རྣམས་ཀྱིས་གསོལ་པ། ཁོང་རྣམས་ཀྱིས་དེ་ལྟ་བུའི་ཞུ་ནན་ཆེ་བ་ལ་འབྱོན་པར་མི་གནང་བ་ཇི་ལྟ་བུ་ལགས། ཞུས་པ་དང་། རྗེའི་ཞལ་ནས། དེར་ཕྱིན་ན་དབུས་སུ་མི་བརྟོལ་བ་འདུག །རང་རེ་ཕ་བུ་ཚོ་འབྲུག་ཏུ་ཕྱིན་ནས་དགེ་སྦྱོར་བྱ་གསུང་ནས་གཞུང་ལ་བྱོན་ཏོ། །དེར་སྟོད་སྨད་ཀྱི་སྐྱེ་བོ་མ་ལུས་པ་འདུས་ཏེ། གུས་པས་འདུད་ཅིང་མཆོད་པའི་ཚོགས་ཀྱིས་དགེ་འདུན་དགྱེས་པར་བྱས་སོ། །རྗེ་ཉིད་གང་དུ་ཕེབས་པའི་ས་ཕྱོགས་སུ།འབུམ་དང་ཁྲི་ཕྲག་གི་ཁྲོམ་ལྷགས་ཏེ། ཞལ་བལྟ་ཞིང་སྨོན་ལམ་དང་གསོལ་བ་འདེབས་སོ། །དེ་རྣམས་ལའང་། གསུང་གི་འབྲེལ་བས་བདེ་བའི་ལམ་དུ་འགོད་པར་མཛད་དོ། །དེ་ནས་འབྲུག་ཏུ་ཕེབས་པ་དང་། རྗེའི་ཞལ་ནས། 
3-96
འོ་འབྲུག་ཏུ་སླེབ། ལམ་དུ་མ་ལུས་པ་ཁ་རྗེ་རེ་ཆེ་གསུང་ངོ་། །དེའི་དུས་སུ་འབྲུག་ཏུ་འགྲོ་བའི་དོན་རྒྱ་ཆེན་པོ་འགྲུབ་བཞིན་པའི་དབུ་ཆེ་སྟོང་ཕྲག་གཉིས་དང་བརྒྱ་ཕྲག་བརྒྱད། དགེ་སློང་གི་དགེ་འདུན་འབུམ་ཕྲག་ཙམ་འདུས་ཤིང་། ཉི་མ་འགའ་ཞིག་གི་བར་ཆོས་གསུངས་ནས། ད་གར་ཡང་མི་འགྲོ་བར་འདི་ཁོ་ནར་སྡོད་པ་ཡིན། ཁྱེད་བུ་སློབ་ཆོས་དང་དམ་ཚིག་ལྡན་པ་རྣམས་བསྒོམ་དུ་རྒྱུགས། མ་ཚར་བ་རྣམས་བརྩོན་འགྲུས་སྐྱེད་ཅིག་གསུངས་ནས་སྐུ་མཚམས་ལ་བཞུགས་སོ། །དེར་དབྱར་སྐུ་སྙུན་ཞིག་གིས་ཉེན་པ་ན། གྲྭ་པ་རྣམས་ཚོགས་ནས་བགྲོས་ཏེ། གསོལ་པ། སྙུན་འདི་ལ་སྨན་དཔྱད་དང་རིམ་གྲོ་ཞིག་སྩལ་དུ་ཞུ། གསུངས་པ། ཁོ་བོ་ལ་མི་ཕན་ཀྱང་ཁྱེད་རང་རྣམས་ཁོ་ཐག་ཆོད་ཅིང་ཚོགས་རྫོགས། འཆི་དུས་སུ་གང་དགའ་བྱེད་འཇུག་པ་ཡིན་གསུངས་ནས་གནང་ངོ་། །དེ་ནས་བུ་སློབ་རྣམས་ཀྱིས་ཐུན་མང་དུ་བཙུགས་ནས། གསོལ་བ་ཇི་ཙམ་ཞིག་བཏབ་ཀྱང་། སྙུན་མ་དེངས། ནམ་མཁའ་ལ་འཇའ་འོད་འཁྲུག་པ་དང་། ཉི་མ་མང་པོ་ཤར་བ་དང་། སྒྲ་ཆེན་པོ་གྲགས་པ་སོགས་ལྟས་མང་པོ་བྱུང་ནས། སྤྱན་སྔར་བཞུགས་པ་རྣམས་ཀྱིས། འདི་ལྟ་བུའི་ལྟས་སྔར་མ་མཐོང་བར་གྱུར་ཏེ། རྗེའི་ཞལ་སྔ་ནས་མི་བཞུགས་པའི་རྟགས་མ་མཆིས་ལགས་གྲང་། ངེད་རྣམས་ལ་ཞལ་ཆེམས་ཤིག་གནང་བ་ཞུ། 
3-97
ཞེས་གསོལ་པས། རྗེའི་ཞལ་ནས། ཁོ་བོ་ད་རེས་ལྟ་མི་འཆི་སྟེ། ཤི་རུང་མ་ཤི་རུང་། དཔོན་སློབ་ཀྱི་རྟེན་འབྲེལ་བསྒྲིག་པའི་དོན། བླ་མའི་རབས་མ་ཆད་པ་འདི་ཡིན། ཕྱག་རྒྱ་ཆེན་པོའི་སྒོམ་ཁྲིད་ཚར་པ་ཚོ་ཕ་ཡི་བུ་ཡིན། གསར་པ་ཚོས་ཀྱང་ཕལ་ཆེར་ཚར་ཡོད། བླ་མ་ལ་བླ་མ་རུ་སེམས་མཁན་ཚོས་གྲོས་གྱིས་ལ། གཞན་དུ་འགྲོ་བ་གཞན་ལ་ཐོང་། དེ་མ་ཡིན་པ་ཚོ་ལོ་གསུམ་བླ་མའི་མྱ་ངན་གྱིས་ལ། དྲག་ཤོས་ཚོས་འདག་སྦྱར་གྱིས་ལ་འཁོར་སྐྱོངས། དེ་འོག་ཚོས་རེ་རེ་གཉིས་ཁྲིད་ལ་རི་ཁྲོད་འགྲིམས། མྱ་ངན་ལ་བྲོ་བརྡུང་སྙིང་འདོད་པས་བྲོ་རྡུངས། ངུ་སྙིང་འདོད་པ་ཚོ་ངུས། གསོལ་བ་འདེབས་སྙིང་འདོད་པ་ཚོ་གསོལ་བ་ཐོབ། སྙིང་ལ་ཅི་དྲན་དྲན་བྱས་ཀྱང་མྱ་ངན་དུ་འགྲོ་བ་ཡིན་གསུང་། ལོ་གསུམ་གདུང་རྟེན་ལ་སོགས་པ་གཅིག་ཀྱང་མ་བྱེད་པར་སྒོམས། ལོ་གསུམ་ནས་རྟེན་ཆུང་ཞིག་གྱིས། དེ་ནས་སྒོ་མང་ལ་སོགས་པ་བཞེངས་མཁན་ཡོང་གི་ཨང་གསུང་། སྒོ་མང་དེ་བཞེངས་ན་དྭགས་པོ་བཀའ་བརྒྱུད་ཀྱི་བུ་སློབ་ལ་མཐའ་རྒྱས་ཀྱི་རྟེན་འབྲེལ་ཡོད་པ་ཡིན། ང་ལ་ཡང་ཟོང་དུ་སྟོང་ཉིད་སྙིང་རྗེ་གཉིས་པོ་འདི་ཡོད་པ་ཡིན། ཚེ་འདི་ལ་ཡང་མི་ཚེ་ཕྱིད་ལ། ཕྱི་མ་ལ་ཡང་བདེ་བ་ཅན་དུ་འགྲོ་བ་ཡིན། ཁྱེད་རྣམས་ཀྱང་ཟོང་དེ་གཉིས་དང་མ་བྲལ་བ་གྱིས། 
3-98
མི་ཚེ་ཕྱིད་ནས་འོང་། ལགས་གྲང་། ངེད་རྣམས་ལ་ཞལ་ཆེམས་ཤིག་གནང་བ་ཞུ། ཞེས་གསོལ་པས། རྗེའི་ཞལ་ནས། ཁོ་བོ་ད་རེས་ལྟ་མི་འཆི་སྟེ། ཤི་རུང་མ་ཤི་རུང་། དཔོན་སློབ་ཀྱི་རྟེན་འབྲེལ་བསྒྲིག་པའི་དོན། བླ་མའི་རབས་མ་ཆད་པ་འདི་ཡིན། ཕྱག་རྒྱ་ཆེན་པོའི་སྒོམ་ཁྲིད་ཚར་པ་ཚོ་ཕ་ཡི་བུ་ཡིན། གསར་པ་ཚོས་ཀྱང་ཕལ་ཆེར་ཚར་ཡོད། བླ་མ་ལ་བླ་མ་རུ་སེམས་མཁན་ཚོས་གྲོས་གྱིས་ལ།གཞན་དུ་འགྲོ་བ་གཞན་ལ་ཐོང་། དེ་མ་ཡིན་པ་ཚོ་ལོ་གསུམ་བླ་མའི་མྱ་ངན་གྱིས་ལ། དྲག་ཤོས་ཚོས་འདག་སྦྱར་གྱིས་ལ་འཁོར་སྐྱོངས། དེ་འོག་ཚོས་རེ་རེ་གཉིས་ཁྲིད་ལ་རི་ཁྲོད་འགྲིམས། མྱ་ངན་ལ་བྲོ་བརྡུང་སྙིང་འདོད་པས་བྲོ་རྡུངས། ངུ་སྙིང་འདོད་པ་ཚོ་ངུས། གསོལ་བ་འདེབས་སྙིང་འདོད་པ་ཚོ་གསོལ་བ་ཐོབ། སྙིང་ལ་ཅི་དྲན་དྲན་བྱས་ཀྱང་མྱ་ངན་དུ་འགྲོ་བ་ཡིན་གསུང་། ལོ་གསུམ་གདུང་རྟེན་ལ་སོགས་པ་གཅིག་ཀྱང་མ་བྱེད་པར་སྒོམས། ལོ་གསུམ་ནས་རྟེན་ཆུང་ཞིག་གྱིས། དེ་ནས་སྒོ་མང་ལ་སོགས་པ་བཞེངས་མཁན་ཡོང་གི་ཨང་གསུང་། སྒོ་མང་དེ་བཞེངས་ན་དྭགས་པོ་བཀའ་བརྒྱུད་ཀྱི་བུ་སློབ་ལ་མཐའ་རྒྱས་ཀྱི་རྟེན་འབྲེལ་ཡོད་པ་ཡིན། ང་ལ་ཡང་ཟོང་དུ་སྟོང་ཉིད་སྙིང་རྗེ་གཉིས་པོ་འདི་ཡོད་པ་ཡིན། ཚེ་འདི་ལ་ཡང་མི་ཚེ་ཕྱིད་ལ། 
3-99
ཕྱི་མ་ལ་ཡང་བདེ་བ་ཅན་དུ་འགྲོ་བ་ཡིན། ཁྱེད་རྣམས་ཀྱང་ཟོང་དེ་གཉིས་དང་མ་བྲལ་བ་གྱིས། མི་ཚེ་ཕྱིད་ནས་འོང་། འཚོ་བ་ལྷས་སྦྱོར་བ་ཡིན། གསོལ་བ་འདེབས་པ་ཚོ་བླ་མ་སྒྲུབ་པ་ཁོ་ན་ལ་གཙོ་བོ་གྱིས། ཆོས་མ་བདེ་བ་ཐམས་ཅད་བླ་མས་ལུང་སྟོན་པ་འོང་། ང་ལ་ཡང་བྱུང་བ་ཡིན། ད་ལྟ་གསོལ་བ་བཏབ་པ་བས་ཕྱིས་བྱིན་རླབས་ཆེར་འགྲོ། ད་ལྟ་རྣམ་ཐར་ལ་ལེགས་ཉེས་བརྟགས་པས་ལན་པ་ཡིན། ལར་བླ་མའི་བརྒྱུད་འཛིན་རབ་འབྲིང་ཐ་གསུམ། ཡང་ཐ་དང་བཞི་སྟེ། རྟོགས་པས་སྣ་དྲངས་པའི་ཆོས་དང་། བཟང་ངན་འབྲིང་གསུམ་སྤྱི་བོར་འཁུར་བ་རྣམས་རབ་ཡིན། གདམས་ངག་ཚིག་བཤར་མ་ལས་མི་ཤེས་ཀྱང་། རྟོགས་པ་ལ་འཁོད་ན་འབྲིང་ཡིན། རྟོགས་པ་རང་གི་སྐྱོང་ཞིང་གཞན་གྱི་གདམས་ངག་སྐྱོང་ན་ཐ་མ་ཡིན། ངེད་རང་གི་གདམས་ངག་ཐམས་ཅད་ཤེས་ཀྱང་། སྒོམ་མི་ལ་མི་འཁོད་ན་བརྒྱུད་འཛིན་གྱི་ཡང་ཐ་ཡིན་ཞེས་བྱའོ། །བདག་གིས་ཀྱང་སངས་རྒྱས་གྲུབ་ཐོབ་སྣ་ཕུ་པའི་རབས་མ་བཅད་པ་ཡིན་པས། ཁྱེད་བུ་ཆེན་རྣམས་ཀྱིས་མགོ་བྱས་པ་རྣམས་ཀྱང་། ཕྱག་རྒྱ་ཆེན་པོའི་སྒོམ་ཡོད་ན། འཁོར་མཁན་མི་གཅིག་མེད་ཀྱང་། བསེ་རུ་ལྟ་བུའི་བྱང་ཆུབ་སེམས་དཔའ་ཞེས་བྱ་སྟེ། བརྒྱུད་པ་མ་བཟུང་པར་ཟིན་པ་ཡིན། མཛེ་ཕོ་མཛེ་མོ་རུ་འདུག་ཀྱང་བརྒྱུད་འཛིན་དུ་བགྲོངས་ཤིག །
3-100
ཁ་ཆེམས་འདི་ཤི་རུང་མ་ཤི་རུང་ནམ་བཞག་གཏན་གྱི་ཁ་ཆེམས་ཡིན་ནོ། །ད་རེས་ཤི་རུང་སེམས་ལ་ཞོག །ཕྱི་ལས་མ་ཤི་རུང་དེ་ལས་མེད་དོ། ། ངའི་གདམས་ངག་ཉམས་སུ་ལེན་པ་ཚོ། དགོས་འདོད་བླ་མ་ལ་ཞུ་བ་དང་། ཕྱི་རུ་བྱང་ཆུབ་ཀྱི་སེམས་སྦྱོང་བ་དང་། ནང་དུ་ཆགས་སྡང་ལ་ཛ་རྡུང་བྱའོ། །ཞེས་གསུངས་སོ། །དེ་ནས་སྙུན་ཅུང་ཟད་དེངས་པའི་ཚུལ་དུ་གྱུར་ནས། སྐུ་མཚམས་གློད་དེ་འཁོར་རྣམས་ལ་ཞལ་བསྟན། ཆོས་གསུངས། བསྔོ་བ་སྨོན་ལམ་མཛད། གསང་དགོན་དུ་གཏུམ་པོའི་བྱིན་རླབས་འཁོར་འགའ་ཞིག་ལ་གནང་། དེ་ནས་ཡང་དགོན་དུ་བྱོན་ནས། ངས་མཚན་ཉིད་པ་ཞིག་བྱས་ན་འགྲོ་ཕན་ཆེན་པོ་འོང་བ་མི་འདུག་སྟེ། མཁས་པའི་གྲགས་པས་འཕགས་པའི་ཡུལ་དུ་ཁྱབ་པ་ཞིག་འོང་བ་འདུག །བཀའ་གདམས་པ་བྱས་ན། བཙུན་པོར་གྲགས་ནས་ཀུན་གྱིས་སྤྱི་བོར་འཁུར་བ་ཞིག་འོང་བ་འདུག །འདུལ་བ་འཛིན་པ་ཞིག་བྱས་ན། དབུས་གཙང་གི་སྡེ་པ་ཐམས་ཅད་ཀྱིས་ལྡེ་མིག་གཏོད་པ་འོང་བར་འདུག །གསང་སྔགས་ཀྱི་གཞུང་བཤད་བྱས་ན། གྲགས་པས་གསང་བའི་བདག་པོ་དངོས་སོ་ཞེས་བྱ་བ་སྐད་ཟེར་བ་ཞིག་འོང་བར་འདུག་སྟེ། དེ་རྣམས་གང་ལས་ཀྱང་། ཕྱི་ཉན་ཐོས་ལ་ནང་གསང་སྔགས་སུ་བྱས་པ་འདི། འགྲོ་བ་ལ་ཕན་ཐོགས་པར་འདུག་ནས་འདི་བྱས་པ་ཡིན་གསུང་། 
3-101
ངའི་ད་ལྟའི་གདུལ་བྱ་འདི་རྣམས་ཁོ་བོ་རང་གི་འདུལ་དགོས་པར་འདུག་པས་འོངས་པ་ཡིན། ད་འདི་ནས་ཐག་རིངས་ཤིག་ཏུ་འགྲོ། ངས་རྗེ་གྲུབ་ཐོབ་ཆེན་པོའི་ཞབས་ཏོག་འགྲུབ་པ་ཡིན་ཞེས་གསུང་བ་དང་། འཁོར་རྣམས་ཀྱིས་གསོལ་པ། ཀྱེ་ཁམས་གསུམ་གྱི་རྒྱལ་སྲིད་ལ་ཆོས་ཀྱིས་དབང་བསྒྱུར་བ་ཆེན་པོ། བདག་ཅག་མ་རིག་གིས་ལྡོངས་པ་རྣམས་ལ་བརྩེ་བས་གཟིགས་ནས། རྗེ་ཉིད་སྔར་སྐུ་གང་དང་གང་དུ་འཁྲུངས། ད་འདི་ནས་གཤེགས་ནས་གང་དུ་འབྱོན། ཞེས་ཞུས་པ་དང་། རྗེའི་ཞལ་ནས། ཡོན་ཏན་ཀུན་འབྱུང་བླ་མ་དམ་པ་དང་། །དངོས་གྲུབ་རྩ་བ་མཁའ་འགྲོ་ཆོས་སྐྱོང་ལ། །གསོལ་བ་འདེབས་སོ་རྗེས་འཇུག་བྱིན་གྱིས་རློབས། །མོས་པའི་དོན་དུ་སྔོན་གྱི་དྲན་རྟོགས་བརྗོད། །སྐྱེ་བཞིའི་གོང་རོལ་ཁ་ཆེའི་ཡུལ་གྱི་ལྷོ། །ཀོ་ས་ལ་རུ་གྲགས་པའི་གྲོང་ཁྱེར་དེར། །མུ་སྟེགས་མ་ཡིན་བྲམ་ཟེའི་རིགས་སུ་སྐྱེས། །ཐེག་ཆེན་སྒོར་ཞུགས་རིག་གནས་ལྔ་ལ་མཁས། །ཏིལ་བརྡུང་ཀུན་གྲགས་བླ་མའི་ཞབས་ལ་གཏུགས། །དེ་ཚེ་ང་མིང་ཡེ་ཤེས་དངོས་གྲུབ་འབོད། །འགྲོ་འགའ་འདྲོངས་ཤིང་བཀའ་བརྒྱུད་འདི་ལ་ཕན། །དེ་རྗེས་རྣལ་འབྱོར་ཨ་ཤད་དྷ་ནར་སྐྱེས། །གྲུབ་ཐོབ་ཆེན་པོ་དུས་འཁོར་རྣལ་འབྱོར་པའི། །ཞབས་ལ་གཏུགས་ནས་མཁས་བསླབས་གྲུབ་རྟགས་བསྟན། །ཆོས་རྗེ་རས་པ་སྐྱེ་བདུན་བླ་མ་ཡིན། །མི་རྟག་ཚུལ་བསྟན་ཤར་ཕྱོགས་གསེར་གླིང་དུ། །
3-102
འགྲོ་དོན་གེབས་ཆེ་སྡིག་སྤྱོད་རྒྱལ་པོ་གདུལ། །དེ་ཚེ་ང་མིང་བདེ་བའི་འབྱུང་གནས་ཏེ། །སློབ་བུ་འགའ་ཡང་ཕྲིན་ལས་སྒྲུབ་བྱེད་འགྱུར། །ཕྱི་མའི་དུས་ན་འཁོར་དུ་གཏོགས་པ་རྣམས། །མངོན་དགའི་ཞིང་དུ་ང་ཡི་སྤྱན་སྔར་འཚོག །འདིར་ཡང་གདུང་གསོབ་བརྒྱད་ཅུ་རྩ་བཞི་དགུས། །བླ་མའི་བརྒྱུད་འཛིན་བསྟན་པ་རྒྱས་བྱེད་འགྱུར། །འདི་བཀོད་འགྲོ་དད་འཁོར་བ་དོང་སྤྲུག་ཤོག ། སྔོན་ཕྱིའི་རབས་མང་དུ་གསུངས་ནས་དབང་མོ་ཆེ་ཞིག་མཛད་པར་དགོངས་པ་ལ། འདུན་སར་འཁོད་པའི་བུ་སློབ་རྣམས་ཀྱིས། སྙུན་རྩ་བ་ནས་མ་དེངས་ཀྱི་བར། ཅིས་ཀྱང་མི་གནང་བ་ཞུ་ཞེས་གསོལ་བ་དང་། རྗེའི་ཞལ་ནས། ངའི་ལུས་འདིས་གཞན་ལ་མ་ཕན་ན། གསོན་ཡང་ཅི་བྱེད་གསུངས་ནས་དབང་མཛད་པས། ཉམས་པའི་སེལ་གྱིས་སྟ་གོན་གྱི་སྐབས་སུ་དྲག་ཏུ་བསྙུན་ནས། དེར་བུ་སློབ་རྣམས་ཀྱིས་གསོལ་བ་དྲག་ཏུ་བཏབ་པས། དངོས་གཞིའི་ནུབ་མོ་སྐུ་ཁམས་བདེ་བའི་རྣམ་པ་མཛད་དེ། དུས་གསུམ་སངས་རྒྱས་བྱོན་ཡང་འདི་ལས་ལྷག་པ་མེད་དོ་གསུང་བའི་ངོ་སྤྲོད་ཟབ་མོ་དང་། སྨོན་ལམ་མང་པོ་ཡང་གནང་། དུས་དོ་ནུབ་ཙམ་ཡིན། དགའ་བར་སོམས་ཨང་གསུངས་ནས་དགྱེས་པའི་ཚུལ་མང་པོ་མཛད། འདའ་ཀ་ཞལ་ཆེམས་ཀྱང་གསུངས་ནས། དགུང་ལོ་ལྔ་བཅུ་རྩ་གཅིག་གཞེས་པ། ལྕགས་ལུག་སྟོན་འབྲིང་ཐ་སྐར་གྱིས་ཉ་བའི་ཕྱོགས་ཕྱི་མར་གྱུར་པ་ཚེས་ཉེར་ལྔའི་མཚན་མོའི་ཐུན་དང་པོ་བགྲོད་པར་བབ་པ་ན། 
3-103
འཇིག་རྟེན་ཀུན་གྱི་ཉི་མ་གཅིག་པུ། གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུས་ཏེ་ཡོངས་སུ་མྱ་ངན་ལས་འདས་སོ། །དེའི་ཚེ་ཀུན་བཟོད་ཀྱི་ཁྱོན་ཆེན་པོ་མངོན་པར་གཡོས། རབ་ཏུ་ཡོས་ཤིང་། ཆུ་གཏེར་གྱི་ཚོགས་ཀྱང་ཀུན་ནས་འཁྲུགས་སོ། །ནམ་མཁའ་ལ་གྱིམ་ཤིང་གི་སྒྲ་སྣ་ཚོགས་པ་དང་། ཕན་ཚུན་དུ་འཇའི་གུར་ཕུབ་སྟེ་ཁ་དོག་ལྔ་པའི་དྲ་བས་སྦྲེལ་ལོ། །དེ་དག་མཐོང་བ་དང་མིའི་འགྲོ་བ་པ་རྣམས་གཅིག་གིས་གཅིག་ལ་གླེང་ངོ་། །དེའི་རྒྱུ་འགྲོ་བ་དུ་མའི་མགོན་གཅིག་པུ་བཞུགས་པ་མི་སྣང་བར་ཤེས་ཏེ། མྱ་ངན་གྱི་གཅོང་སྐད་འབྲུག་བྱེ་བའི་སྒྲ་བཞིན་དུ་སྒྲོག་ཅིང་། འཆི་མའི་ཚོགས་དྲག་པོའི་ཆར་ལྟར་དུ་འབེབས་སོ། །བཞིན་རས་ཐམས་ཅད་དུས་མཐའི་སྤྲིན་ཕུང་ལྟར་གནག་ཅིང་། ཀྱེ་མ་ཀྱི་ཧུད། བདག་ཅག་རྣམས་ཀྱི་སྐྱབས་དང་མགོན་མེད་དོ། །འགྲོ་བའི་མིག་དམ་པ་དེ་ནུབ་བོ། །ད་ནི་འཇིག་རྟེན་སྟོངས་པར་གྱུར་ཏོ། །ཞེས་སྨྲེ་སྔགས་མང་པོ་འདོན་ཏོ། །དེ་དག་གི་སྒྲ་རིགས་བཞི་པའི་ལྷ་རྣམས་ཀྱིས་ཐོས་ནས། མྱ་ངན་གྱི་ཆོ་ངེས་བཏབ་བོ། །དེ་སུམ་ཅུ་རྩ་གསུམ་པ་སོགས་འདོད་པའི་ལྷ་དང་། གཟུགས་ན་སྤྱོད་པའི་ལྷ་རྣམས་ཀྱིས་ཐོས་ཤིང་སྐད་གདངས་བརྣག་མིན་སྒྲོག་ཅིང་། ཅི་བྱ་གཏོལ་མེད་པར་གྱུར་ཏོ། །དེ་ནས་ལེགས་བྲིས་ཀྱི་ཚོགས་རྣམས་ཀྱི་དབང་པོ་འཁོར་དང་བཅས་པ་མཆོད་པའི་བྱེ་བྲག་ཇི་སྙེད་པ་ཐོགས་ཏེ། 
3-104
སྐུ་གདུང་གི་མདུན་གྱི་ནམ་མཁར་ལྷགས་ནས། མེ་ཏོག་འཐོར་ཞིང་། གདུགས་དང་། མར་མེ་དང་། བྱུག་པ་དང་། བཤོས་གཙང་དང་། རྒྱུད་མངས་དང་། པི་ཝཾ་གི་ཚོགས་ཀུན་གྱིས་མཆོད་པར་བྱས། རི་མོར་བྱས། རྗེད་པར་བྱས། ཕུད་དུད་དུ་བྱས། བསྟི་སྟང་དུ་བྱས་སོ། །གདུང་གི་རིམ་གྲོ་པ་ནི་ཤངས་པ་ཞིག་པོས་མཛད་དེ། བུ་སློབ་ཀྱི་ཚོགས་རྣམས་ཀྱིས་ཀྱང་། ཉིན་མཚན་བར་མཚམས་མེད་པར་ཉིན་ཞག་བཅོ་བརྒྱད་ཀྱི་བར་དུ་མཆོད་ཅིང་། ཕྱག་དང་། བསྐོར་བ་དང་། གསོལ་བ་འདེབས་པ་དང་། སྨོན་ལམ་མང་པོས་དུས་འདའ་བར་བྱས་སོ། ། དེ་ནས་རིན་པོ་ཆེའི་ཁང་པ་གྲུ་བཞི། སྒོ་བཞི་པ་དྲ་བ་དང་དྲ་བ་ཕྱེད་པས་མཚན་པ། ཤེལ་དང་། མུ་མེན་དང་། བྱུ་རུ་སོགས་རིན་པོ་ཆེའི་རྒྱན་དུ་མས་སྤྲས་པའི་དབུས་འཕྱུར་བུར་བྱས་པ་ལ་ཡིད་བཞིན་གྱི་ནོར་བུས་བརྒྱན་པ། ཕྱོགས་ཁོར་མོ་ཡུག་ཏུ་ཕྱེ་མ་ཕུར་མ་དང་། བ་དན་དང་། ལྷབ་ལྷུབ་ཀྱིས་མཛེས་པར་བྱས་ཤིང་། དྲི་བཟང་པོས་ཆག་ཆག་བཏབ་པ། དེའི་དབུས་སུ་ཙན་དན་སྦྲུལ་གྱི་སྙིང་པོ་དང་། ཧ་རི་ཙན་དན་སོགས་དྲི་ལྡན་གྱིས་འཁྲི་ཤིང་ལ། ཡིད་དུ་འོང་བ་སེང་གེའི་ཁྲི་བཤམས་ཏེ། དར་ཟབ་སྣ་ཚོགས་པས་མངོན་པར་ཀླུབས་པའི་སྟེང་དུ། སྐུ་གདུང་སྤྱན་དྲངས་ཏེ་མཆོད་པ་སྣ་ཚོགས་པ་ཕུལ་ལོ། །དེར་སྐད་ཅིག་ལ། མེ་ལྷའི་རྒྱལ་པོ་འཁོར་དང་བཅས་པ་མཆོད་པའི་ཕྱིར་འོངས་ཏེ། 
3-105
སྣ་ལྔ་པའི་ཁ་དོག་ཅན་གྱི་སྲེག་ཟའི་ཚོགས་ཀྱིས་མཆོད་པར་བརྩམས་པའི་ཚེ། སྐུ་གདུང་ལས་འོད་དཔག་ཏུ་མེད་པ་བཀྱེ་སྟེ། ཁམས་གསུམ་མ་ལུས་པ་སྣང་བར་བྱས་ནས། སླར་སྐུ་ལ་ཐིམ་པར་གྱུར་མ་ཐག་ལྟེ་བ་ནས་ཡེ་ཤེས་ཀྱི་མེ་ཆེར་འབར་བས་གདུང་བསྲེགས་སོ། །དེ་ལྟར་ལྷ་དང་བཅས་པའི་འགྲོ་བ་དང་། འདུས་པའི་དགེ་འདུན་ཁྲི་ཕྲག་ཚོགས་པ་རྣམས་ཀྱང་ངོ་མཚར་ནས་སྐད་གཅིག་པར་ཨ་ལ་ལ། འགྲོ་བའི་བླ་མ་ཆེན་པོ་འདི་ལྟ་བུའི་མཐུ་ཆེས་རྨད་དུ་བྱུང་ངོ་ཞེས་སྒྲོག་ཅིང་ཡིད་གདུང་བའི་སྒོ་ནས་བསྔགས་པ་བརྗོད་དོ། །དེ་ནས་རིན་པོ་ཆེའི་སྣོད་དུ་དྲི་ཞིམ་པོའི་ཆུ་བླུགས་ཏེ། ཁང་པ་བརྩེགས་པ་ནས་རིང་བསྲེལ་རྣམས་རིམ་པར་ཕྱུང་བ་ན། ཐུགས་དང་ལྗགས་རིང་བསྲེལ་གྱི་དྲ་བས་བརྒྱན་པ་དང་། རྗེ་བཙུན་ཞལ་གཉིས་མ་དང་། དཔལ་འཁོར་ལོ་སྡོམ་པའི་སྐུ་དང་། ཉེ་སྙིང་འབྲུ་བདུན་པ་དང་། ཡི་གེ་གསུམ་པ་དང་། མཆོད་རྟེན་དང་། སྐུ་ཚིགས་པ་ཉེར་གཅིག་ལ། འཕགས་པ་འཇིག་རྟེན་མགོན་པོ་ནོར་བུ་པདྨའི་སྐུ་དང་། དབུ་ཐོད་ལ་རིགས་གསུམ་མགོན་པོའི་སྐུ་དང་། གཞན་རིང་བསྲེལ་གྱི་ཚོགས་གྲངས་མེད་པ་ལུས་ཅན་གྱི་མཆོད་པའི་ཞིང་དུ་སྩལ་བ་རྣམས་སྤྱན་དྲངས་ཏེ། སྐུ་ཁྲུས་གསོལ་ནས། དར་དང་ཅོད་པན་སྣ་ཚོགས་པས་ཀླུབས་ཏེ། རིན་པོ་ཆེའི་ཟ་མ་ཏོག་གི་ནང་དུ་བཞུགས་སུ་གསོལ་ནས། 
3-106
དུས་རིང་པོའི་བར་མཆོད་པ་རྒྱ་ཆེན་པོ་བྱས་སོ། །འདུས་པའི་ཚོགས་ཐམས་ཅད་ལ། ཟས་དང་ནོར་གྱི་འགྱེད་ཆེན་པོས་ཚིམ་པར་བྱས་ཏེ་སྐྱེ་བོ་རྣམས་ཀྱང་ཤིན་ཏུ་དད་པ་ཐོབ་པར་གྱུར་ཏེ། མོས་པའི་རྟེན་དུ་བུ་སློབ་ཀྱི་ཚོགས་དང་བཅས་པའི་དད་འདུས་རྣམས་ལ། རྗེའི་གདུང་རྣམས་སོ་སོའི་མཆོད་པའི་གནས་སུ་བཀྱེའོ། །དེ་ནས་འདུས་པའི་དགེ་སློང་གི་དགེ་འདུན་རྣམས་ཀྱིས། རྗེའི་གསུང་། ཕྱོགས་མེད་ཀྱི་དབེན་པ་བསྟེན། བླ་མའི་མྱ་ངན་ལ་སྒྲུབ་པ་གྱིས། ཞེས་སོགས་ཞལ་གདམས་མང་དུ་གནང་བ་ཡི་དམ་དུ་བགྱིས་ཏེ། གསར་པ་རྣམས་སངས་རྒྱས་དབོན་དང་། རྒྱལ་བ་ལོ་རས་པ་སོགས་ཁྲིད་གཉེར་བ་རྣམས་ཀྱིས་ཁྲིད་བསྐྱངས་སོ། །གཞན་རྣམས་འཛམ་བུ་གླིང་ཆེན་པོའི་ས་ཀུན་གྱི་གནས་དང་། བས་མཐའ་དང་། རོ་ལྡན་དང་། ས་བླའི་གནས་དང་། ས་འོག་རྣམས་སུ་ཀུ་ས་ལི་དང་། ཞི་བ་དང་། བརྟུལ་ཞུགས་ཀྱི་ཚུལ་བཟུང་ནས། གནས་དེ་རྣམས་སུ་སོ་སོར་བྱོན་ནོ། །དེ་དག་ཏུ་ལ་ལས་ནི་འཇའ་ལུས་འགྲུབ། ལ་ལས་ནི་རིག་པ་འཛིན་པ་བརྙེས། ལ་ལས་གྲུབ་ཆེན་བརྒྱད་ལ་མངའ་མཛད། ཕལ་མོ་ཆེས་དངོས་གྲུབ་རྣམ་པ་གཉིས་ཀ་བརྙེས་ཏེ། ནམ་མཁའི་མཐའ་ཀླས་ཀྱི་འགྲོ་བའི་དོན་མཛད་ཅིང་བཞུགས་སོ།། །། དེ་ཡང་རྒྱལ་བ་མ་ལུས་པའི་འཕྲིན་ལས་ཀྱི་བྱེད་པོ། བཤད་དང་སྒྲུབ་པ་ཀུན་གྱི་བསྟན་པའི་མངའ་བདག་ཆེན་པོ། 
3-107
འགྲོ་བའི་མགོན་པོ་གཙང་པ་རྒྱ་རས་པ་ཞེས། ས་ཡི་སྟེང་ཀུན་ཏུ་གྲགས་པ་འདི་ཉིད་ཀྱིས་འདུས་པའི་ཚོགས་གྲངས་མེད་པ་སྨིན་པར་མཛད་པ་ལས། ཆེས་མཆོག་ཏུ་གྱུར་པ་ལ། དང་པོར་ཆེ་བ་པ་རྐྱང་གཉིས། བར་དུ་ཆེ་བ་རྒྱ་འབྲས་གཉིས། ཐ་མར་ཆེ་བ་ལོ་རྒོད་གཉིས་སོ། །འདི་གཉིས་ལས། སྟོད་འབྲུག་གནམ་གྱི་སྐར་མ་ཙམ་དང་། སྨད་འབྲུག་སའི་དྲེགས་པ་ལྟར་དུ་འཕྲིན་ལས་ཀྱིས་འགྲོ་བའི་དོན་རླབས་པོ་ཆེ་མཛད་དེ། དགའ་ཡེས་དང་། ཇོ་ཡེས་དང་། བདེ་ཡེས་ཏེ་རྣལ་འབྱོར་པ་གསུམ་མོ། །གཡག་རས། འགྲན་རས། ལི་རས་ཏེ་རས་པ་གསུམ་མོ། །རས་ཞིག །ཤངས་ཞིག །ཞིག་པོ་དཀོན་མཆོག་སེང་གེ །ཞིག་པོ་སྐྱེས་མཆོག་སྟེ་ཞིག་པོ་བཞིའོ། །དམ་པ་གཏེར་ཁུང་པ། དམ་པ་སྤ་སྒོ་བ། དམ་པ་ཀོ་བྲག་པ་སྟེ་དམ་པ་གསུམ་མོ། །གཞན་ཡང་མཁྱེན་རྟོགས་ཀྱིས་མངོན་པར་བརྗིད་ཅིང་། གཏོང་བ་དང་། དེས་པ་དང་ལྡན་པ། རྒྱལ་བ་དུ་མ་ལ་བྱ་བ་ལྷག་པར་བྱས་པ། སྦྱངས་པའི་སྟོབས་རྒྱས་པ། འཕགས་པའི་ནོར་གྱིས་ཕྱུག་པ། ཟབ་མོའི་ཆོས་ཀྱི་ཕུང་པོའི་མཛོད་འཛིན་པ། ཞི་ཞིང་དུལ་བ་ཤ་སྟག་གི་དབུ་ཆེ་ཉིས་སྟོང་དང་བརྒྱད་བརྒྱས་འགྲོ་བ་མ་ལུས་པ་འདྲེན་པར་མཛད་ཅིང་སྙིང་པོའི་བསྟན་པ་མཁའ་ཁྱབ་ཏུ་རྒྱས་པར་མཛད་དོ། །མདོར་ན་རྗེ་འདི་ཉིད་ཀྱི་ཕྲིན་ལས་ཀྱིས་བྱ་རྒོད་ཀྱི་ཉིན་ལམ་བཅོ་བརྒྱད་ཀྱི་བར་དུ་ཁྱབ་པར་གླིང་འདིའི་ས་སྟེང་དུ་གནས་པ་རྣམས་ལ་གྲགས་སོ།། །།
3-108
དེ་ནས་རྗེའི་རྒྱལ་ཚབ་སངས་རྒྱས་དབོན་བུ་སློབ་རྣམས་ཀྱིས། རིང་བསྲེལ་གྱི་སྙིང་པོ་ཅན་གྱི་རིན་པོ་ཆེའི་ཟ་མ་ཏོག་བཀོད་པ་ཁ་དབྱེ་ནས། ར་ལུང་དུ་གསེར་གྱི་གདུང་རྟེན་བཀྲ་ཤིས་སྒོ་མང་གི་ནང་དུ། རྗེའི་ཐུགས་མ་ཉམས་པ་དང་། སྐུ་ཚིགས་པའི་སྤྱན་རས་གཟིགས་གཅིག །དབུ་ཐོད་ཀྱི་རིགས་གསུམ་མགོན་པོས་གཙོས་པའི་གདུང་དང་རིང་བསྲེལ་སོགས་བྱིན་རླབས་མང་དུ་བཞུགས་པ་བཞེངས་སོ། །དེ་ནས་ཕྱི་རྟེན་སྒོ་མང་གི་མཆོད་རྟེན་ཆེན་པོ་བཞེངས་ཏེ། སྐུ་ཚིགས་པའི་ཕྱག་ན་པདྨ་གཅིག་དང་། རིང་བསྲེལ་དུ་མ་བཞུགས་སུ་གསོལ་ཞིང་། བྱིན་རླབས་ཤིན་ཏུ་ཆེ་བར་གྲགས་སོ། །དེ་ནས་འབྲུག་ཏུ་བྱང་ཆུབ་ཆེན་པོའི་སྐུ་ལུགས་མ་ལྷག་པར་ཆེ་བ་ཞིག་བཞེངས་པའི་ཐུགས་ཀར། རྗེའི་ལྗགས་མ་ཚིག་མ་ཉམས་པར་བཞུགས་པས། ཆོས་བརྒྱུད་ཀྱིས་ཁྱབ་ཚད་ལ་འབྲུག་པ་ཞེས་གྲགས་པར་གྱུར་ཏོ། །གཞན་ཡང་ཕྱག་ན་པདྨ་དང་། གདུང་རུས་དང་། རིང་བསྲེལ་སོགས་མང་དུ་བཞུགས་སོ། །ཕྱིར་གདུང་ཞུགས་སུ་ཕུལ་སར་ཡང་། མྱང་འདས་མཆོད་རྟེན་བརྩིགས། རིང་བསྲེལ་དང་འཇིག་རྟེན་དབང་ཕྱུག་གི་སྐུ་རྣམས་བཞུགས་སོ། །མདོར་ན་རྗེ་བཙུན་དམ་པ་དེའི་ཞལ་མཐོང་ཞིང་། གསུང་གིས་ངོམས་པར་བྱས་པ་དག་ལྟ་ཞོག །མཚན་ཙམ་ཐོས་པས་ཀྱང་སྲིད་པ་མཐའ་མར་བྱེད་ཅིང་། མཐོ་རིས་ཀྱི་ཡོན་ཏན་གྱིས་ཕྱུག་པར་བྱེད་པའི་མཐུ་མངའ་བ་དེ་ཉིད། 
3-109
སྐུའི་རྣམ་པར་འཕྲུལ་པ་འདི་ནས་འཕགས་པའི་ཡུལ་གྱིས་ལྗོངས་ཆེན་པོའི་ཤར་ཕྱོགས་གསེར་གྱི་གླིང་ཞེས་བྱ་བར་སྐུ་འཁྲུངས་ཏེ། བདེ་བའི་འབྱུང་གནས་སྦས་པ་ཞེས་གྲགས་པར་བྱེད་དོ། །ཡུལ་དེ་ལ་དབང་བསྒྱུར་བའི་རྒྱལ་པོ་རྟག་ཏུ་སྡིག་སྤྱོད་ཀྱི་ཟས་ཀྱིས་འཚོ་ཞིང་། སྤྱོད་ལམ་ཐམས་ཅད་རྒོད་བག་ཅན་དུ་གྱུར་པ་གདུལ་བའི་དུས་ལ་བབ་སྟེ། རྒྱལ་པོའི་ཁབ་ག་ལ་བ་དེར་འཁོར་དང་བཅས་ཏེ་སོང་ངོ་། །དེ་མཐོང་བ་ན་མ་རུངས་པའི་སེམས་ཀྱིས་རྒྱུད་གཏམས་ནས། འཁོར་དང་བཅས་པ་རབ་ཏུ་ཁྲོས་ཏེ་བརྡེག་པར་གཟས་པའི་ཚེ། རྫུ་འཕྲུལ་སྣ་ཚོགས་པ་བསྟན་པས། རྒྱལ་པོ་འཁོར་བཅས་ངོ་མཚར་སྐྱེས་ནས་དད་དེ། གུས་པས་འདུད་ཅིང་ཕོ་བྲང་དུ་སྤྱན་འདྲེན་པར་གསོལ་བ་གནང་སྟེ། རྗེས་སུ་གཟུང་ནས་བཏུལ་བར་མཛད་དོ། །དེ་ལ་སོགས་པ་རྨད་དུ་བྱུང་བའི་སྤྲུལ་པས་འགྲོ་བའི་དོན་མཛད་ཅིང་། རྒྱལ་བའི་བསྟན་པ་ཉིན་མོ་ལྟར་གསལ་བར་མཛད་ནས། མཐར་བསྐལ་པ་བཟང་པོ་འདིའི་སངས་རྒྱས་བརྒྱ་ཕྲག་དགུ་དང་བཅས་པའི་བརྒྱར་གཅིག་གིས་མ་ཚང་བ་དེ་དག་གི་སྐུ་དང་། འོད་དང་། སྐུ་ཚེ་དང་། མཛད་པ་དང་། འདུས་པ་རྣམས་དེ་ཉིད་དུ་གྱུར་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མོས་པ་ཞེས་བྱ་བར་མངོན་པར་རྫོགས་པར་འཚང་རྒྱ་བར་འགྱུར་རོ།། །།
3-110
ཞེས་པ་རྗེ་འགྲོ་བའི་མགོན་པོ་གཙང་པ་རྒྱ་རས་པའི་རྣམ་པར་ཐར་པ། ངོ་མཚར་དད་པའི་རླབས་ཕྲེང་ཞེས་བྱ་བ་འདི་ཉིད། མང་དུ་ཐོས་ཤིང་སྤོང་བ་ལ་གཅིག་ཏུ་བརྩོན་པ། ཐེག་པ་མཆོག་གི་རྣལ་འབྱོར་པ་སངས་རྒྱས་དར་པོས་ཡང་ཡང་དུ་བསྐུལ་བའི་ངོར། དཔལ་ལྡན་འབྲུག་པའི་རིང་ལུགས་འཛིན་པ་ཤཱཀྱའི་དགེ་སློང་ལུང་རིགས་སྨྲ་བ། མི་ཕམ་པདྨ་དཀར་པོ་ཕྱོགས་ལས་རྣམ་པར་རྒྱལ་བའི་སྡེ་ཞེས་བྱ་བས། རྗེ་སངས་རྒྱས་དབོན་དང་། རྒྱལ་བ་ལོ་རས་པས་བསྒྲིགས་པའི་རྣམ་ཐར་རྣམས་གཞིར་བྱས་ཏེ། ས་ཕོ་སྤྲེའུའི་ལོ་ཧོར་གྱི་ཟླ་བ་བཞི་པ། དུས་འཁོར་བའི་ས་ག་ཅན། སངས་རྒྱས་ཀྱི་དུས་ཆེན་པོའི་ཡར་གྱི་ངོའི་གྲལ་ཚེས་བཅོ་ལྔ་ལ། ཕྱོགས་བྲལ་གྱི་སྒར། ཤར་ཀོང་པོའི་ཡུལ་ལྗོངས་ཡིད་དུ་འོང་ཞིང་འབྱོར་ལྡན་གྱི་སྐྱེ་བོས་མངོན་པར་གང་བར་གནས་ཚེ། སྦྱར་བའི་ཡི་གེ་པ་ནི་གཡའ་བཟང་པ་ཆོས་མཛད་རིན་ཆེན་ཉི་མའོ།། །། སྨོན་ལམ་བཞུགས། ༈ མཁའ་མཉམ་འགྲོ་བ་ཀུན་གྱི་སྨན་གཅིག་པུ། །ཕན་དང་བདེ་བ་ཀུན་གྱི་དཔལ་འབྱུང་བའི། །ཐུབ་བསྟན་དམ་པ་རྙེད་དང་བཀུར་སྟི་ཡི། །སྒོ་ནས་ས་ལ་དར་ཞིང་རྒྱས་གྱུར་ཅིག །བཤད་དང་སྒྲབ་པའི་ཤིང་རྟའི་སྲོལ་ཆེན་པོས།།འགྲོ་རྣམས་ཐར་པའི་ལམ་ལ་འདྲེན་མཛད་པའི། །བསྟན་འཛིན་མཚུངས་པ་མེད་པའི་བཤེས་གཉེན་རྣམས། །སྐུ་ཚེ་རིང་ཞིང་འཕྲིན་ལས་རྒྱས་གྱུར་ཅིག།
3-111
འདི་ནས་འཇིག་རྟེན་གཞན་གྱི་དོན་གཤེགས་པ། །ཀུན་གྱི་ས་ལམ་བར་ཆད་ཉེར་ཞི་ཞིང་། །བཞེད་དོན་དམ་པ་མ་ལུས་འགྲུབ་གྱུར་ཏེ། །སྤྲུལ་པས་རྟག་ཏུ་འགྲོ་ཕན་མཛད་གྱུར་ཅིག །སེམས་ཅན་ཐམས་ཅད་བདེ་ཞིང་སྐྱིད་ལྡན་པ། །རྣམ་གྲོལ་བདེ་ཆེན་ས་ལམ་བགྲོད་པ་དང་། །བདག་ཀྱང་ཚེ་རབས་ཀུན་ཏུ་མཚན་ལྡན་གྱི། །དགེ་བའི་བཤེས་གཉེན་འབའ་ཞིག་བསྟེན་པར་ཤོག །རྟག་ཏུ་བདག་ནི་དམ་པའི་ཆོས་ཉན་ཞིང་། །བསྟན་པ་ཇི་བཞིན་བསྒྲུབ་ལ་མི་ངལ་བར། །ཐེག་ཆེན་འཕགས་པའི་ས་ལམ་རྫོགས་བགྱིས་ཏེ། །རྡོ་རྗེ་འཆང་དབང་ཚེ་འདིར་ཐོབ་པར་ཤོག །པདྨ་དཀར་པོས་ཀ་མ་རུ་པའི་གནས་མཆོག་ཏུ་སྦྱར་བའོ།། །།


目录
འགྲོ་བའི་མགོན་པོ་གཙང་པ་རྒྱ་རས་པའི་རྣམ་པར་ཐར་པ་ངོ་མཚར་དད་པའི་རླབས་ཕྲེང་ཞེས་བྱ་བ།